បើឪពុកម្តាយមិនសូវខ្វល់ខ្វាយពីទម្លាប់កូនចាយលុយនោះទេដោយគិតថា កូនធំឡើងកូនចេះចាយលុយ និងចេះរកលុយដោយខ្លួនឯងហើយ។ នេះជាបញ្ហារបស់កូនពេលធំឡើងខំរកលុយបានច្រើនប៉ុន្មានក៏នៅតែខ្វះលុយដែរ។ ព្រោះតែទម្លាប់ចាយធំហួសមាឌគឺគ្មានសល់លុយនោះទេ។ នៅខាងក្រោមនេះជាមេរៀនមួយមានតម្លៃដែលឪពុកម្តាយគួរបង្រៀនកូនឱ្យធំឡើងក្លាយជាក្មេងចេះសន្សំលុយ។
តាមលោក Robert T. KiyosaKi បញ្ជាក់ប្រាប់ថា មានមនុស្សភាគច្រើនបានធ្វើបាបខ្លួនឯងដោយឱ្យលុយក្លាយជាម្ចាស់ មកពីគេខ្វះភាពឆ្លាតវៃផ្នែកចំណេះដឹងហិរញ្ញវត្ថុនេះឯង”។ នេះជាការបញ្ជាក់ថា បង្រៀនកូនចេះចាយលុយ ចេះរកលុយពីតូចឱ្យហើយធំឡើងគេមិនក្រ ឬមិនខ្វះនោះទេ។ លោក Carlos Tevez ជាកីឡាករបាល់ទាត់អាហ្សង់ទីន មានថ្ងៃមួយ មានកូនស្រីច្បងរបស់គាត់បានសុំលុយខ្ញុំទិញឡាន ១គ្រឿងដើម្បីបើករបរដោយខ្លួនឯងហើយជូនប្អូនស្រីទៅរៀន។ គាត់បានប្រាប់ថា បើកូនចង់បានឡាន កូនត្រូវចេះសន្សំលុយដើម្បីទិញវាដោយខ្លួនឯង។
កូនស្រីឆ្លើយថា ប៉ាជា Carlos Tevez (កាលហ្នឹងគាត់មានលុយខ្ទង់ ២០លានដុល្លារ) ហេតុអីមិនព្រមទិញឡានឱ្យកូនមួយចឹង? គាត់បាននិយាយថា ប៉ាមិនខ្វល់ថាកូនត្រូវទៅធ្វើជាអ្នកបំរើនៅ McDonald ឬកន្លែងណាទេ កូនត្រូវឆ្លងកាត់បទពិសោធន៍សិនដើម្បីបានលុយដូចជាប៉ាដែរណាកូន។ កូនដឹងទេ! ប៉ាមានមានឡានជិះលើកដំបូងនៅអាយុ២១ឆ្នាំ តែប៉ាខំរកលុយទិញវាបានដោយខ្លួនឯង។ មានរឿងមួយទៀតកូនគួរតែដឹងដែរថា មុននឹងប៉ាទិញឡានមួយគ្រឿងកាលណោះ ប៉ាបានទិញផ្ទះមួយជូនយាយតាកូនហើយ។ ប៉ាខំធ្វើការណាស់ដើម្បីសម្រេចបានលទ្ធផលទាំងអស់នេះ។ កូនត្រូវតែរៀនរកលុយដើម្បីស្គាល់ពីតម្លៃលុយ បានអនាគតកូនមិនលំបាកណា!
នេះជាវិធីឪពុកម្តាយត្រូវចិញ្ចឹមកូនឱ្យស្គាល់ពីតម្លៃលុយ និងការងារផងដែរ។ ពេលអ្នកបង្រៀនកូនពីរបៀបចាយលុយ ធ្វើឱ្យកូនស្គាល់ពីតម្លៃលុយ កុំឱ្យកូនមានទម្លាប់ចាយលុយខ្ជះខ្ជាយ។ ទម្លាប់ល្អត្រង់់នេះថា ពេលឪពុកម្តាយបង្រៀនកូនឱ្យចេះសន្សំលុយពីតូច ពេលកូនអ្នកធំឡើងនោះ កូននឹងចេះគិតគូដោយខ្លួនឯងលើការចាយលុយហើយ៕ អត្ថបទដោយ៖ ទ្រ សុភាព