គ្រប់គូស្វាមីភរិយាទាំងអស់ តែងតែមានគម្រងក្នុងការយកកូន ខ្លះចង់បានកូនប្រុស ខ្លះចង់បានកូនស្រី។ ទោះបីជាការកំណត់ភេទកូនមានការសិក្សាមិនសូវច្រើន ប៉ុន្តែក៏នៅតែមានអំណះអំណាងមួយចំនួន បានលើកឡើងថាអាចធ្វើការកំណត់យកភេទកូនប្រុសឬស្រីបាន មានភាគរយច្រើន ប្រសិនបើគូស្វាមីមានគម្រងច្បាស់លាស់។ ការកំណត់ភេទ គេអាចធ្វើបានដោយវិធីធម្មជាតិ និងសុប្បនិម្មិត។ ប្រសិនបើលោកអ្នកចង់កំណត់ភេទកូន ដោយធម្មជាតិតម្រូវការដៃគូទាំង២រៀបចំផែនការឱ្យបានមុនហោចណាស់រយៈពេល៣ខែ។

មុននឹងបង្កើតកូនបាន អ្នកត្រូវយល់ដឹងជាមុនសិន ជាទូទៅបុរសជាអ្នកកំណត់ភេទកូន ព្រោះស្ត្រីមានក្រូម៉ូសូមXនិងX ហើយបុរសមានក្រូម៉ូសូម Xនិង Y ប្រសិនចង់បានកូនត្រូវរងចាំស្ត្រីធ្លាក់ស៊ុតបង្កកំណើតជាមុនសិន។ នៅពេលដែលមេជីវិតX ជួបជាមួយនឹងមេជីវិតX នោះអ្នកនឹងទទួលបានកូនស្រី។ ផ្ទុយទៅវិញទៅពេលដែលមេជីវិតY ជួបជាមួយមេជីវិត X បានមុន នោះអ្នកនឹងទទួលបានកូនប្រុស បើផ្អែកតាមការចែករំលែករបស់គេហទ័រ huggies។

វីធីដែលអាចកំណត់ភេទកូនបាន គេបានបែងចែកជា៤វិធីរួមមាន៖

១ ពេលវេលាក្នុងការរួមភេទ៖ ដើម្បីកំណត់ភេទត្បិតតែវាមិនអាចជាក់លាក់សម្រេចបាន១០០ភាគរយ ប៉ុន្តែវាអាចបង្កើតឱកាសកំណត់យកភេទប្រុសឬស្រ្តីបាន បើផ្អែកតាមលោកវេជ្ជបណ្ឌិត Landrum Shettles ដែលជាអ្នកស្រាវជ្រាវពីមេជីវិត ក្នុងទស្សវត្តន៍១៩៦០។ យុទ្ធសាស្ត្រលោកវេជ្ជបណ្ឌិតបានបែងចែកដូចខាងក្រោម៖

-     ចង់បានកូនស្រី ត្រូវរួមភេទមុនពី ២.៥ទៅ៤ថ្ងៃ មុនពេលស្ត្រីធ្លាក់មេជីវិត។ ព្រោះមេជីវិតX មានកម្លាំងខ្លាំងជាង ស៊ូជាង និងរស់នៅបានយូរជាង មេជីវិតYរបស់បុរស។ មេជីវិតY ត្បិតតែវារត់លឿនជាង ប៉ុន្តែវាខ្សោយនឹងឆាប់ស្លាប់មុន ហេតុនេះ ការរួមភេទមុនថ្ងៃស្ត្រីធ្លាប់មេជីវិត ដើម្បីឱ្យមេជីវិតXរបស់បុរសទៅរងចាំមេជីវិតXរបស់ស្ត្រី មុនអាចបង្កើនឱកាសមានកូនស្រីបានច្រើន។

-     ចង់បានកូនប្រុសត្រូវ រួមភេទឱ្យចំថ្ងៃស្ត្រីធ្លាក់មេជីវិត។ មេជីវិតY រត់បានលឿនជាង មេជីវិតX ហេតុនេះការរួមភេទនៅថ្ងៃដែលស្រ្តីធ្លាក់មេជីវិត វានឹងបង្កើនឱកាសក្នុងការឱ្យYជួបជាមួយXបានមុន ដែលងាយនឹងបង្កើតបានកូនប្រុស។

