សូម្បីតែអ្នកឧកញ៉ាគិត ម៉េង បានលើកឡើងថា យើងមានកិត្តិយសក្នុងការប្រកាសពីការដាក់ទុនវិនិយោគប្រមាណ៣០០លានដុល្លារអាម៉េរិក ដើម្បីសាងសង់មន្ទីរពេទ្យកម្ពុជាទូទៅដ៏ទំនើបក្នុងទីក្រុងភ្នំពេញ ដែលជាសក្ខីកម្មនៃចក្ខុវិស័យរួមរបស់យើង ដើម្បីអភិវឌ្ឍវិស័យសុខាភិបាលកម្ពុជាឲ្យកាន់តែរឹងមាំ។

 ហើយមន្ទីរពេទ្យនេះនឹងផ្តល់សេវាវេជ្ជសាស្ត្រដ៏ទូលំទូលាយ រួមមានសេវាវេជ្ជសាស្ត្រទូទៅ ការវះកាត់ ផ្នែកបេះដូងនិងសរសៃឈាម ផ្នែកជំងឺមហារីក សុខភាពស្រ្តី ផ្នែកជំងឺកុមារ ផ្នែកឆ្អឹងនិងសន្លាក់ និងសេវាវេជ្ជសាស្ត្រជាច្រើនផ្សេងទៀត។ ដើម្បីផ្តល់ការថែទាំសុខភាពតាមស្តង់ដាអន្តរជាតិនៅប្រទេសរបស់យើង និងកាត់បន្ថយឲ្យបានច្រើននូវតម្រូវការរបស់ប្រជាជនកម្ពុជាក្នុងការទៅព្យាបាលនៅក្រៅប្រទេស។ គំនិតផ្តួចផ្តើមនេះមិនមែនត្រឹមជាការកសាងមន្ទីរពេទ្យមួយនោះទេ វាជានិមិត្តរូបនៃការបោះជំហានទៅមុខយ៉ាងស្វាហាប់សម្រាប់អនាគតនៃការថែទាំសុខភាពរបស់ប្រទេសកម្ពុជា ដែលប្រជាជនអាចទទួលបានការព្យាបាលលំដាប់ស្តង់ដាអន្តរជាតិនៅក្នុងប្រទេសរបស់ខ្លួន៕