មនុស្សភាគច្រើនចេះមានបញ្ហាផ្លូវចិត្តកាន់តែធ្ងន់ ឬរស់ទ្រាន់ទាំងផ្លូវចិត្តចុះខ្សោយ មកពីកត្តាពីរយ៉ាងទីមួយ រស់ក្នុងអតីតកាលដែលមានការឈឺចាប់ចេះតែគិតពីវា ឬបណ្តោយខ្លួនតាមការឈឺចាប់រហូតបាក់ទឹកចិត្តដោយអត់ដឹងខ្លួនទេ។ ចំណែកទីពីរគឺរស់ក្នុងអនាគតកាលពេករហូតក្លាយជាជំងឺព្រួយបារម្ភ ខ្លាចអនាគតមិនល្អ ព្រោះតែបញ្ហាជាច្រើនរួមបញ្ចូលគ្នានោះគឺបញ្ហាលុយ បញ្ហាគ្រួសារ និងការងារ...។ ទោះបីនេះជាបញ្ហាធ្វើស៊ីផ្លូវចិត្តឱ្យទាន់ខ្សោយក៏ដោយ ក៏អ្នកមានច្រកមួយសម្រាប់ចេញដែរគឺរស់ក្នុងបច្ចុប្បន្ននេះឯង។
ឥឡូវនេះ អ្នកមកតាមដានរឿងមួយ បញ្ជាក់ថា ការរស់នៅក្នុងបច្ចុប្បន្នកាលនាំរូបអ្នកចាកចេញពីបញ្ហាផ្លូវចិត្ត។ មានបុរសចំណាស់ម្នាក់ល្បីថា បុរសឈ្លាសវៃហើយរស់នៅមានក្តីសុខបំផុត។ បើមើលតាមសំបកខាងក្រៅគ្មានអ្វីអស្ចារ្យហើយក៏គ្មានអ្វីពិសេសដែរ។
មានក្មេងប្រុសម្នាក់ចង់ដឹងថា បុរសនោះរស់នៅមានក្តីសុខបែបណា? ក្មេងប្រុសនោះបានចោទសំណួរថា នៅលើលោកនេះអ្វីសំខាន់បំផុត? បុរសនោះក៏ឆ្លើយតបថា ពេលវេលាក្នុងបច្ចុប្បន្ននេះគឺសំខាន់ជាងគេបំផុតក្នុងលោក។
ហើយក្មេងប្រុសមិនអស់ចិត្តក៏សួរបន្តថា តើក្នុងលោកនេះមនុស្សប្រភេទណាមានសារៈសំខាន់បំផុតចំពោះយើង? បុរសនោះក៏ឆ្លើយថាគឺមនុស្សរស់ក្នុងពេលបច្ចុប្បន្ននេះឯង។ ក្មេងនោះក៏សួរតថា ការងារអ្វីដែលសំខាន់បំផុត?
បុរសនោះក៏ឆ្លើយថា វាជាការងារដែលឯងកំពុងតែធ្វើក្នុងពេលបច្ចុប្បន្ននេះឯង។ ពេលក្មេងហ្នឹងស្តាប់ចប់ហើយ បាននិយាយថា អស្ចារ្យមែន! បុរសនោះពិតជាឆ្លាត ហើយគាត់នៅរស់មានក្តីសុខពិតមែនគឺគាត់ចេះរស់នៅក្នុងបច្ចុប្បន្នដោយមិនខ្វាយខ្វល់នឹងរឿងអតីត និងអនាគតនោះទេ។ មនុស្សឆ្លាត មនុស្សមានសមត្ថភាព និងមនុស្សរស់ក្នុងភាពរីករាយ គឺគេប្រើជីវិតរស់ក្នុងពេលបច្ចុប្បន្នឱ្យអស់ពីសមត្ថភាពទៅតាមក្តីស្រមៃរបស់គេនោះឯង។
ចូរអ្នកធ្វើការគ្រប់គ្រងពេលបច្ចុប្បន្នដោយការយកចិត្តទុកដាក់ដោយប្រើជីវិតឱ្យមានក្តីសុខ ហើយជីវិតរបស់អ្នកនឹងដើរទៅអនាគតក៏ល្អដូចគ្នា។ តាមព្រះពុទ្ធបានសម្តែងថា អាថ៍កំបាំងនាំឱ្យចិត្តនិងកាយរបស់អ្នកមានសុខភាពល្អ អ្នកមិនត្រូវយំសោកចំពោះអតីតកាល ហើយកុំខ្វល់ខ្វាយច្រើនអំពីអនាគតកាលនោះទេ ប៉ុន្តែចូរអ្នករស់នៅក្នុងបច្ចុប្បន្នកាលដោយប្រាជ្ញា និងភាពស្មោះត្រង់៕ អត្ថបទដោយ៖ ទ្រ សុភាព