មានពាក្យមួយថា ការចិញ្ចឹមកូនឱ្យធំមិនពិបាកជាងបណ្តុះកូនឱ្យដើរតាមក្តីស្រមៃនោះទេ។ និយាយទៅ! ការចិញ្ចឹមល្អមានសមត្ថភាពគឺកីឡាករ Cristiano Ronaldo ហៅ CR7 បានចំណាយពេលច្រើននៅជាមួយកូននិងបង្ហាត់កូន។ សម្រាប់ CR7 មានក្តីលំបាកវេទនាតាំងពីក្មេង ទើបគាត់ខំប្រឹងមានលទ្ធផលអស្ចារ្យដូចសព្វថ្ងៃនេះ។ ប៉ុន្តែគាត់មានក្តីព្រួយបារម្ភធំមួយគឺថា ខ្លាចកូនគ្មានការខំប្រឹង ខ្វះចិត្តជាអ្នកប្រយុទ្ធលើទីលានវាលស្មៅបាល់ទាត់។ CR7 បាននាំកូនប្រុសឈ្មោះ Cristiano Jr ទៅមើលផ្ទះកាលខ្លួននៅក្រលំបាកជាពេលវេលាគ្រួសាររកព្រឹកខ្វះល្ងាច។
កីឡាករ CR7 បាននិយាយថា “ពេលកូនប្រុសខ្ញុំបានឃើញទីកន្លែងខ្ញុំរស់នៅកាលពីមុន កូនខ្ញុំមិនចង់ជឿទេថា ជីវិតរបស់ខ្ញុំធ្លាប់បានរស់នៅទីនេះ។ ខ្ញុំបានប្រាប់កូនថា នៅលើលោកនេះ គ្មានអ្វីបានមកដោយងាយស្រួលទេ មិនថាផ្ទះធំ ឡានទំនើប និងរបស់ជាច្រើនឯទៀត។ បើកូនចង់មានសមត្ថភាពខ្លាំងលើវិស័យបាល់ទាត់ កូនត្រូវគិតថា គ្រប់យ៉ាងមិនអាចធ្លាក់ពីលើមេឃដោយហ្រ្វីទេ”។ ហើយគាត់បានបន្តថា ទេពកោសល្យមិនអាចជួយឱ្យកូនជោគជ័យទេ កូនត្រូវតែខំប្រឹងបន្ថែម ខំឱ្យលើសគេ។ ទាំងអស់នេះជាអ្វីដែលខ្ញុំព្យាយាមចង់ឱ្យកូនបានដឹង”។
CR7 បណ្តុះក្តីស្រមៃកូនមិនត្រឹមតែនិយាយទេ គាត់បង្វឹកកូន Cristiano Jr ឱ្យទាត់បាល់តាំងពីតូច។ គាត់តែងតែឆ្លៀតពេលបាល់ជាមួយកូន លេងជាមួយកូន និយាយលើកទឹកចិត្តកូនពីបាល់ទាត់ និងជួលគ្រូមកបង្ហាត់កូនថែមទៀតនៅពេលគាត់មិនបាននៅជាមួយ។ ចំណុចសំខាន់ដែលCR7 បណ្តុះក្តីស្រមៃកូនគឺគាត់ធ្វើខ្លួនជាគំរូឱ្យកូនមើល។ គាត់ព្យាយាមហាត់រាល់ថ្ងៃដោយមានវិន័យត្រឹមត្រូវ រហូតកូនគាត់មានក្តីស្រមៃស្រឡាញ់បាល់ទាត់ដូចជាឪដែរ។ កូនប្រុស Cristiano Jr នៅអាយុ ១០ឆ្នាំមានសមត្ថភាពរកលុយបានជាង ១លានដុល្លារបាត់ទៅហើយ។
នៅត្រង់ចំណុចនេះដែរ បើឪពុកម្តាយបណ្តុះកូនតាមក្តីស្រមៃរបស់ខ្លួនហើយកូនមិនដើរតាមទេ អ្នកកុំបង្ខំកូនអី! គួរឱ្យកូនរៀនសម្រេចចិត្តដើរតាមក្តីស្រមៃដោយខ្លួនឯង។ ដើម្បីឱ្យកូនធំឡើងមានសមត្ថភាពចេះពឹងលើខ្លួនឯងហើយគ្មានសម្ពាធផ្លូវចិត្តនោះទេ៕ អត្ថបទដោយ៖ ទ្រ សុភាព