ជាពិសេសនៅពេលយប់ ពន្លឺអេក្រង់ចេញពីទូរស័ព្ទ ឬកុំព្យូទ័រអាចបង្កគ្រោះថ្នាក់ធ្ងន់ធ្ងរជាងពេលថ្ងៃដោយសារវារំខានដល់ដំណើរការធម្មជាតិនៃការត្រៀមខ្លួនសម្រាប់ការគេង។ អេក្រង់ទូរស័ព្ទ និងឧបករណ៍ឌីជីថលផ្សេងៗ បញ្ចេញពន្លឺពណ៌ខៀវ ដែលអាចរារាំងដល់ការបញ្ចេញអ័រម៉ូនមេឡាតូនីន។ អ័រម៉ូននេះមានតួនាទីសំខាន់ក្នុងការធ្វើឱ្យរាងកាយមានអារម្មណ៍ងងុយ និងត្រៀមចូលគេង។ ផលវិបាកដែលកើតឡើងជាញឹកញាប់ គឺការគេងយឺត ធ្វើឱ្យគេងមិនលក់ ភ្ញាក់ឡើងញឹកញាប់កណ្តាលយប់ ឬមានអារម្មណ៍មិនស្រស់ស្រាយនៅពេលព្រឹក។ បើស្ថានភាពនេះបន្តយូរ វាអាចបង្កឱ្យមានការអស់កម្លាំងរ៉ាំរ៉ៃ អារម្មណ៍ប្រែប្រួល ខ្វះការផ្តោតអារម្មណ៍ និងធ្វើឱ្យប្រព័ន្ធភាពស៊ាំរបស់រាងកាយចុះខ្សោយ។

ការលេងទូរស័ព្ទក្នុងបន្ទប់ងងឹត បង្កឱ្យមានភាពខុសគ្នាខ្លាំងរវាងពន្លឺអេក្រង់ និងបរិយាកាសជុំវិញ ដែលធ្វើឱ្យសាច់ដុំភ្នែកតានតឹងហួសកម្រិត។ លទ្ធផលអាចនាំឱ្យភ្នែកស្ងួត ភ្នែករលាក មើលព្រិល ឬមានអារម្មណ៍ឈឺ និងស្រវាំងភ្នែក។ ការព្រិចភ្នែកតិចពេលមើលអេក្រង់ក៏ធ្វើឱ្យភ្នែកស្ងួតកាន់តែខ្លាំង និងបង្កឱ្យមានភាពមិនស្រួលរយៈពេលវែង។ ការគេងមិនគ្រប់គ្រាន់ ដែលបណ្តាលមកពីការប្រើទូរស័ព្ទពេលយប់ មិនមែនជាបញ្ហាតូចតាចឡើយ។ វាអាចប៉ះពាល់ដល់តុល្យភាពអ័រម៉ូន ការរំលាយអាហារ សុខភាពផ្លូវចិត្ត និងសុខភាពបេះដូង។ មនុស្សដែលគេងមិនគ្រប់គ្រាន់ជាញឹកញាប់ អាចប្រឈមនឹងការឡើងទម្ងន់ កើតជំងឺថប់បារម្ភ ការចងចាំចុះខ្សោយ ជាដើម។

ដើម្បីថែរក្សាទាំងការគេង និងសុខភាពភ្នែក គួរតែចាប់ផ្តើមពីការកែប្រែទម្លាប់តូចៗ។ ជៀសវាងការប្រើទូរស័ព្ទយ៉ាងហោចណាស់មួយម៉ោងមុនចូលគេង អាចជួយឱ្យខួរក្បាលត្រៀមខ្លួនសម្រាប់ការសម្រាកបានល្អជាងមុន។ ប្រសិនបើចាំបាច់ត្រូវប្រើទូរស័ព្ទ គួរបន្ថយពន្លឺអេក្រង់ និងបើកភ្លើងបន្ទប់ឱ្យមានពន្លឺសមស្រប ជំនួសការមើលអេក្រង់ក្នុងទីងងឹត៕

អត្ថបទដោយ៖ សារួ