១. បណ្តុះទម្លាប់ឯករាជ្យ និងការគ្រប់គ្រងខ្លួនឯង៖ ក្មេងដែលអាចសម្រេចរឿងតូចៗបានដោយខ្លួនឯងគឺជា ក្មេងដែលមានប្រាជ្ញា មានទំនុកចិត្តខ្ពស់ និងមានអារម្មណ៍ថាខ្លួនឯងមានតម្លៃ។ ចង់ឱ្យកូនធំឡើងក្លាយជាមនុស្សឯករាជ អាចដឹកនាំជីវិត ខ្លួនឯងបាន ឪពុកម្ដាយត្រូវបណ្ដុះពួកគេតាំងពីក្មេងឱ្យហើយ ដោយមិនបាច់ធ្វើអ្វីច្រើនទេ គ្រាន់តែបង្រៀនពួកគេឱ្យចេះធ្វើរឿងតូចៗដោយខ្លួនឯងដូចជា លាងចាន រៀបចំសម្លៀកបំពាក់ រៀបចំកន្លែងគេង ។ល។ ទោះវាជាកិច្ចការតូចតាច បទពិសោធន៍ទាំងនោះនឹងជួយឱ្យពួកគេរៀនចេះពីរបៀបមើលថែខ្លួនឯង  និងជឿជាក់លើសមត្ថភាពខ្លួនឯង។

តែជាក់ស្ដែង ឪពុកម្ដាយមួយចំនួនក្នុងសម័យនេះស្រលាញ់កូនខ្លាំងពេក ការពារកូនគ្រប់ជំហ៊ានមិនហ៊ានឱ្យកូនធ្វើការងារអ្វីឡើយ ប៉ុន្តែការស្រលាញ់បែបនេះអាចធ្វើឱ្យក្មេងខាតបង់ឱកាសក្នុងការរៀនសូត្រ និងអភិវឌ្ឍន៍ខ្លួន។ ក្មេងដែលតែងតែទទួលបានជំនួយគ្រប់ពេល ទៅអនាគតអាចធ្វើឱ្យពួកគេក្លាយជាមនុស្សដែលខ្វះទំនុកចិត្ត និងពឹងផ្អែកលើអ្នកដទៃច្រើន។ 

២. បង្កើតទម្លាប់អានសៀវភៅរៀងរាល់ថ្ងៃ៖ ក្មេងដែលចូលចិត្តអានញឹកញាប់ តែងតែមានចក្ខុវិស័យទូលំទូលាយ មានការគិតស៊ីជម្រៅ និងចេះយល់ពីភពជុំវិញខ្លួន។ សៀវភៅគឺជាបង្អួចបើកចិត្តក្មេងចេញពីពិភពតូចចង្អៀតនៃជីវិតប្រចាំថ្ងៃ។ ពេលអានសៀវភៅ ប្រៀបដូចពួកគេកំពុងសន្ទនាជាមួយចំណេះដឹង ពួកគេរៀនពីសុបិន្ត យល់ពីជីវិត និងអភិវឌ្ឍចិត្តនិងវិញ្ញាណរបស់ខ្លួន។ ឪពុកម្តាយអាចចាប់ផ្តើមអាចសៀវភៅជាមួយកូននៅថ្ងៃខ្លះ ឬក៏បង្កើតទម្លាប់អានសៀវភៅមុនចូលគេង ធ្វើជាទម្លាប់ប្រចាំថ្ងៃរបស់ពួកគេ។ នៅពេលការអានក្លាយជាផ្អែកមួយនៃជីវិតរបស់ពួកគេ នោះគឺជាពេលដែលក្មេងកំពុងប្រមូលសម្បត្តិចំណេះដឹងសម្រាប់អនាគតដោយមិនដឹងខ្លួន។ វាជាទម្លាប់សិក្សាពេញមួយជីវិត ។

៣. បង្ហាត់កូនឱ្យធ្វើកិច្ចការផ្ទះ៖ ការធ្វើកិច្ចការផ្ទះមិនមែនគ្រាន់តែជាការចែករំលែកបន្ទុកជាមួយឪពុកម្តាយទេ ប៉ុន្តែជាការបណ្តុះបណ្តាលជំនាញជីវិតដ៏សំខាន់។ ពេលកុមាររៀនចេះធ្វើអ្វីៗសម្រាប់ខ្លួនឯង ហើយជួយសមាជិកគ្រួសារផ្សេងទៀត ពួកគេរៀនអំពីការទទួលខុសត្រូវ ការយកចិត្តទុកដាក់ និងចេះសហការណ៍។ ការធ្វើកិច្ចការផ្ទះជួយឱ្យកុមារយល់ថា ការខិតខំប្រឹងប្រែងគឺមានតម្លៃ រាល់ពេលដែលពួកគេបំពេញការងារមួយបានសម្រេច ទោះបីជាមួយភាពច្របូកច្របល់តិចតួចក៏ដោយ ពួកគេនឹងមានអារម្មណ៍ថា “ខ្ញុំអាចធ្វើបាន”។ នេះជាគន្លងសំខាន់ក្នុងការបង្កើតទំនុកចិត្ត និងការយល់ដឹងអំពីតម្លៃខ្លួនឯង។ បន្ថែមពីនេះ ការធ្វើកិច្ចការផ្ទះជួយពង្រឹងទំនាក់ទំនងគ្រួសារ ឱ្យកូនស្គាល់អារម្មណ៍នៃការដឹងគុណ ក្ដីស្រលាញ់ចំពោះអ្នកដទៃ៕

អត្ថបទដោយ៖ សារួ