១. ទម្លាប់បន្ថែមជាតិផ្អែមក្នុងការហ្វេ៖ ដូចជាបន្ថែមក្រែម ទឹកដោះគោខាប់ ឬម្សៅក្រែម ដើម្បីឱ្យមានរសជាតិឆ្ងាញ់។ គ្រឿងផ្សំទាំងនេះភាគច្រើនមានផ្ទុកជាតិខ្លាញ់ឆ្អែត និងស្ករចម្រាញ់ក្នុងបរិមាណខ្ពស់ធ្វើឱ្យថាមពលដែលរាងកាយទទួលបានកើនឡើងលឿន។ ទោះបីអ្នកបន្ថែមក្រែមតែបន្តិចបន្តួចក៏ដោយ តែបើបន្ថែមបែបនេះរាល់ថ្ងៃរាងកាយនឹងទទួលបានការកាឡូរីលើសក្នុងរយៈពេលវែង ជាហេតុធ្វើឱ្យឡើងទម្ងន់ និងមានបញ្ហាមេតាបូលីស។

២. ទម្លាប់បន្ថែមស្ករ ឬសារធាតុផ្អែមច្រើនពេក៖ វាក៏មិនសូវខុសគ្នាពីចំណុចទី១ដែរ ស្ករអាចធ្វើឱ្យកម្រិតជាតិស្ករក្នុងឈាមកើនឡើងភ្លាមៗ បណ្តាលឱ្យរាងកាយបញ្ចេញអាំងស៊ុយលីនច្រើន និងជំរុញការស្តុកជាតិខ្លាញ់។ ទោះបីអ្នកផឹកខ្លះជ្រើសរើសសារធាតុផ្អែមសិប្បនិម្មិតក៏ដោយ តែការប្រើប្រាស់វាយូរៗទៅអាចរំខានដល់ការគ្រប់គ្រងការឃ្លានអាហារ និងប៉ះពាល់ដល់សុខភាពពោះវៀន។

៣. ផឹកកាហ្វេខុសពេល៖ អ្នកផឹកខ្លះចូលចិត្តផឹកកាហ្វេនៅពេលព្រឹកពេលពោះទទេ ឬនៅពេលរសៀល និងល្ងាច តែផឹកនៅពេលទាំងនេះអាចបង្កឱ្យមានការរលាកក្រពះ និងរំខានដល់ការគេង។ នៅពេលអ្នកគេងមិនគ្រប់គ្រាន់ អរម៉ូនដែលគ្រប់គ្រងការឃ្លាន និងការឆ្អែតនឹងមានអតុល្យភាព ដែលធ្វើឱ្យអ្នកងាយឃ្លានអាហារជាងមុន និងប្រមូលផ្តុំជាតិខ្លាញ់។ ពេលវេលាដែលសមរម្យសម្រាប់ផឹកកាហ្វេគឺត្រូវផឹកប្រហែលកន្លះម៉ោងទៅមួយម៉ោងបន្ទាប់ពីអាហារពេលព្រឹករួច ហើយគួរជៀសវាងការផឹកនៅពេលរសៀល។

៤. ផឹកកាហ្វេជំនួសទឹក និងអាហារពេលព្រឹក៖ មនុស្សមួយចំនួនយល់ច្រឡំថាកាហ្វេអាចជំនួសទឹកធម្មតាបាន។ ទោះបីកាហ្វេជាសារធាតុរាវដូចទឹកក៏ដោយតែវានៅតែមិនមែនជាទឹកធម្មតា កាហ្វេមានជាតិកាហ្វេអ៊ីនវាមានឥទ្ធិលពលបញ្ចុះទឹកនោមស្រាល ដែលអាចធ្វើឱ្យរាងកាយបាត់បង់ជាតិទឹកលឿនជាងមុន។ ប្រសិនអ្នករំពឹងតែលើកាហ្វេហើយមិនបានផឹកទឹកគ្រប់គ្រាន់ទេ រាងកាយរបស់អ្នកនឹងចាប់ផ្ដើមខ្សោះជាតិអាចប៉ះពាល់ដល់ការរំលាយអាហារ ធ្វើឱ្យស្បែកស្ងួត និងប៉ះពាល់ដល់សុខភាពទូទៅ។ ដូច្នេះបើអ្នកផឹកកាហ្វេមួយពែង គួរផឹកទឹកមួយកែវជាមួយ ដើម្បីរក្សាតុល្យភាពជាតិទឹកក្នុងរាងកាយ។

សរុបមក កាហ្វេមិនមែនជាមូលហេតុផ្ទាល់នៃការឡើងទម្ងន់ ឬបញ្ហាសុខភាពឡើយ ប្រសិនបើយើងផឹក វាបានត្រឹមត្រូវ។ ចាប់ផ្ដើមកែប្រែទម្លាប់តូចៗ ដូចជាកាត់បន្ថយជាតិស្ករ ជ្រើសរើសគ្រឿងផ្សំធម្មជាតិ និងផឹកនៅពេលវេលាដែលសមរម្យ អាចជួយឱ្យអ្នករីករាយនឹងទទួលបានរសជាតិពិតនៃកាហ្វេ ល្អដល់សុខភាព និងអាចគ្រប់គ្រងទម្ងន់អ្នកបានរយៈវែង៕

អត្ថបទដោយ៖ សារួ