ជំនាញគឺជាចំណូលឱ្យតែចេះច្បាស់ ចាប់វាឱ្យចេញជាអាជីពនោះចំណូលក៏រកបានតាមនោះដែរ។ ជាក់ស្តែងនឹងភ្នែក ថ្ងៃនេះក្រុមការងារចាបបៃតងនឹងនាំបងប្អូនមកស្គាល់ម្ចាស់ឆានែលយូធូបអន្តរជាតិមួយដែលបង្ហោះពីរបៀបហាត់ប្រាណរហូតយកជាអាជីព ហើយអាចរកលុយបានរាប់លានដុល្លារពីអាជីពមួយនេះ។

ម្ចាស់ឆានែលយូធូបបង្ហោះពីការហាត់ប្រាណដែលមានឈ្មោះថា Rohit Khatri Fitness, អ្នកជំនាញខាងអាហារូបត្ថម្ភវិទ្យាសាស្ត្រកីឡាមកពីប្រទេសឥណ្ឌារូបនេះ មានអ្នកចុចSubscribe ចំនួន ៤,៦៣លាននាក់(តួលេខបច្ចុប្បន្ន) នៅលើយូធូបរបស់គាត់។ ឆានែលមួយដែលផ្តោតតៅលើលំហាត់ប្រាណកាយសម្បទា,Rohit បានបង្ហោះវីដេអូលំហាត់ប្រាណដែលបានកំណត់បែងចែកគោលដៅលើផ្នែកនីមួយៗផ្សេងៗគ្នានៃរាងកាយ ដើម្បីឱ្យអ្នកទស្សនាអាចធ្វើតាមបាន មានដូចជាលំហាត់ប្រាណស្មា, ទ្រូង, ស្មានិងជើងជាដើម។ មូលហេតុដែលគាត់ធ្វើតាមផ្នែកៗបែបនេះ ដោយសារតែគាត់សិក្សាដឹងថាមនុស្សគ្រប់រូបចង់ស្រកផ្នែកផ្សេងៗគ្នា ហើយជាផ្នែកជាក់លាក់នៃរាងកាយរបស់យើងប៉ុណ្ណោះ។ ដូចនេះវីដេអូទាំងនេះមានអត្ថប្រយោជន៍ណាស់ព្រោះវាផ្តោតតែនៅទីនោះហើយយើងមិនចាំបាច់ថតវីដេអូទាំងមូលទេ។

ប៉ុន្តែអ្វីដែលគួរឱ្យភ្ញាក់ផ្អើលនោះគឺ ក្រៅពីអាចឱ្យអ្នកទស្សនាបានហាត់តាមនិងទទួលបានរាងស្អាតហើយនោះ ការចំណាយពេលថតរួចបង្ហោះវីដេអូនៅលើយូធូបរបស់គាត់នេះក៏បានធ្វើឱ្យគាត់ក្លាយជាមហាសេដ្ឋីផងដែរ គឺគាត់អាចរកលុយបានរាប់លានដុល្លារពីជំនាញមួយនេះ។ តាមការឱ្យដឹងរបស់ jakhunews, នៅក្នុងឆ្នាំ២០២០កន្លងមកនេះ លោក Rohit Khatri អាចរកចំណូលបានប្រមាណពី១សែនទៅ១លានដុល្លារអាមេរិក ហើយសព្វថ្ងៃគាត់មានទ្រព្យសម្បត្តិសរុបពី៣លានទៅ៥លានដុល្លារ។

ក្រឡេកទៅមើលការចាប់ផ្តើមអាជីពដំបូងរបស់លោកគឺ នៅឆ្នាំ២០១៦ លោកបានចាប់ផ្តើមអាជីពរបស់លោកដោយបង្ហោះមាតិកាទាក់ទងនឹងសុខភាពនិងការហាត់ប្រានសាច់ដុំ។ បន្ទាប់មកលោកក៏ចាប់ផ្តើមមានយូធូបឆានែលដែលមានឈ្មោះថា Rohit Khatri Fitness ដោយបង្ហោះពីវីដេអូដែលលោកមានជំនាញស្រាប់គឺហាត់ប្រាណនិងរបបអាហារ។ នេះសបញ្ជាក់ឱ្យឃើញថា ឱ្យតែយើងមានជំនាញច្បាស់ សម័យបច្ចេកវិទ្យាប្រើជំនាញឱ្យជាចំណូលបានតាមរយៈបច្ចេកវិទ្យានិងអ៊ីធើណេតបានយ៉ាងងាយ។ នេះជាច្រករកចំណូលមួយដែលបងប្អូនប្រជាជនខ្មែរអាចមើលរំលង តែបើយើងធ្វើឱ្យឱ្យច្បាស់លាស់ ចេញជារូបរាង ផ្តល់ប្រយោជន៏ដល់មនុស្សជាតិប្រាកដណាស់ អ្នកនឹងអាចទាញចំណូលពីវាវិញបាន៕

អត្ថបទដោយ៖ លីហួយ