មានឪពុកម្តាយភាគច្រើនចិញ្ចឹមកូនគិតលើការលូតលាស់រាងកាយ ប៉ុន្តែខ្វះការយកចិត្តទុកដាក់ទៅលើខួរក្បាលនិងផ្លូវចិត្តកូនរបស់ខ្លួន។ ពេលកូនធំឡើង គេធំតែរាងកាយ ចំណែកចិត្តគំនិតបែរជាខ្វះជំនឿចិត្ត ខ្វះភាពក្លាហាន និងខ្វះការខំប្រឹងប្រែងតាំងពីនៅក្មេងមកម្ល៉េះ។ និយាយឱ្យខ្លីគឺថា លូតលាស់រាងកាយ តែខ្វះការអប់រំចិត្តគំនិតជាកត្តាធំមួយអាចឱ្យកូនពិការអនាគតក៏ថាបានដែរ។ ជាដំណោះស្រាយល្អបំផុតសម្រាប់ឪពុកម្តាយបណ្តុះពន្លឺអនាគតក្នុងខួរក្បាលលកូនតាំងពីតូចឱ្យហើយគឺបណ្តុះទម្លាប់អានសៀវភៅ។
ទោះបីសម័យនេះ ការអានជារឿងធម្មតា ជារឿងសាមញ្ញចំពោះឪពុកម្តាយមួយចំនួនក៏ពិតមែន តែវាជារឿងសំខាន់បំផុតក្នុងជីវិតនិងអនាគតកូនជារឿងមិនខ្វះបានឡើយ។ ការអានជាការកំណត់វាសនាកូនដែរ។
លោក Bill Gates ជាបុគ្គលមានខួរក្បាលខ្លាំងអាចដឹកនាំក្រុមហ៊ុន Microsoft បានព្រោះគាត់មានទម្លាប់ពិសេសមួយជាទម្លាប់អានសៀវភៅតាំងពីក្មេងជាទម្លាប់បណ្តុះបណ្តាលឡើងដោយលោកស្រីជាម្តាយ Mary Maxwell Gates និងលោកជាឪពុក William H. Gates។ ពួកគាត់យល់ឃើញថា សៀវភៅនឹងជួយអប់រំខួរក្បាលកូនគាត់ឱ្យចេះគិត ចេះពឹងលើខ្លួនមានអនាគតដោយមិនចាំបាច់មានឪពុកម្តាយនោះទេ។ នេះជាហើយជាការបញ្ជាក់ថា លោក Bill Gates ជាក្មេងម្នាក់ខំប្រឹងបង្កើតក្រុមហ៊ុន Microsoft ត្រឹមអាយុ ២០ឆ្នាំជាមួយលោក Paul Allen។
ថ្មីៗ នេះលោក Gates បានបង្ហោះសារជាគំនិតមួយលើ LinkedIn ដោយសរសេរថា ដំបូន្មានរបស់ខ្ញុំសាមញ្ញទេគឺថា ចូរអានឱ្យបានច្រើន ហើយស្វែងរកជំនាញដែលអ្នកពេញចិត្ត ដើម្បីរៀនពីគាត់ ទើបអ្នកមានសមត្ថភាពពូកែមានឥទ្ធិពលលើអនាគត។ លោកបានបន្តថា ការអានសៀវភៅបានបង្រៀនឱ្យខ្ញុំចេះរឿងថ្មីៗ ហើយអាចគិតឃើញនៅអ្វីដែលប្លែកៗ ពីគេ។ ហើយនៅក្នុងជីវិតរបស់ខ្ញុំ ខ្ញុំពិតជាមានសំណាងណាស់ដែលមានឪពុកម្តាយចាំជួយលើកទឹកចិត្តខ្ញុំឱ្យអានគ្រប់ពេល។ ព្រោះការអានជាកត្តាជម្រុញឱ្យខួរក្បាលខ្ញុំយល់ដឹងអំពីពិភពលោកមួយនេះ។ ខ្ញុំគិតថា កត្តាអានជាកម្លាំងចលកររុញជីវិតរបស់ខ្ញុំឆ្ពោះទៅកាន់អនាគតក្នុងមុខជំនួញ និងការងាររបស់ខ្ញុំឱ្យមានលទ្ធផលអស្ចារ្យ។ ឥឡូវនេះ! ការអានសៀវភៅជាមូលដ្ឋានគ្រឹះក្នុងជីវិតរបស់ខ្ញុំយ៉ាងរឹងមាំ។
វាគ្មានអ្វីចម្លែកនោះទេថា លោក Gates មានសមត្ថភាពនិងខួរក្បាលអស្ចារ្យដែលធ្វើឱ្យជីវិតគាត់មិនចេះជាប់គាំង និងបាក់ស្បាត់ពេលមានបញ្ហាធំៗ នៅក្នុងជីវិតមុខជំនួញនោះទេ មកពីខួរក្បាលគាត់មិនជាប់គាំងនោះឯង។ គាត់ដាក់ប្រេងមាស៊ីនរហូតកុំឱ្យខួរក្បាលគាំងគឺបញ្ចូលចំណេះដឹងតាមរយៈការអានជាប្រចាំថ្ងៃទើបគាត់មានទិន្នន័យល្អៗ សម្រាប់គិតដើម្បីបំបែកបញ្ហា ឱ្យជីវិតនិងការងាររលូនទៅមុខជានិច្ច។ នេះជាការបញ្ជាក់ថា ពេលកូនស្រឡាញ់សៀវភៅ ស្រឡាញ់ការអានពីក្មេងហើយនោះ កូនរបស់អ្នកនឹងចេះអប់រំខ្លួនឯងដោយខ្លួនឯង។
បើនិយាយពីអានវិញ គាត់អាននៅគ្រប់ទីកន្លែងដែលអាចអានបានដូចជា កន្លែងធ្វើការ អានតាមឡាន និងមុនចូលគេងមួយម៉ោងគាត់អាន ដើម្បីគេងលក់ស្រួល។ តាមអ្នកវិទ្យាសាស្រ្តក៏ទទួលស្គាល់ថា ការអានជាវិធីបណ្តុះខួរក្បាលឱ្យមានសម្បូរគំនិតច្នៃប្រឌិតល្អៗ និងខួរក្បាលរីករាយផងដែរ។ លោក Bill Gates អានសៀវភៅប្រហែល ៥០ក្បាលជាងក្នុងមួយឆ្នាំ។ គាត់តែងនិយាយថា ខ្ញុំចំណាយពេលអានច្រើនណាស់ វាមិនខាតតម្លៃជីវិតរបស់ខ្ញុំនោះទេ។
ឪពុកម្តាយត្រូវចាំគំនិតមួយនេះថា អ្នកគ្មានពេលអប់រំកូនអស់មួយជីវិតទេ ប៉ុន្តែមានផ្លូវមួយ អ្នកអាចអប់រំកូនអស់មួយជីវិត ទោះបីគ្មានវត្តមានរូបអ្នកក៏ដោយ គឺបណ្តុះទម្លាប់កូនឱ្យអានសៀវភៅតាំងពីតូចនេះឯង។ ពេលកូនអ្នកអានសៀវភៅជាប្រចាំថ្ងៃនោះ សៀវភៅនេះជាចំណេះដឹង ជាអ្នកអប់រំកូនលោកអ្នកឱ្យចេះគិត ចេះប្រើខួរក្បាលដើម្បីបណ្តុះអនាគតដោយខ្លួនឯងយ៉ាងរឹងមាំជាមិនខានឡើយ៕ អត្ថបទដោយ៖ ទ្រ សុភាព