បច្ចុប្បន្នមានជំងឺកាចសាហាវជាច្រើនប្រភេទ បានកំពុងគំរាមកំហែងអាយុជីវិតមនុស្សជាតិយើង ជាក់ស្ដែងជំងឺខ្សោយថ្លើម ក៏ត្រូវបានចាក់ទុកជាប្រភេទជំងឺមួយ ដែលមានលក្ខណៈកាចសាហាវ និងអាចបង្កគ្រោះថ្នាក់ដល់អាយុជីវិតបាន​ ។

បើយោងតាមគេហទំព័រ mayoclininc.org មានរោគសញ្ញាសំខាន់ៗមួយចំនួន ដែលអាចបញ្ជាក់ថា លោកអ្នកកំពុងមានជំងឺខ្សោយថ្លើមហើយ ។  

រោគសញ្ញា៖​ អ្នកដែលកើតជំងឺខ្សោយថ្លើម ក្នុងដំណាក់កាលដំបូងៗ​ អាចគ្មានរោគសញ្ញា ដែលគួរឲ្យចាប់អារម្មណ៍នោះទេ ។ ប៉ុន្តែក្នុងដំណាក់កាលបន្តបន្ទាប់​ អ្នកជំងឺអាចមានរោគសញ្ញាមួយចំនួនដូចជា ៖ ឈឺនៅក្រោមឆ្អឹងជំនីផ្នែកខាងស្កាំ តឹងណែន និងហើមពោះ មិនឃ្លានអាហារ និងមានអារម្មណ៍ថាឆ្អែតស្ទើរគ្រប់ពេល ស្រកទម្ងន់ ខ្សោយអស់កម្លាំងខ្លាំង ក្អួតចង្អោរ ភ្នែក និងស្បែកឡើងលឿង ស្លេកស្លាំង ទឹកនោមនោមប្រែជាពណ៌ស្រអាប់ ក្ដៅខ្លួនមិនព្រមបាត់ -ល-។ ជំងឺខ្សោយថ្លើមស្រួចស្រាវ អាចបង្កឲ្យមានផលវិបាកធ្ងន់ធ្ងរ ចំពោះសុខភាពជាច្រើនដូចជា៖ អ្នកជំងឺប្រឈមនឹងការហើមខួរក្បាល(បណ្ដាលមកពីការចាល់ជាតិទឹកក្នុងខួរក្បាល) បណ្ដាលឲ្យហូរឈាមក្នុងពោះវៀន ដែលជាស្ថានភាពមួយពិបាកគ្រប់គ្រង អាចបង្កគ្រោះថ្នាក់ដល់អាយុជីវិតបាន។ អ្នកជំងឺខ្សោយថ្លើមនឹងប្រឈមការបង្ករោគញឹកញាប់ ជាពិសេសការបង្ករោគលើប្រព័ន្ធផ្លូវដង្ហើម និងប្រព័ន្ធបង្ហូរទឹកនោម ។ក្រៅពីនេះ អ្នកជំងឺខ្សោយថ្លើម នឹងប្រឈមបញ្ហាខ្សោយតម្រងនោមរ៉ាំរ៉ៃផងដែរ ។

វិធីបង្ការកុំឲ្យកើតជំងឺខ្សោយថ្លើមរួមមាន៖

១. កុំប្រើប្រាស់ថ្នាំលើសកម្រិត៖ ការប្រើប្រាស់ថ្នាំមិនបានត្រឹមត្រូវដោយគ្មានវេជ្ជបញ្ជា បានកើតមានច្រើនករណីគួរឲ្យព្រួយបារម្ភ ជាពិសេសប្រភេទថ្នាំ  ដែលអាចនាំឲ្យប៉ះពាល់ដល់សរីរៈសំខាន់ៗ ដូចជាថ្លើមជាដើម ។ ប្រភេទថ្នាំដូចជា ថ្នាំ Antibiotics (ថ្នាំផ្សះ) និងថ្នាំបំបាត់ការឈឺចាប់ជាដើម លោកអ្នកគួរប្រុងប្រយ័ត្ន និងត្រូវប្រើប្រាស់តាមវេជ្ជបញ្ជា។

២. សុវត្ថិភាពនៃការរួមភេទ៖ មានមេរោគជាច្រើនប្រភេទ ដែលអាចឆ្លងតាមរយៈការរួមភេទ ក្នុងនោះក៏មានមេរោគថ្លើមប្រភេទ B និងប្រភេទ C ផងដែរ ។ ដើម្បីជួយឲ្យថ្លើមមានសុខភាពល្អ លោកអ្នកត្រូវឲ្យតម្លៃលើសុវត្ថិភាពនៃការរួមភេទ ។

៣. ជៀសវាងការប្រើប្រាស់ឫសឈើ៖ ការប្រើប្រាស់ឫសឈើដើម្បីព្យាបាលជំងឺផ្សេងៗ នៅក្នុងប្រទេសយើង វាជារឿងធម្មតា និងសាមញ្ញា​។ ប៉ុន្តែលោកអ្នកដឹងទេថា វាអាចធ្វើឲ្យប៉ះពាល់ដល់សរីរៈជាច្រើនរបស់មនុស្សយើង ក្នុងនោះមានដូចជាថ្លើម តម្រងនោម និងក្រពះពោះវៀនជាដើម ដោយមានអ្នកខ្លះបានកើតជំងឺក្រិន និងខ្សោយតម្រងនោមរ៉ាំរ៉ៃផងដែរ។

៤. ជៀសវាងការញ៉ាំស្រាច្រើន និងញឹកញាប់៖ ការផឹកស្រា បានក្លាយជារឿងសាមញ្ញាទៅហើយ សម្រាប់សង្គមខ្មែរយើង មិនថាមាន ឬគ្មានកម្មវិធីជួបជុំអ្វីទេ ។ ឲ្យតែចង់ផឹក គឺអាចផឹកបានគ្រប់ពេល និងគ្មានដែនកំណត់ទៀតផង ។ ការផឹកស្រាច្រើន និងញឹកញាប់ បានផ្ដល់ផលអវិជ្ជមានជាច្រើន ចំពោះសុខភាព ជាពិសេសសុខភាពថ្លើមតែម្តង វាអាចធ្វើឲ្យកើតជំងឺក្រិនថ្លើម ជំងឺមហារីកថ្លើម និងជំងឺរលាកថ្លើមបានផងដែរ។

៥.​ រក្សាតុល្យភាពទម្ងន់រាងកាយ៖ ការលើសទម្ងន់រាងកាយ បានបង្កឲ្យមានបញ្ហាសុខភាពជាច្រើន ដូចជាបង្កឲ្យកើតជំងឺលើសសម្ពាធឈាម ជំងឺទឹកនោមផ្អែម និងជំងឺខ្លាញ់រុំថ្លើមជាដើម ។ លោកអ្នកអាចរក្សាទម្ងន់រាងកាយតាមរយៈការហាត់ប្រាណទៀតទាត់ និងមានរបបចំណីអាហារត្រឹមត្រូវ ។ ក្រៅពីនេះ ការពិនិត្យសុខភាពជាប្រចាំ យ៉ាងហោចណាស់មួយឆ្នាំពិនិត្យឲ្យបានម្ដង នោះលោកអ្នកកាន់តែមានសុខភាពល្អ និងជៀសវាងផលវិបាកផ្សេងៗបាន ៕

អត្ថបទដោយ៖ ហួ ភារ៉ា