អ្នកឧកញ៉ាបានបន្តថា ថ្ងៃក្រោយពេលក្មេងនោះធំឡើង អ្វីក៏មិនចេះ អ្វីក៏មិនហ៊ានធ្វើហើយគ្មានភាពក្លាហានថែមទៀត។ បែបហ្នឹងធ្វើឱ្យក្មេងខ្លាចរអា សុញគំនិត ឈឺចាប់ តូចចិត្ត អស់សង្ឃឹម និងលែងចង់ធ្វើអ្វីៗទាំងអស់។ ព្រោះតែកុមារភាពធ្លាប់បាក់ស្បាតបែបនេះឯង”។

ហើយមានឪពុកម្តាយជាច្រើនជឿថា ខ្លួនគាត់មើលឃើញកូនតាមស្ថានភាពជាក់ស្តែង ហើយប្រកែកថាខ្លួនគាត់ប្រដៅកូនដោយមិនលាយនឹងអារម្មណ៍នោះទេ។ ទំនោរគិតបែបនេះ វាមិនសមស្របនឹងសភាពពិតជាក់ស្តែងរបស់កូនទេ វាគ្រាន់តែឪពុកម្តាយមើលឃើញទៅតាមស្ថានភាពដែលខ្លួនគាត់កំពុងមាន កំពុងនៅ ឬមួយតាមលក្ខខណ្ឌកំណត់ឱ្យមើលឃើញតាមអារម្មណ៍ជាអ្នកវិនិច្ឆ័យកូនតែប៉ុណ្ណោះ។ អ្វីទាំងអស់នេះមិនបានឆ្លុះបញ្ចាំពីកូននោះទេ គឺឆ្លុះបញ្ចាំពីតួអង្គឪពុកម្តាយ ពីការគិត និងផ្នត់គំនិតរបស់ឪពុកម្តាយតែប៉ុណ្ណោះ។

នៅក្នុងសង្គមគ្រួសារយើង ពេលកូនជំទាស ពេលកូនប្រកែក ហើយពេលកូនមិនស្តាប់តាម ឪពុកម្តាយហាមាត់និយាយថា ក្បាលរឹងណាស់! មិនព្រមស្តាប់អញទេ! អញសក់សមុន អញដើរមុន ហើយតាំងមានផ្នត់គំនិតគិតថា កូនខ្លួនខុសប្រក្រតី ហើយកូនមិនល្អទេ...។ ចំណុចខុសឆ្កងមួយគឺ ឪពុកម្តាយមិនបានយល់ពីចិត្តកូន ព្រោះតែមិនព្រមបើកបេះដូងស្តាប់បេះដូងកូន ដើម្បីយល់ថា កូនខ្លួនមានបញ្ហាអ្វី កូនចង់ឱ្យខ្លួនជួយអ្វី កូនមានទុក្ខលំបាកអ្វីខ្លះ? ក្មេងក្បាលរឹង មានកត្តាមួយដែរគឺថា ឪពុកម្តាយ និងកូន មានបទពិសោធន៍ខុសគ្នា នៅវ័យខុសគ្នា នៅសម័យកាលខុសគ្នា ជាហេតុនាំឱ្យពួកគេមើលអ្វីៗ ទៅតាមបទពិសោធន៍រៀងៗ ខ្លួនតែប៉ុណ្ណោះ។ មានផ្លូវមួយសម្រាប់ឪពុកម្តាយ កែប្រែកូន ឬអូសទាញកូនមកស្តាប់តាមខ្លួន លុះត្រាឪពុកម្តាយ បើកបេះដូងស្តាប់កូនជាមុនសិន។ ការស្តាប់ជារឿងមួយឪពុកម្តាយអាចយល់ពីបញ្ហាកូន ហើយកែប្រែកូនបានល្អ។

ឪពុកម្តាយគ្រប់រូបប្រសិនជាចង់ឱ្យកូនស្តាប់បង្គាប់ ចង់ឱ្យកូនស្រឡាញ់ មិនចង់ឱ្យកូនចេះកុហក គួរងាកមកចាប់អារម្មណ៍និងចាប់ផ្តើមបង្កើនភាពស្និទ្ធស្នាលជាមួយកូនឱ្យបានច្រើនជាមុន។ ភាពស្និទ្ធស្នាល ទំនាក់ទំនងជិតស្និទ្ធជាមួយកូន និងឪពុកម្តាយ គឺធ្វើឱ្យកូនៗមានអារម្មណ៍ថាកក់ក្តៅ កូនមានរឿងអ្វីក៏មកនិយាយប្រាប់ឪពុកម្តាយដែរ ហើយអាចកាត់បន្ថយការកុហករបស់កូនបានមួយផ្នែកធំថែមទៀតផង៕ អត្ថបទដោយ៖ ទ្រ សុភាព