ទោះបីជាវីរុសអុតស្វា ហាក់បីដូចជាមិនមានការរាតត្បាតនៅក្នុងប្រទេសកម្ពុជា ប៉ុន្តែបើក្រឡេកទៅមើលក្រៅប្រទេសវិញ ករណីស្លាប់និងករណីឆ្លងវីរុសអុតស្វានេះបានកើនឡើងជាលំដាប់។ នៅត្រឹមថ្ងៃទី៣ ខែវិច្ឆិកា ឆ្នាំ២០២២នេះ CNA បានចុះផ្សាយឱ្យដឹងថា អង្គការសុខភាពពិភពលោកបានរកឃើញករណីស្លាប់ដល់ទៅ៣៦នាក់ និងករណីឆ្លងជាង៧៧,០០០នាក់មកហើយ។ អ្វីដែលគួរឱ្យបារម្ភ គេរកឃើញថា វីរុសអុតស្វានេះអាចឆ្លងពីមនុស្សម្នាក់ទៅមនុស្សម្នាក់ទៀតរហូតដល់ទៅ៤ថ្ងៃ មុនពេលដែលអ្នកជំងឺដឹងខ្លួន និងលេចចេញរោគសញ្ញា។

ការវិភាគទិន្នន័យដោយប្រើគំរូស្ថិតិពីរផ្សេងគ្នា អ្នកស្រាវជ្រាវបានរកឃើញថា អុតស្វានេះចំណាយពេលជាមធ្យម៨ថ្ងៃដើម្បីឱ្យរោគសញ្ញាលេចឡើងបន្ទាប់ពីអ្នកជំងឺបានឆ្លង។ លើសពីនេះ ការសិក្សាក៏បានរកឃើញថា ជាង៥០% ករណីឆ្លងវីរុសអុតស្វា បានបញ្ជូនពីមនុស្សម្នាក់ទៅមនុស្សម្នាក់ទៀត មុនពេលបុគ្គលនោះដឹងខ្លួន និងលេចចេញរោគសញ្ញាទៅទៀត។

សូមរម្លឹកផងដែរថា រោគសញ្ញាជំងឺអុតស្វាយរួមមានដូចជា  គ្រុនក្តៅ ឈឺសាច់ដុំ និងដំបៅស្បែកធំដូចដុំពុះជាដើម។

យ៉ាងណាមិញ ក្រុមអ្នកស្រាវជ្រាវមកពីទីភ្នាក់ងារសន្តិសុខសុខភាពចក្រភពអង់គ្លេសបានពិនិត្យមើលទិន្នន័យតាមដានកម្រងសំណួរតេស្តពីមនុស្សចំនួន ២,៧៤៦នាក់ដែលបានធ្វើតេស្តវិជ្ជមានជំងឺអុតស្វា នៅក្នុងប្រទេសចាប់ពីខែឧសភាដល់ខែសីហា កន្លងមកនេះ បានរកឃើញថាប្រហែល ៩៥%នៃអ្នកចូលរួមគឺជាបុរសដែលស្រឡាញ់បុរសដូចគ្នា និងរួមភេទជាមួយបុរសដូចគ្នា៕

អត្ថបទដោយ៖ កញ្ញា លីហួយ