ចំណាំ៖ ជាធម្មតាស្រ្តីតែងធ្លាប់មេជីវិតក្នុងថ្ងៃទី១៤ បន្ទាប់ពីមករដូវ។ ឧទាហរណ៍ បើស្ត្រីមករដូវថ្ងៃទី១ នោះគាត់នឹងធ្លាក់មេជីវិតនៅថ្ងៃទី១៤។ បើគាត់មករដូវថ្ងៃទី៥ នោះមេជីវិតនឹងធ្លាក់នៅថ្ងៃទី១៨។ ដោយសារស្ត្រីតែងមករដូវមិនទៀងទាត់ ហេតុនេះវីធីមួយទៀត គេអាចដឹងថ្ងៃធ្លាក់មេជីវិតបានតាមរយៈឧបករណ៍តេស្តមេជីវិតដែលអាចរកទិញតាមឱសថស្ថាននានាបាន(អាចសួររបៀបប្រើពីពួកគាត់)។

២ ទម្រង់នៅក្នុងការរួមភេទ៖ ផ្អែកតាមប្រភពដដែល គេបានណែនាំថា ដោយសារតែមេជីវិតYរត់បានលឿនជាង ហេតុប្រសិនបើអ្នកចង់បានកូនប្រុសគួររើសទម្រង់រួមភេទដែលអាចបាញ់បញ្ចូលមេជីវិតចូលជ្រៅ។ ផ្ទុះទៅវិញ បើចង់បានកូនស្រី គួររើសយកទម្រង់រួមភេទដែល បាញ់បញ្ចូលមេជីវិតរាក់ៗ ដែលវាផ្ដល់អាទិភាពឱ្យមេជីវិតX បានជួបX ភាគរយច្រើនជាង។

៣ រៀបចំមជ្ឈដ្ឋានទ្វារមាស៖ រួមភេទ នៅពេលមុនធ្លាក់មេជីវិត ទ្វារមាសរបស់ស្ត្រីនឹងមានស្ថានភាពស្ងួតដែលហៅថាអាស៊ីត ជាតិជូរច្រើន ហេតុនេះវានឹងសម្លាប់មេជីវិតឈ្មោលY ច្រើន​ ដែលមានន័យថាសម្របសម្រួលមេជីវិតX បានជួបX បានច្រើនជាង បង្កើនឱកាសមានកូនស្រី។ ផ្ទុយទៅវិញ ការរួមភេទចំថ្ងៃធ្លាប់មេជីវិត ទ្វារមាសស្ត្រីនឹងមានរំអិល ឬសើមដែលហៅថាបាស វានឹងសម្របសម្រួលឱ្យមេជីវិតឈ្មោលY ចូលទៅជួបមេជីវិតXបានមុន បង្កើនឱកាសមានកូនប្រុស។ នេះបើផ្អែកតាមប្រភព huggies។  

៤ កត្តាចំណីអាហារ ៖ ត្រូវតែអនុវត្តទាំងបុរសនិងស្ត្រី។

-     សម្រាប់កូនស្រី ដៃគូទាំងសងខាង គួរទទួលទានត្រូវទទួលទានអាហារឱ្យម៉ាញេស្យូមច្រើន បន្លែ ផ្លៃឈើ ត្រី សាច់តិចតួច ហើយទទួលទានអាហាររសជាតិសាប។

-     សម្រាប់កូនប្រុស គួរទទួលទានអាហារសម្បូរជាតិប៉ូតាស្យូម ទទួលទានសាច់ឱ្យបានច្រើន និងអាហាររសជាតិប្រៃបន្តិច។

ជាថ្មីម្ដងទៀតការកំណត់ភេទកូននេះ ទារទាមឱ្យមានកំណត់ផែនការឱ្យបានច្បាស់លាស់រយៈហោចណាស់២ទៅ៣ខែមុន មិនមែនអនុវត្តភ្លាមអាចមានកូនបានភ្លាមនោះទេ។ មួយវិញទៀតគូស្វាមីភរិយាប្រសិន បើចង់កំណត់យកភេទកូន អាចស្វែងរកការប្រឹក្សាណែនាំបន្ថែមជាមួយគ្រូពេទ្យជំនាញ ព្រមទាំងគួរតែពិនិត្យសុខភាពជាមុន មុនសម្រេចចិត្តយកកូនចៀសវាងសុខភាពឳពុកម្ដាយមិនល្អ អាចប៉ះពាល់ដល់សុខភាពរបស់កូន ដោយប្រការណាមួយ៕

ប្រភពបន្ថែម ៖ medicalnewstoday

អត្ថបទដោយ៖ Senghong