ការរស់នៅរបស់យើងជាប្រចាំថ្ងៃ ត្រូវការជាតិទឹក ៧០ភាគរយ ដើម្បីចិញ្ចឹមរាងកាយ សម្រាប់រាល់ប្រតិកម្មគីមីនៅក្នុងខ្លួន។ សម្រាប់អ្នកហាត់ប្រាណ មានការតមអាហារជាច្រើន តែអ្វីដែលពិសេស ដើម្បីចិញ្ចឹមរាងកាយបានច្រើន គឺជាតិទឹក។ អ្នកហាត់ប្រាណគួរញ៉ាំទឹកប៉ុន្មានក្នុងមួយថ្ងៃ?
ការរស់នៅប្រចាំថ្ងៃ របស់ប្រជាជនខ្មែរភាគច្រើន ការផឹកទឹកនេះ មិនទាន់បានត្រឹមត្រូវនៅឡើយទេ។ មានអ្នកវេជ្ជសាស្រ្តជាច្រើនបានណែនាំថា មនុស្សទូទៅគួរផឹកទឹក ២.៥ទៅ ៣ លីត្រក្នុងមួយថ្ងៃ ដើម្បីដឹកជញ្ជូនសារធាតុចិញ្ចឹមទៅជួយការរំលាយអាហារ កាកសំណល់ចោល និងបញ្ចេញជាតិពុល ហើយវាជួយដល់មុនងារខួរក្បាលឱ្យមានថាមពល និងអារម្មណ៍ផងដែរ។ ការផឹកនេះ បុរសគួរផឹកទឹក ៣.៧ លីត្រ ចំណែកស្រ្តីគួរផឹក ២.៧ លីត្រ។
តាមលោក Joy Dubost ជាអ្នកជំនាញខាងចំណីអាហារកីឡានិយាយថា ជាតិទឹក ២០ ភាគរយក្នុងខ្លួនរបស់យើង បានមកពីចំណីអាហារ។ សម្រាប់អ្នកហាត់ប្រាណ ជាតិទឹកនេះមានសារៈសំខាន់ចំពោះរាងកាយ និងសុខភាព។ តាមអ្នកជំនាញខាងអាហាររូបត្ថម្ភពីសាកលវិទ្យាCentral Washington បាននិយាយថា មនុស្សយើងបាត់បង់ជាតិទឹកច្រើនអំឡុងេពេលធ្វើលំហាត់ប្រាណ។ គាត់បានបន្តថា អ្នកហាត់ប្រាណមធ្យមបាត់បង់ជាតិផឹកទឹកកន្លះលីត្រក្នុងមួយម៉ោង។
មុនពេលហាត់ប្រាណ អ្នកមិនគួរញ៉ាំអាហារទេ តែបើអ្នកអស់កម្លាំងពេក អ្នកអាចហូបអាហារណាដែលទន់ វាជួយសម្រួលដល់ការរំលាយអាហារមានដូចជាចេក ទឹកដូង និងទឹក..។ យោងតាមក្រុមប្រឹក្សាអាមេរិកស្តីពីការធ្វើលំហាត់ប្រាណ អ្នកហាត់ប្រាណគួរទទួលទានទឹក កន្លះលីត្រ រយៈពេល ៩០ នាទី មុនពេលហាត់ប្រាណ ដើម្បីសាច់ដុំអ្នកមានជាតិទឹក និងជួយសម្រួលសន្លាក់របស់អ្នកបានល្អផងដែរ។ បន្ទាប់មកហាត់ប្រាណរយៈពេល ១០ ទៅ ២០ នាទី អ្នកអាចផឹកទឹកប្រហែល ០. ២៥លីត្រ។
នៅក្នុងមួយថ្ងៃ អ្នកហាត់ប្រាណត្រូវផឹកទឹកច្រើនជាងធម្មតាអាច ៤ទៅ៥ លីត្រ ដើម្បីជាតិទឹកនេះ អាចចិញ្ចឹមរាងកាយបានគ្រប់គ្រាន់។ ការផឹកច្រើន វាជំនួយលាងជាតិពុល និងធ្វើឱ្យរាងកាយមានលំនឹង ហើយវាគ្មានជាតិកាឡូរីនោះទេ៕ អត្ថបទដោយ៖ ទ្រ សុភាព