មនុស្សសព្វថ្ងៃមានចំនួនកើនអ្នកលើសគីឡូឬធាត់ច្រើន។ ព្រោះតែកង្វះលំហាត់ប្រាណ របរអាហារមិនត្រឹមត្រូវ និងស្រ្តេសចូលរួមផងដែរ។ ជាពិសេសមានឧបសគ្គធំមួយទៀតដែលធ្វើឱ្យមនុស្សខ្ចិលហើយពិបាកស្រកគីឡូគឺការធ្វើលំហាត់ប្រាណនេះឯង។ នេះជាក្បួនពិសេសឱ្យសម្រកគីឡូមិនចាំបាច់ហាត់ប្រាណច្រើននោះទេ។
១. កាត់ស្ករកាត់គីឡូ ៖ អាហារមានជាតិស្ករច្រើន ច្រើនតែធ្វើឱ្យអ្នកលើសគីឡូពីមួយថ្ងៃទៅមួយថ្ងៃ។ ដូចនេះអ្នកគួរតែរៀនមានចិត្តអត់ធ្មត់ខ្លះដើម្បីកាត់បន្ថយជាតិស្ករក្នុងរបបអាហារជាប្រចាំថ្ងៃដូចជា គ្រឿងកំប៉ុង បង្អែម នំខេក និងរបស់ណាមានជាតិស្ករច្រើនពេក គីឡូរបស់អ្នកនឹងស្រកត្រឹមតែរយៈពេល១អាទិត្យ។ សារធាតុជាតិផ្អែមៗ ឬស្ករច្រើនវាបង្កឱ្យកើតជាតិខ្លាញ់ក្នុងរាងកាយរបស់អ្នក។ កាត់ជាតិស្ករឱ្យអ្នកប្តូរមកហូបអាហារសាបម្តងបន្តិចៗ អ្នកនឹងស្រកគីឡូហើយ។
២. ទម្លាប់ហូបបន្លែនិងផ្លែឈើឲ្យច្រើនដើម្បីសម្រកគីឡូ៖ តាមបទសម្ភាសរបស់ខ្ញុំជាមួយគ្រូហាត់ប្រាណជាច្រើននាក់បានណែនាំស្រដៀងគ្នាដែរថា ចង់សម្រកគីឡូបានលឿននោះ ចូរអ្នកហូបបន្លែនិងផ្លែឈើឱ្យច្រើនគឺហូបបែបស្រស់ៗ វាល្អទាំងសុខភាពនិងអារម្មណ៍។ អ្នកអាចហូបបន្លែបែបស្លឹកបៃតងដូចជា សាឡាដ ផ្កាខាត់ណា ការ៉ុត និងបន្លែជាច្រើនទៀតដែលសម្បូរទៅដោយសារធាតុចិញ្ចឹមនិងជាតិសរសៃ។ សម្រាប់ផ្លែឈឈើវិញមានផ្លែប៉ោម ផ្លែប័រ និងផ្លែចេក... ចំពោះបន្លែនិងផ្លែឈើទាំងអស់នេះវាជួយអារម្មណ៍ឱ្យឆ្អែតបានយូរហើយវាមានកាឡូរីទាបឱ្យអ្នកស្រកគីឡូបានលឿន។
៣. ក្បួនសម្រកគីឡូ២០%និង៨០%៖ តាមអ្នកគ្រូ រ័ត្ន ពិសិដ្ឋដានី ជាគ្រូបង្វឹកផ្នែកដងខ្លួន ជាមួយនឹងលំហាត់ប្រាណ និងរបបអាហារត្រឹមត្រូវ បានប្រាប់ចាបបៃតងថា ប្រសិនបើខំហាត់ប្រាណតែមិនមានរបបអាហារត្រឹមត្រូវនោះការខិតខំប្រឹងប្រែងកន្លងមកក៏អាចទុកជាអាសាបង់ដូចគ្នា។ ដូច្នេះ អ្នកគួរទទួលយកវិធីសាស្ត្រហាត់ប្រាណ ២០% របបអាហារ៨០% ដោយក្នុងរបបអាហារ៨០% នេះ យើងបែងចែកចេញជា៤ធំៗបន្ថែមគឺ ២០%កាត់បន្ថយរបបអាហារកាឡូរីខ្ពស់ ២០%ការញ៉ាំទឹកឱ្យបានគ្រប់គ្រាន់ ២០%ការគេងឱ្យបានគ្រប់គ្រាន់ និង ២០%ចុងក្រោយកាត់បន្ថយរបស់ដែលសារជាតិផ្អែម ប្រៃ និងផ្អាប់”។ ពេលអ្នកសម្រេចចិត្តធ្វើតាមក្បួន២០%និង៨០%នេះ អ្នកនឹកសម្រកគីឡូមិនខានទេ។
ដូចនេះ រឿងទីមួយអ្នកគួរតែផ្លាស់ប្តូរមុនដើម្បីសម្រកគីឡូនោះ គឺសម្រេចចិត្តក្នុងការផ្លាស់ប្តូររបបអាហារ។ ទោះបីការផ្លាស់ប្តូររបបអាហារលំបាកមុនដំបូងវាធ្វើឱ្យអ្នកចេះតែឃ្លានក៏ដោយ អ្នកគួរតែខំអត់ធ្មត់និងខំប្រឹងជម្នះអារម្មណ៍ឃ្លាននេះត្រឹមតែមួយអាទិត្យ អ្នកនឹងឈ្នះអារម្មណ៍នេះបាន។ ហើយអ្នកគួរតែហាត់ប្រាណបន្ថែមខ្លះៗផង ដើម្បីឱ្យស្បែករបស់អ្នកតឹងណែនស្អាតស៊ីអារម្មណ៍ កុំឱ្យស្បែករបស់អ្នកធ្លាក់យារបើអ្នកមិនធ្វើលំហាត់ប្រាណទេនោះ៕ អត្ថបទដោយ៖ ទ្រសុភាព
អ្នកអាចទិញសៀវភៅ លំហូរចិត្ត តាមនេះ https://t.me/hangchhengH24
