ករណីលាងឈាមដោយសារខូចតម្រងនោមឃើញមានច្រើនខ្លាំងមែនទែននៅពេលច្ចុប្បន្ន ជំងឺនេះកើតឡើងមិនធ្វើឱ្យមនុស្សដឹងខ្លួនទេ ជាពិសេសនៅដំណាក់កាលដំបូងៗព្រោះវាមិនបង្ហាញសញ្ញាច្បាស់លាស់ណាមួយឡើយ អ្នកជំងឺភាគច្រើនដែលដឹងខ្លួនគឺនៅពេលដែលពួកគេឈានដល់ដំណាក់កាលធ្ងន់ធ្ងររួចទៅហើយ។ ដូច្នេះហើយដើម្បីបញ្ជៀសហានិភ័យ និងការពារតម្រងនោមឱ្យមានសុខភាពល្អ អ្នកទាំងអស់គ្នាគួរតែយកចិត្តទុកដាក់ឱ្យខ្លាំង និងតាមដានសុខភាពខ្លួនឯងឱ្យបានជាប្រចាំ។
យោងតាម Massachusetts General Hospital មានទម្លាប់ ៦ យ៉ាងដែលអ្នកគួរអនុវត្តដើម្បីបញ្ជៀសហានិភ័យខូចតម្រងតម្រងនោម៖
១. តាមដានសម្ពាធឈាមជាប្រចាំ៖ សម្ពាធឈាមខ្ពស់អាចបណ្តាលឱ្យតម្រងនោមខូចបន្តិចម្តងៗដោយមិនដឹងខ្លួន។ សម្ពាធឈាមដែលត្រូវបានចាត់ទុកថាមានសុខភាពល្អគឺប្រហែល 120/80 ។ ប្រសិនបើលទ្ធផលសម្ពាធឈាមលើសពី 140/90 នោះមានន័យថាអ្នកប្រឈមនឹងជំងឺលើសឈាម ហើយគួរតែពិគ្រោះជាមួយគ្រូពេទ្យ។
២. ធ្វើលំហាត់ប្រាណឱ្យបានទៀងទាត់៖ លំហាត់ប្រាណមិនត្រឹមតែជួយឱ្យរាងកាយសម្បូរថាមពលទេ ប៉ុន្តែវាក៏ជួយបន្ថយហានិភ័យនៃជំងឺតម្រងនោមដូចគ្នា កាលណាយើងធ្វើសកម្មភាពរាងកាយច្រើន សម្ពាធឈាមរបស់យើងនិងនៅថេរ ជំនួយដល់សុខភាពបេះដូង និងជួយគ្រប់គ្រងជាតិស្ករក្នុងឈាមផងដែរ។
៣. គ្រប់គ្រងជាតិស្ករក្នុងឈាម៖ ជំងឺទឹកនោមផ្អែមជាមូលហេតុធំបំផុតមួយដែលធ្វើឱ្យកើតជំងឺតម្រងនោម។ នៅពេលជាតិស្ករក្នុងឈាមខ្ពស់ តម្រងនោមត្រូវធ្វើការខ្លាំងជាងមុន ដើម្បីច្រោះឈាម ដែលអាចបណ្តាលឱ្យវាខូចបន្តិចម្តងៗ។ ប្រសិនបើអ្នកមានជំងឺទឹកនោមផ្អែម គួរតែគ្រប់គ្រងជាតិស្ករក្នុងឈាមដោយគ្រប់គ្រងលើរបបអាហារ ញុំាអាហារដែលសម្បូរជីវជាតិ ប្រើថ្នាំ ឬអាំងស៊ុយលីនតាមការណែនាំវេជ្ជបណ្ឌិត។
៤. ត្រូវញុំាអាហារណាដែលល្អសម្រាប់សុខភាព៖ អាហារដែលល្អសម្រាប់តម្រងនោមគួរមានជាតិសូដ្យូមទាប និងជៀសវាងអាហារ ចៀន ឬអាហារកែច្នៃ។ តែត្រូវផ្តោតលើអាហារដូចជា ផ្លែឈើ បន្លែ គ្រាប់ធញ្ញជាតិ គ្រាប់សណ្តែក និងប្រភេទប្រូតេអ៊ីនគ្មានខ្លាញ់។ ប្រសិនបើអ្នកត្រូវបានវិនិច្ឆ័យថាមានជំងឺតម្រងនោម នៅដំណាក់កាល ៣ ឡើងទៅ អ្នកគួរតែពិគ្រោះជាមួយអ្នកជំនាញផ្នែកអាហារ ដើម្បីទទួលបានការណែនាំអាហារដែលសមស្របជាងនេះ។
៥. ផឹកទឹកឱ្យបានគ្រប់គ្រាន់៖ ទឹកជួយឱ្យតម្រងនោមធ្វើការច្រោះជាតិពុល និងជាតិសូដ្យូមចេញពីរាងកាយ។ ការរក្សាអត្រាទឹកគ្រប់គ្រាន់ជួយបង្ការការកកើតគ្រួសក្នុងតម្រងនោម។ បរិមាណទឹកដែលល្អអាស្រ័យលើទំងន់ និងសកម្មភាពប្រចាំថ្ងៃ។ តែជាទូទៅសម្រាប់បរុសគួរផឹកទឹក ៣.៧ លីត្រ ហើយស្ត្រីគួរផឹក ២.៥ ទៅ ៣ លីត្រ ក្នុង ១ថ្ងៃ។ ប្រសិនបើអ្នកធ្លាប់មានគ្រួសក្នុងតម្រងនោម អាចត្រូវផឹកទឹកបន្ថែមដើម្បីការពារ។
៦. ជៀសវាងការជក់បារី និងប្រើថ្នាំមិនមានវេជ្ជបញ្ជា៖ ការជក់បារីធ្វើឱ្យសរសៃឈាមខូច និងបន្ថយសមត្ថភាពតម្រងនោម។ បើអ្នកឈប់ជក់បារី អ្នកអាចកាត់បន្ថយហានិភ័យនៃជំងឺតម្រងនោមបានយ៉ាងច្រើន។ បន្ថែមទៀត ការប្រើថ្នាំបំបាត់ឈឺចុក យូរពេកអាចប៉ះពាល់ដល់តម្រងនោមដូចគ្នា។ ប្រសិនបើអ្នកត្រូវប្រើថ្នាំទាំងនេះជារឿយៗ គួរទៅពិគ្រោះជាមួយគ្រូពេទ្យដើម្បីស្វែងរកជម្រើសសុវត្ថិភាពជាងនេះ៕
អត្ថបទដោយ៖ សារួ