១. ឪពុកម្តាយចាំបាច់បង្រៀនកូនថា ធ្វើការទើបបានលុយ។ តាមលោក Dave Rasmey ជាអ្នកផ្តល់ដំបូន្មានផ្នែកហិរញ្ញវត្ថុ និងជាអ្នកនិពន្ធបានលើកឡើងថា បើកូនអ្នកមានអាយុ១២ឆ្នាំ សូមអ្នកមិនចាំបាច់ផ្ដល់លុយឱ្យកូនចាយស្រួលៗ នោះទេ អ្នកត្រូវបង្រៀនកូនថា កូននឹងទទួលបានលុយ បើកូនព្យាយាមខំធ្វើការអ្វីមួយ”។ ក្មេងដែលមានទម្លាប់ទទួលលុយដោយគ្មានការខំប្រឹងទេភាគច្រើនក្មេងនោះមិនស្គាលពីតម្លៃលុយគឺចេះតែចាយតែប៉ុណ្ណោះ។ នៅក្នុងករណីបែបនេះ ឪពុកម្តាយកំពុងតែធ្វើបាបកូនខ្លួនឯង មិនចេះពឹងលើខ្លួនឯងទេ ដេកចាំពឹងលើកម្លាំងញើសឈាមឪពុកម្តាយចាយលុយរហូត។ ឪពុកម្តាយត្រូវដាំនៅក្នុងផ្នត់គំនិតកូនថា តម្លៃលុយមិនមែនកូនសុំដើម្បីចាយទេ គឺខំប្រឹងធ្វើការ ខំប្រឹងរកស៊ី ទើបកូនមានសមត្ថភាពចិញ្ចឹមខ្លួនឯង និងចិញ្ចឹមកូនគ្រួសារឱ្យរស់ស្រួលបានមួយជីវិត។

២. ចូរធ្វើជាគំរូ និងអនុញ្ញាតឱ្យកូនធ្វើអ្វីដែលពួកគេស្រលាញ់ ទើបកូនមានសមត្ថភាពពូកែយោងអនាគតខ្លួនរួច។ តាមលោកស្រី Maye Musk មានវ័យ៧៧ឆ្នាំជាម្តាយបង្កើតមហាសេដ្ឋីលោក អីឡុន ម៉ាស បានលើកឡើងថា​របៀបដែលខ្ញុំចិញ្ចឹមកូន Elon Musk និងកូនពីរនាក់ផ្សេងទៀតឱ្យក្លាយជាបុគ្គលជោគជ័យ ខ្ញុំតែងតែធ្វើជាម្តាយគំរូម្នាក់សម្រាប់កូនៗ ហើយឱ្យពួកគេធ្វើតាមផ្នែកណាមួយដែលកូនស្រឡាញ់។ ព្រោះកូនធ្វើអ្វីដែលខ្លួនស្រឡាញ់ ទើបកូនខំប្រឹងធ្វើ ហើយធ្វើឱ្យអស់ពីចិត្តពីថ្លើម។ ហើយខ្ញុំបានលើកទឹកចិត្តឱ្យកូនៗ ធ្វើអ្វីដែលជាចំណង់ចំណូលចិត្តរបស់ខ្លួន រួមទាំងបង្រៀនឱ្យចេះជួយមនុស្សថែមទៀតផង”។ ចំណុចនេះ ងាយយល់ណាស់! គ្រាន់តែឪពុកម្តាយខំធ្វើខ្លួនជាគំរូ ឱ្យកូនធ្វើកិច្ចការអ្វីមួយដែលខ្លួនចូលចិត្ត ហើយបន្តលើកទឹកចិត្តកូនឱ្យខំធ្វើ ធ្វើរហូតទទួលបានលទ្ធផលធំ។

៣.  បង្រៀនកូនយកឈ្នះការភ័យខ្លាច។ តាមលោកយាយ Esther Wojcicki មានវ័យ ៨៤ឆ្នាំ ជាអ្នកនិពន្ធសៀវភៅ How to Raise Successful People លក់ដាច់បំផុតមួយបានលើកឡើងថា “កុំយកផ្នត់គំនិតចាស់ហួសសម័យមកបំពាក់ឱ្យក្មេងជំនាន់ក្រោយមានអារម្មណ៍ភ័យខ្លាច”។ ប្រជាជនខ្មែរមួយភាគធំ ការចិញ្ចឹមកូនមិនទាន់បានល្អប៉ុន្មានទេ មានដូចជា ស្រែកដាក់កូន បំភ័យកូន សម្លុតកូន និងនិយាយកុហកជាដើម។ សម្រាប់លោកយាយ Esther Wojcicki បានប្រាប់បន្ថែមថា “ខ្ញុំចិញ្ចឹមកូនបានជោគជ័យបែបនេះ ព្រោះតែខ្ញុំបង្រៀនកូនៗ ឱ្យយល់ពីការបរាជ័យក្នុងវិថីជីវិត។” គាត់តែងណែនាំកូនៗ មានចិត្តក្លាហានធ្វើរឿងឱ្យច្រើន ទោះបីបរាជ័យ កុំឱ្យកូនគិតថា វាជារឿងអាក្រក់ តែជារឿងល្អទៅវិញ៕ អត្ថបទដោយ៖ ទ្រ សុភាព