ជឿថាមានបងប្អូនមួយចំនួនប្រាកដជាធ្លាប់លឺពាក្យនិយាយតៗគ្នាហើយថា ចង់កម្ចាត់មុនក្បាលខ្មៅលើច្រមុះ ចង្កា និងបរិវេណផ្សេងៗនៃមុខគឺងាយស្រួលបំផុតដោយគ្រាន់តែយកថ្នាំដុសធ្មេញដែលយើងដុសរាល់ថ្ងៃទៅលាបឬម៉ាស្សានៅត្រង់កន្លែងមុននោះឱ្យបានរាល់ថ្ងៃ មុននោះនឹងរាបអស់ជាមិនខាន។ តើវិធីនេះត្រឹមត្រូវដែរឬទេ? តើការលាបថ្នាំដុះធ្មេញអាចធ្វើឱ្យមុខរបស់យើងរលាកឬប្រតិកម្មដែរឬទេ?ជាការពិតណាស់ យោតាមគេហទំព័រ healthline វេជ្ជបណ្ឌិត Cynthia Cobb ជំនាញផ្នែកសើស្បែកបានបញ្ជាក់ច្បាស់ៗថា ថ្នាំដុសធ្មេញមិនត្រឹមតែមិនអាចកម្ចាត់មុនបាននោះទេ វាថែមទាំងបង្កបញ្ហាផ្សេងៗដល់ស្បែកមុខដូចជា ធ្វើឱ្យមុខស្តើង ស្ងួត ឡើងសរសៃក្រហម រលាក និងប្រតិកម្ម នៅត្រង់បរិវេណដែលយើងលាបថែមទៀតផង។ ម្យ៉ាងវិញទៀត នៅក្នុងថ្នាំដុសធ្មេញគ្រប់ប្រភេទវាមានផ្ទុកទៅដោយសារធាតុ គ្លីសេរីន sorbitol កាល់ស្យូមកាបូណាត សូដ្យូម lauryl sulfate (SLS) និងម្សៅ Baking soda ដែលសារធាតុទាំងអស់នេះវាមានតួនាទីជួយកម្ចាត់បាក់តេរី ជាតិកង្វក់ផ្សេងៗនៅក្នុងមាត់ និងធ្មេញតែប៉ុណ្ណោះ ប៉ុន្តែវាមិនអាចទៅកម្ចាត់មុន ឬធ្វើឱ្យស្បែកមុខរបស់អ្នកបាត់មុនបាននោះទេ។

ជម្រើសដ៏ល្អបំផុតក្នុងការព្យាបាលបញ្ហាមុខមុន និងទប់ស្គាត់កុំឱ្យមុនកើតនៅលើមុខមានវេជ្ជបណ្ឌិតជំនាញជាច្រើនរួមទាំងវេជ្ជបណ្ឌិត គួច ម៉េងលី បានណែនាំថា មុនកើតឡើងពីភាពកង្វក់ ធូលីដី និងការកកស្ទះនៃជាតិខ្លាញ់នៅក្នុងរន្ធញើសរបស់យើង។ កាលណាយើងមិនបានសម្អាតវាឱ្យបានល្អ និងញ៉ាំអាហារមិនបានត្រឹមត្រូវវានឹងបង្កឱ្យមុនកើតពេញមុខមិនខាន។ ដូច្នេះដើម្បីចៀសផុតពីបញ្ហាមុនអ្នកត្រូវតែ៖

១.ញ៉ាំទឹកឱ្យបាន ៨ ទៅ ៩ដប(ប្រហែលចន្លោះពី ៣លីត្រកន្លះ ទៅ៤លីត្រ) ក្នុងមួយថ្ងៃ

២.ហាមយកដៃស្ទាបមុខ ឬក៏កេះមុខ

៣.បោកកម្រាលពូក ភួយ និងស្រោមខ្នើយមួយអាទិត្យម្ដង

៤.កក់សក់ឱ្យបានរៀងរាល់ថ្ងៃ

៥. កុំលុបមុខពេលមកពីក្រៅភ្លាម

៦. កាត់បន្ថយការញ៉ាំអាហារហឹរ និងអាហារដែលមានជាតិប្រៃលើសកម្រិត៕

អត្ថបទដោយ៖ មឿន គន្ធា