១. កុំរំលងឡេការពារកម្តៅថ្ងៃ៖ ការការពារកម្តៅថ្ងៃគឺជាជំហានសំខាន់មិនអាចខ្វះបាន។ មិនថានៅកន្លែងត្រជាក់ ឬនៅក្នុងផ្ទះក៏ដោយស្បែករបស់អ្នកនៅតែអាចរងការប៉ះពាល់ពីពន្លឺ UVA និង UVB  ពេលខ្លះពន្លឺព្រះអាទិត្យចាំងចូលតាមបង្អួច សូម្បីពន្លឺចេញពីអេក្រង់ទូរស័ព្ទក៏អាចធ្វើឱ្យស្បែករងការខូចខាតបានដូចគ្នា។ ដូច្នេះឡេការពារកម្ដៅត្រូវតែលាបជាប្រចាំថ្ងៃ ហើយអាចលាបមួយថ្ងៃ ២ ដងប្រសិនបើអ្នកនៅក្រោមកម្ដៅថ្ងៃខ្លាំង ព្រោះបើអ្នកមើលរំលងឡេការពារកម្ដៅថ្ងៃហើយ ទោះអ្នកប្រើផលិតផលផ្សេងក៏គ្មានប្រយោជន៍ដែរ។ 

២. កុំញិចមុន ឬយកដៃប៉ះស្បែកមុខញឹកញាប់ពេក៖ ក្នុងមួយថ្ងៃៗដៃរបស់យើងប៉៉ះពាល់របស់់ច្រើនណាស់  បាក់តេរី និងកម្ទេចកម្ទីធូលីដី ក៏ទំនងជាមានច្រើនដូចគ្នា ដូច្នេះនៅពេលដែលយើងយកដៃផ្ទាល់មកញិចមុន ឬប៉ះពាល់ស្បែកញឹកញាប់ពេកធ្វើឱ្យបាក់តេរីទាំងអស់នោះតោងជាប់នៅលើស្បែក អាចបង្កឱ្យស្ទះរុន្ធញើស ឡើងមុនលើសដើម និងធ្វើឱ្យស្បែកងាយរលាក។ ជម្រើសល្អ អ្នកមានមុនគួរទៅរកអ្នកជំនាញដើម្បីរកផលិតផលដែលត្រូវជាមួយស្បែកសម្រាប់ព្យាបាលឱ្យបានត្រឹមត្រូវ ការប្រើដៃញិចមុនមិនត្រឹមតែធ្វើឱ្យមុនឆ្លងទៅតំបន់ផ្សេងទេ ប៉ុន្តែថែមទាំងបង្កឱ្យស្បែកខូចជាងមុនផងដែរ។

៣. លាងមុខកុំប្រើកម្លាំងខ្លាំងៗពេក៖ ច្រឡំអីច្រឡំបាន តែកុំច្រឡំថា ការដុសខ្លាំងៗជួយសម្អាតស្បែកបានជ្រៅ និងធ្វើឱ្យស្បែកភ្លឺថ្លា។ ព្រោះការពិត ធ្វើបែបនេះនឹងអាចបង្កឱ្យមានរបួស ធ្វើឱ្យរបាំងការពារស្បែកចុះខ្សោយ ធ្វើឱ្យស្បែកស្ងួត និងកើតក្រហម ជាដើម។ ការលាងមុខប្រចាំថ្ងៃ ត្រូវជ្រើសរើសសាប៊ូដែលត្រូវជាមួយស្បែក ដាក់សាប៊ូនៅលើដៃត្រដុសឱ្យមានពពុះ រួចចាំយកទៅញីលើស្បែកមុខថ្នមៗ។ ស្បែកមនុស្សយើងមិនត្រូវការត្រដុសខ្លាំងពេកទេ វាត្រូវការភាពទន់ភ្លន់ ដែលអាចឱ្យវាមានឱកាសស្ដារខ្លួនឡើងវិញ និងរក្សាសំណើមបានល្អជាងមុន។ 

៤. កុំប្រើផលិតផលច្រើនប្រភេទពេក៖ ការប្រើប្រាស់ផលិតផលច្រើនប្រភេទមិនបានជួយអ្វីឡើយ ផ្ទុយមកវិញវាបែរជាធ្វើឱ្យស្បែកពិបាកទទួលយកសារធាតុដែលត្រូវជាមួយវា និងធ្វើឱ្យឆាប់រលាក។ ស្បែកត្រូវការភាពសាមញ្ញ និងការថែទាំមួយដែលថេរជាមួយផលិតផលតិច ប៉ុន្តែមើលឃើញប្រសិទ្ធភាពពិត។ 

ចង់ឱ្យស្បែកស្អាត មិនបាច់ធ្វើអ្វីច្រើនទេ ត្រឹមសម្អាតមុខឱ្យបានត្រឹមត្រូវ ផ្ដល់សំណើមដល់ស្បែក និងលាបឡេការពារកម្ដៅថ្ងៃឱ្យបានជាប្រចាំ ជាមួយនឹងការជៀសវាងទម្លាប់ទាំង ៤ខាងលើនេះ អ្នកក៏អាចរក្សាស្បែកឱ្យសុខភាពល្អ និងមើលទៅក្មេងជាងវ័យបាន៕

អត្ថបទដោយ៖ សារួ