ជឿថាបងប្អូនប្រាកដជាធ្លាប់បានដឹងហើយថា ការញ៉ាំបាយ គឺអាចធ្វើឱ្យយើងឡើងគីឡូបានដោយមិនដឹងខ្លួន ព្រោះបាយសម្បូរទៅដោយជាតិកាឡូរី និងកាបូនអ៊ីដ្រាត។ ប៉ុន្តែបងប្អូនមានដឹងឬអត់ តើយើងគួរញ៉ាំបាយតាមវិធីបែបណាដើម្បីកុំឱ្យឡើងគីឡូ? ចង់ដឹងច្បាស់តោះអានអត្ថបទខាងក្រោម។
យោងតាមប្រភពដែលបានចុះផ្សាយដោយគេហទំព័រ food.ndtv បាននិយាយថា តិចនិកក្នុងការញ៉ាំបាយដើម្បីកុំឱ្យឡើងគីឡូ ទីមួយគឺយើងត្រូវចេះជ្រើសរើសប្រភេទអង្ករ។ អង្កដែលល្អ យើងអាចយកមកចម្អិនញ៉ាំបាន និងមិនធ្វើឱ្យឡើងគីឡូមាន ៣ប្រភេទគឺ អង្ករសំរូប អង្ករក្រហម និងអង្ករខ្មៅ។
១.អង្ករសំរូប៖ ជាប្រភេទអង្ករដែលសម្រាប់ញ៉ាំក្នុងគោលបំណងសម្រកទម្ងន់ និងមិនធ្វើឱ្យឡើងគីឡូ។ ព្រោះវាសម្បូរទៅដោយជាតិសរសៃអាហារ ដែលជួយបង្កើន ការរំលាយអាហាររបស់អ្នកបានលឿន។ អង្ករសំរូប ១០០ ក្រាមមានកម្រិតកាឡូរីប្រហែល ១១១ ប៉ុណ្ណោះ ខុសពីអង្ករសធម្មតា ១០០ក្រាម មានកម្រិតកាឡូរីរហូតដល់ ១៥០។
២.អង្ករក្រហម៖ អង្ករក្រហម វាសម្បូរទៅដោយសារធាតុប្រឆាំងអុកស៊ីតកម្មហៅថា anthocyanin ។ សារធាតុនេះត្រូវបានគេរកឃើញថាវា អាចជួយក្នុងការគ្រប់គ្រងទម្ងន់របស់យើងឱ្យនៅថេរបាន។ លើសពីនេះទៀត អង្ករក្រហម ជួយពង្រឹងការរំលាយអាហាររបស់ឱ្យកាន់តែរហ័សផងដែរ។
៣.អង្ករខ្មៅ៖ អង្ករពណ៌រាងក្រម៉ៅនេះ ត្រូវបានគេរកឃើញថាវាសម្បូរសារធាតុប្រឆាំងអុកស៊ីតកម្មច្រើន។ អង្ករខ្មៅ ឬគេហៅថាអង្ករព្រៃនេះវាផ្ទុកជាមួយសារធាតុមួយចំនួនដូចជា វីតាមីន B6 ស័ង្កសី ផូស្វ័រ និងនីយ៉ាស៊ីន ដែលមាននាទីធ្វើឱ្យប្រព័ន្ធរំលាយអាហារដំណើរការបានស្រួល និងមានកម្រិតកាឡូរីទាប។
ទន្ទឹមនឹងនេះដែរ បន្ទាប់ពីអ្នកដឹងតិចនិកក្នុងការជ្រើសរើសអង្ករហើយ អ្នកត្រូវដឹងពីក្បួនក្នុងការចម្អិន និងរបៀបនៃការញ៉ាំឱ្យបានត្រឹមត្រូវផងដែរ។ ចំពោះការចម្អិន អ្នកត្រូវយកអង្ករ ក្នុងបរិមាណសមសបមួយដែលអ្នកធ្លាប់ញ៉ាំ ទៅត្រាំក្នុងទឹករយៈពេល ១-២ នាទី រួចយកមកលាងទឹក ៣-៤ ដងដើម្បីឱ្យជ្រះម្សៅរបស់អង្ករ ។ នៅពេលដាន់ចម្អិន អ្នកត្រូវដាក់ទឹកឱ្យច្រើន ដើម្បីឱ្យកម្រិតម្សៅថយចុះយកាន់តែតិច។ បើអាចអ្នកគួរចម្អិនបានជាមួយទឹកដូង ព្រោះទឹកដូងមានសមត្ថភាពកាត់ជាតិម្សៅរបស់អង្ករបានល្អជាងទឹកស។ គន្លឹះចុងក្រោយគឺការញ៉ាំ អ្នកគួរតែមានបន្លែញ៉ាំជាមួយដូចជា សាឡាដ ម្ទេសប្លោក ឬបន្លែដែលអ្នកចូលចិត្ត៕