១. ការពិនិត្យសុខភាពសុដន់ជាប្រចាំ៖ ការទៅពិនិត្យសុខភាពសុដន់ជាប្រចាំគឺជាជំហានដំបូងនៃការការពារ។ ស្ត្រីគួរតែពិនិត្យសុដន់ដោយខ្លួនឯងជារៀងរាល់ខែ ដើម្បីសង្កេតមើលថាមានការផ្លាស់ប្តូរណាមួយដូចជា ដុំពក ឬភាពរឹងនៅសុដន់ ដែរឬទេ។ ប្រសិនបើរកឃើញអ្វីមិនប្រក្រតី ត្រូវទៅពិនិត្យជាមួយគ្រូពេទ្យភ្លាមៗ។ បន្ថែមពីនេះ ស្ត្រីដែលមានអាយុលើសពី ៣៥ ឆ្នាំគួរតែធ្វើការថត Mammogram រៀងរាល់ ២ ទៅ ៣ ឆ្នាំម្តង ហើយធ្វើប្រចាំឆ្នាំនៅពេលអាយុលើសពី ៤០ ឆ្នាំ ប្រសិនបើអ្នកមានជំងឺមែននឹងអាចរកឃើញហើយព្យាបាលទាន់ពេលវេលា។ 

២. រក្សាទម្ងន់ឱ្យមានសុខភាពល្អ៖ ការលើសគីឡូរគឺជាកត្តាសំខាន់មួយដែលអាចបង្កើនហានិភ័យនៃជំងឺមហារីកសុដន់។ ការស្រាវជ្រាវជាច្រើនបង្ហាញថា ស្ត្រីអស់រដូវដែលមានជាតិខ្លាញ់ខ្ពស់នៅក្នុងរាងកាយ នឹងបន្តផលិតអរម៉ូនអ៊ឹស្ត្រូសែន ដែលអាចជំរុញឱ្យកោសិកាមហារីកលូតលាស់។ ដូច្នេះ ស្ត្រីគួរតែរក្សាទម្ងន់ឱ្យសមស្រប ដោយបរិភោគអាហារដែលមានប្រូតេអ៊ីនល្អ បន្ថយស្ករ និងកាបូអ៊ីដ្រាត ហើយហាត់ប្រាណជាប្រចាំ។

៣. របបអាហារដែលមានសុខភាពល្អ៖ អាហារមានតួនាទីសំខាន់ក្នុងការការពារជំងឺមហារីកសុដន់។ អ្នកគួរតែបរិភោគផ្លែឈើ បន្លែ និងគ្រាប់ធញ្ញជាតិដូចជាសណ្តែកសៀង ឬគ្រាប់ flax ដែលសម្បូរជាតិសរសៃធម្មជាតិ និងសារធាតុប្រឆាំងអុកស៊ីតកម្មឱ្យបានច្រើន។ សមាមាត្រអាហារដែលបានណែនាំ ២ ភាគគឺផ្លែឈើនិងបន្លែ ហើយ ១ ភាគជាសាច់។ ការផឹកតែបៃតង ឬតែខ្មៅក៏ជាជម្រើសល្អដែរ ដោយសារតែវាមានសារធាតុប្រឆាំងមហារីកជាច្រើន។ ប្រសិនបើអាចធ្វើបាន គួរជៀសវាងអាហារដែលមានជាតិខ្លាញ់ខ្ពស់ ឬអាហារដែលមានការកែច្នៃ។

៤. ធ្វើលំហាត់ប្រាណទៀងទាត់៖ លំហាត់ប្រាណមិនត្រឹមតែជួយឱ្យរាងកាយមានសុខភាពល្អទេ ប៉ុន្តែវាក៏ជួយកាត់បន្ថយហានិភ័យនៃជំងឺមហារីកសុដន់ផងដែរ។ ស្ត្រីគួរហាត់ប្រាណយ៉ាងតិច ៣០ នាទីក្នុងមួយថ្ងៃ ហើយការហាត់ប្រាណមិនចាំបាច់ទាល់តែទៅកន្លែងហាត់ប្រាណនោះទេ គ្រាន់តែដើរ ឬជិះកង់ធម្មតានោះក៏ជាការហាត់ប្រាណដែរ។ ការហាត់ប្រាណជួយធ្វើឱ្យប្រព័ន្ធប្រសាទ សរសៃឈាម និងអរម៉ូនសមតុល្យជាងមុន។

៥. ជៀសវាងសារធាតុពុល៖ សារធាតុពុលមួយចំនួនអាចបង្កើនហានិភ័យនៃជំងឺមហារីកសុដន់ ដូចជា ថ្នាំសម្លាប់សត្វល្អិតក្នុងអាហារ បារី និងគ្រឿងស្រវឹង។ ដូច្នេះ ស្ត្រីគួរជ្រើសរើសអាហារណាដែលស្អាត បន្លែស្រស់ដែលគ្មានសារធាតុគីមី និងបញ្ឈប់ទម្លាប់អាក្រក់ទាំងនេះ។ ការរស់នៅក្នុងបរិយាកាសស្អាត និងមានខ្យល់ចេញចូលល្អ ក៏ជួយឱ្យរាងកាយធូរស្បើយ ធន់នឹងជំងឺបានផងដែរ។

៦. បរិភោគអាហារបំប៉នវីតាមីន៖ អាហារបំប៉នជាច្រើនអាចជួយស្ត្រីរក្សាសុខភាពសុដន់។ វីតាមីន D, C និងវីតាមីនចម្រុះ ជួយបង្កើនប្រព័ន្ធភាពស៊ាំ។ ជាពិសេស សារធាតុកាល់ស្យូម D-glucarate ដែលមាននៅក្នុងបន្លែដូចជា ស្ពៃក្តោប ឬស្ពៃបារាំង អាចជួយកាត់បន្ថយហានិភ័យមហារីកសុដន់ ដោយជួយថ្លើមបំបាត់អរម៉ូនអ៊ឹស្ត្រូសែនលើស។ ទោះយ៉ាងណា មុនពេលប្រើអាហារបំប៉នណាមួយ គួរពិគ្រោះជាមួយគ្រូពេទ្យ ដើម្បីទទួលបានកម្រិតសមរម្យសម្រាប់រាងកាយរបស់អ្នក។

ដូច្នេះ ការការពារជាមុនពិតជាមានតម្លៃជាងការព្យាបាល។ ការរស់នៅដោយប្រកាន់យកទម្លាប់ល្អៗ ដូចជាការទទួលទានអាហារសម្បូរជីវជាតិ ការធ្វើលំហាត់ប្រាណ ជៀសវាងជាតិពុល និងការត្រួតពិនិត្យសុខភាពឱ្យបានជាប្រចាំ គឺជាវិធីដ៏មានប្រសិទ្ធភាពបំផុត ដើម្បីរក្សាឱ្យស្ត្រីទាំងឡាយអាចជៀសឆ្ងាយពីជំងឺមហារីកសុដន់ និងមានសុខភាពល្អរឹងមាំជារៀងរហូត៕

អត្ថបទដោយ៖ សារួ