តាមគេហទំព័រ medicalnewstoday បានចុះផ្សាយថា “តាមអ្នកស្រាវជ្រាវបាននិយាយថា ការធ្វើលំហាត់ប្រាណចន្លោះពីម៉ោង ៧ដល់៩ព្រឹកគឺល្អបំផុតសម្រាប់ដុតជាតិខ្លាញ់។ នេះជាម៉ោងអ្នកមានថាមពលក្នុងការហាត់ប្រាណបង្កើនថាមពលទ្វេដង។ ចំណែកល្ងាចវិញនៅចន្លោះម៉ោង ៥ដល់៧ នេះជាម៉ោងរាងកាយបញ្ចេញថាមពលខ្លាំងដើម្បីដុតជាតិខ្លាញ់”។ តាមអ្នកគ្រូ ដាវីន បានបន្ថែមដែរថា អ្នកចង់សម្រកគីឡូមុនដំបូងគួរតែព្យាយាមហាត់ ៤០នាទីរយៈពេល ២អាទិត្យទៅ៣អាទិត្យ ទើបវាបញ្ចេញលទ្ធផលឱ្យឃើញឱ្យអ្នកពេញចិត្តតែម្តង។ គោលបំណងនៃការហាត់ប្រាណ គឺហាត់សម្រកជាតិខ្លាញ់បង្កើនសាចដុំ ព្រោះសាច់ដុំមានអត្ថប្រយោជន៍ជួយសន្លាក់ ជួយឈាមកម្ចាត់ជាតិពុល ជួយដកដង្ហើមនិងការពារជំងឺផ្សេងៗ ផងដែរ”។

អ្នកគ្រូបានបន្ថែមថា អ្នកខ្លះគាត់ហាត់ប្រាណតិចតួចអាចជាការដើរ និងរត់ខ្លះ បានតែ១០ទៅ២០នាទី និងរយៈពេលតែ២ទៅ៣ថ្ងៃ គាត់ឡើងជញ្ជីងថ្លឹង ឃើញថាអត់ស្រកគីឡូគាត់ក៏លែងហាត់ប្រាណទៀត។ យកល្អគាត់ហាត់ប្រាណមានប្រសិទ្ធភាពខ្ពស់អាចជួលគ្រូ មានមិត្តចេះហាត់ប្រាណ និងសួរគេសួរឯងពីរបៀបហាត់ប្រាណ ទើបការហាត់ប្រាណហ្នឹងវាបានលទ្ធផលលឿន។ ព្រោះការហាត់ប្រាណបែបរត់និងដើរមិនទាន់គ្រប់គ្រាន់ទេ គួរបំបែកជាតិខ្លាញ់ដោយហាត់លើកទម្ងន់ខ្លះ។ ពេលគាត់ព្យាយាមហាត់ប្រាណបែបនេះហើយ គួរតែហូបអាហារ​ជួយ​សាច់ដុំ​រឹងមាំមានដូចជា ផ្លែ​ចេក ផ្លែប៉ោម ផ្លែប័រ ហូបត្រី ហូបសាច់គោ ដើមទ្រុងមាន់ និងស៊ុត​។ ចំណែកភេសជ្ជៈវិញ មានទឹកអំពៅ ទឹកក្រូច ទឹកដោះគោស្រស់ និងទឹកដោះគោជូរ។ សម្រាប់ហូបអ្នកអាហារទាំងអស់នេះ ជួយដុតជាតិខ្លាញ់ចេញពីរាងកាយ និងសម្បូរថាមពលក្នុងកើនទ្វេដងផងដែរ។

ដូចនេះហើយ អ្នកគ្រូ ធាវ ដាវីន បានមានប្រសាសន៍ចុងក្រោយថា បើអ្នកព្យាយាមហាត់ប្រាណតាមខាងលើបានរាប់រៀបនោះ កុំបាក់ទឹកចិត្តអី គឺជាដំណើរបំបែកជាតិខ្លាញ់ ហើយជាតិខ្លាញ់ហ្នឹងក្លាយជាសាច់ដុំ។ ហើយការហាត់ប្រាណជួយការពារជំងឺលើសឈាម ស្រូបជាតិស្ករការពារជំងឺទឹកនោមផ្អែម និងអាយុវែងផងដែរ។ យើងត្រូវចូលរួមហាត់ប្រាណទាំងអស់គ្នា ទើបសុខភាពល្អ ហើយឆ្ងាយពីមន្ទីរពេទ្យផងដែរ៕ អត្ថបទដោយ៖ ទ្រ សុភាព