តម្រងនោមជាសរីរាង្គមួយមានតួនាទីចម្រុះជាតិពុលចេញពីក្នុងខ្លួនឱ្យអ្នករស់នៅមានសុខភាពល្អ។ បើតម្រងនោមរបស់អ្នកខ្សោយ នៅក្នុងខ្លួនអ្នកក៏កើនជាតិពុលនាំឱ្យកោសិកាខ្សោយតាមហ្នឹងដែរ។ ហើយជំងឺផ្សេងៗ ចាប់ផ្តើមវាយលុបមកលើរាងកាយ ជាពិសេសងាយប្រឈមកើតជំងឺមហារីកតម្រងនោមណាស់។ យោងតាមគេហទំព័រសុខភាព Time of India បានឱ្យដឹងថា មនុស្ស ៤ប្រភេទនេះងាយប្រឈមមុខកើតជំងឺមហារីកតម្រងនោមលឿន៖
១. ប្រភេទអ្នកជក់បារីទំនងងាយវិវត្តទៅជាជំងឺមហារីកតម្រងនោមលឿនជាងអ្នកមិនជក់បារី។ ការជក់បារីនេះជាកត្តាហានិភ័យមួយដែលផ្សារភ្ជាប់យ៉ាងជិតស្និទ្ធជាមួយនឹងជំងឺមហារីកតម្រងនោម ជាពិសេសកោសិកាមហារីកតម្រងនោមកាន់តែកើនឡើង។ សារធាតុបង្កមហារីកភាគច្រើនស្ថិតនៅក្នុងថ្នាំជក់នេះ ដែលស្រូបចូលក្នុងសរសៃឈាមហើយជ្រាបទៅរកតម្រងនោម។ ពេលតម្រងនោមប៉ះពាល់គីមីពីផ្សែងបារីដែលមានជាតិពុលជាប្រចាំថ្ងៃ អ្នកមិនអាចគេចផុតពីជំងឺមហារីកតម្រងនោមនោះទេ។ ដូច្នេះហើយ អ្នកជក់បារីងាយកើតមហារីកតម្រងនោមលឿនណាស់។
២. ប្រភេទមនុស្សធាត់ដែលមានរបបអាហារមិនល្អក៏បង្កើនហានិភ័យជំងឺមហារីកតម្រងនោមលឿនដែរ។ ការលើសគីឡូនេះអាចបណ្តាលឱ្យមានអតុល្យភាពអ័រម៉ូន និងកម្រិតអាំងស៊ុយលីនលើសកម្រិតខ្ពស់ជាកត្តាជម្រុញការលូតលាស់ដុំសាច់មហារីក។ ក្រុមអ្នកធាត់ភាគច្រើនចូលចិត្តហូបអាហារកែច្នៃច្រើន សាច់ក្រហម និងអាហារប្រៃផ្អែមលើសកម្រិតរាងកាយ ក៏អាចបង្កើនភាពតានតឹង និងមានការរលាកដល់តម្រងនោម។ ផ្ទុយទៅវិញ របបអាហារប៉ូវតម្រងនោមមានដូចជាទឹកដូង ទឹកធម្មតា ផ្លែប័រ ផ្លែប៉ោម បន្លែស្រស់ៗ គ្រាប់ធញ្ញជាតិ និងប្រូតេអ៊ីនគ្មានខ្លាញ់ដើម្បីទ្រទ្រង់មុខងារតម្រងនោមហើយជួយកាត់បន្ថយហានិភ័យជំងឺមហារីកតម្រងនោមបានល្អផងដែរ។
៣. ប្រភេទអ្នកជំងឺលើសឈាមរ៉ាំរ៉ៃក៏មានហានិភ័យតម្រងនោមដែរ។ ព្រោះសម្ពាធឈាមខ្ពស់មិនត្រឹមតែបំផ្លាញសរសៃឈាមទេ ថែមទាំងបង្កើនហានិភ័យនាំឱ្យខូចខាតតម្រងនោម ហើយក្លាយជាមហារីកតម្រងនោមទៀត។ សម្ពាធឈាមខ្ពស់ដែលមិនអាចគ្រប់គ្រងបាន មកពីការផ្លាស់ប្តូរ DNA នៃកោសិកាតម្រងនោមធ្វើឱ្យប្រព័ន្ធការពាររាងកាយចុះខ្សោយ។ ចូរអ្នកតាមដាន និងព្យាបាលសម្ពាធឈាមជាវិធានការបង្ការដ៏សំខាន់មួយការពារមហារីកតម្រងនោម។
៤. ប្រភេទមនុស្សប្រើថ្នាំបំបាត់ការឈឺចាប់រយៈពេលយូរក៏ប៉ះពាល់ដល់តម្រងនោមម្តងបន្តិចៗ ដែរ។ ការប្រើប្រាស់ថ្នាំបំបាត់ការឈឺចាប់ហួសកម្រិត ឬយូរអង្វែង ជាពិសេសថ្នាំប្រឆាំងនឹងការរលាក វាបង្កខូចខាតតម្រងនោមរហូតក្លាយជាជំងឺមហារីក។ ថ្នាំទាំងនេះកាត់បន្ថយលំហូរឈាមទៅកាន់តម្រងនោម ដែលអាចវិវត្តទៅជាជំងឺមហារីកតាមពេលវេលាផងដែរ។ សូមអ្នកស្តាប់ការណែនាំរបស់ពេទ្យ មុនលេបថ្នាំណាមួយ។
ដូច្នេះ! ប្រភេទមនុស្សជក់បារី ធាត់ លើសឈាម និងប្រើថ្នាំលេចរយៈពេលនោះ សុទ្ធតែមានហានិភ័យដល់សុខភាពតម្រងនោម។ ដើម្បីការពារតម្រងនោមរបស់អ្នក អ្នកគួរមានទម្លាប់ល្អៗ ដើម្បីពង្រឹងសមត្ថភាពតម្រងនោមឡើងវិញដូចជាកាត់បន្ថយផឹកស្រា មានទម្លាប់ហាត់ប្រាណឬលេងកីឡា ចូលគេងមុនម៉ោង១១យប់ និងហូបអាហារបែបធម្មជាតិ។ សូមអ្នកតាមដានពិនិត្យសុខភាព និងតម្រងនោមផងដែរ៕ អត្ថបទដោយ៖ ទ្រ សុភាព