គណិតវិទូ Terence Tao បានកើតនៅថ្ងៃទី១៧ ខែកក្កដា ឆ្នាំ១៩៧៥ ក្នុងគ្រួសារអ្នកមានចំណោះដឹងខ្ពស់ ដែលមានឪពុកជាវេជ្ជបណ្ឌិត និងម្ដាយជាគ្រូបង្រៀន។ គាត់មានសញ្ជាតិអូស្ត្រាលី-អាមេរិក ខណៈឪពុកម្ដាយរបស់គាត់បានធ្វើចំណាកស្រុកពីទីក្រុងហុងកុង ចូលប្រទេសអូស្ត្រាលី។ ឪពុកម្ដាយរបស់គាត់ បានសង្កេតឃើញពីសមត្ថភាពពិសេសរបស់គាត់ទាំងការអានអក្សរនិងគិតលេខ នៅពេលគាត់មានអាយុត្រឹមតែ២ឆ្នាំ។ កាលនោះដែរ គាត់មិនត្រូវបានបង្រៀនដោយនរណាម្នាក់ឡើយ តែគាត់បានរៀនសូត្រដោយខ្លួនឯងតាមរយៈការមើលកម្មវិធីទូរទស្សន៍។

ប្រភពព័ត៌មាន New York Times បានឱ្យដឹងដែរថា ទោះបីជាដឹងថាគាត់ជាក្មេងមានទេពកោសល្យក៏ដោយ ក៏ឪពុកម្ដាយរបស់គាត់មិនបានបង្ខំឱ្យគាត់ចូលរៀនឆាប់នោះទេ។ តែដោយសារគាត់មានការយល់ដឹងលឿនខុសពីក្មេងដទៃពេក ទើបធ្វើឱ្យនៅពេលអាយុ៩ឆ្នាំ គាត់បានចាប់ផ្ដើមចូលរៀនថ្នាក់មហាវិទ្យាល័យ។ ទន្ទឹមនឹងនោះ គាត់ទទួលបានពិន្ទុ៧៦០/៨០០ លើការប្រលង SAT គណិតវិទ្យា។ នៅអាយុ១០ឆ្នាំ គាត់បានឈ្នះមេដាយសំរឹទ្ធនៅអូឡាំពិកគណិតវិទ្យាអន្តរជាតិ។ លុះ១ឆ្នាំបន្ទាប់ គាត់បានឈ្នះមេដាយប្រាក់ និងនៅអាយុ១៣ឆ្នាំ គាត់ជាបេក្ខភាពវ័យក្មេងបំផុតក្នុងប្រវត្តិសាស្ត្រ ដែលឈ្នះមេដាយមាស។

បន្ទាប់ពីការឈ្នះមេដាយអូឡាំពិក គាត់បានក្លាយជានិស្សិតនៅសកលវិទ្យាល័យ Flinders ក្នុងអាយុទើប១៤ឆ្នាំ ហើយបានបញ្ចប់ការសិក្សាដោយកិត្តិយស បន្ទាប់ពីសិក្សាបានរយៈពេល២ឆ្នាំ។ គិតត្រឹមឆ្នាំ ២០១៦ គាត់បានបោះពុម្ពជាង 300 អត្ថបទ និងសៀវភៅចំនួន ១៧ ក្បាលដែលមានតម្លៃដល់សហគមន៍សិក្សា។ យ៉ាងណាមិញ គាត់បានរៀបការជាមួយប្រពន្ធ Laura Tao ដែលជាវិស្វករអគ្គិសនីនៅមន្ទីរពិសោធន៍ Jet Propulsion របស់ NASA និងមានកូនប្រុសស្រីចំនួន០២នាក់។ សព្វថ្ងៃនេះ គាត់ជាសាស្រ្តាចារ្យផ្នែកគណិតវិទ្យានៅសាកលវិទ្យាល័យ University of California ស្របពេលមានមនុស្សជាច្រើនធ្វើបានកោតសរសើរគាត់ចំពោះជីវិតដ៏ជោគជ័យរបស់គាត់៕