១. គេងឱ្យបានគ្រប់គ្រាន់៖ ពេលដែលអ្នកគេងជាពេលដែលរាងកាយជួសជុលខ្លួនឯង និងកែតម្រូវខ្លួនឯងឡើងវិញបន្ទាប់ពីធ្វើការហត់នឿយពេញមួយថ្ងៃ ហើយធ្វើឱ្យស្បែកឆាប់ចាស់។ ជាធម្មតានៅចន្លោះពេលពីម៉ោង ១០ ដល់ម៉ោង ២ ស្បែកអ្នកកំពុងដែលបញ្ចេញសម្រាមចេញមកក្រៅទាំងអស់ ដូចនេះ បើអ្នកមិនទាន់ចូលគេង នោះរន្ធរោមអ្នកនឹងបើកធំ ហើយវានឹងស្រូបយកសារធាតុកង្វក់ទាំងឡាយ ចូលទៅក្នុងស្បែក ជាហេតុធ្វើឱ្យឆាប់ចាស់។ ការសិក្សាជាច្រើនក៏បង្ហាញដែរថា ការគេងឱ្យបានល្អអាចបង្កើនភាពស៊ាំសម្រាប់រាងកាយ កាត់បន្ថយការរលាក ធ្វើឱ្យស្បែកស្រស់ថ្លា ប្រឆាំងភាពចាស់យ៉ាងមានប្រសិទ្ធភាព។ បើអ្នកអាចកំណត់់ម៉ោងចូលគេងមួយឱ្យបានជាក់លាក់ អ្នកនឹងឃើញថាស្បែករបស់អ្នកកាន់តែរឹងមាំ និងភ្លឺថ្លាពីខាងក្នុង ស្រស់ស្អាតបែបធម្មជាតិ។ 

២. ញ៉ាំអាហារសម្បូរសារធាតុប្រឆាំងអុកស៊ីតកម្ម៖ ការទទួលទានអាហារដែលសម្បូរទៅដោយសារធាតុប្រឆាំងអុកស៊ីតកម្មដូចជា ផ្លែប៊្លូបឺរី ផ្លែក្រូច ប្រូខូលី ស្ពៃក្តោប អាចជួយបន្សាបរ៉ាឌីកាល់សេរីក្នុងរាងកាយ កាត់បន្ថយការបំផ្លាញកោសិកាដែលបណ្តាលមកពីរ៉ាឌីកាល់សេរី និងកាត់បន្ថយដំណើរការនៃភាពចាស់។ ឧទាហរណ៍ នៅក្នុងអាហារប្រចាំថ្ងៃរបស់អ្នកត្រូវមានបន្លែហោចណាស់ ០.៥គីឡូក្រាម ដើម្បីជំរុញការកម្ចាត់កាកសំណល់ចេញពីរាងកាយ។ 

៣. ធ្វើលំហាត់ប្រាណយ៉ាងហោចណាស់ 3 ដងក្នុងមួយសប្តាហ៍៖ ហាត់ប្រាណឱ្យបានទៀងទាត់ពិតជាសំខាន់ណាស់សម្រាប់សុខភាពរាងកាយ ជួយលើកកម្ពស់ចរាចរឈាម ពង្រឹងមុខងារបេះដូង និងសួត ធ្វើឱ្យប្រព័ន្ធរំលាយអាហារកាន់តែប្រសើរ ជួយគ្រប់គ្រងទម្ងន់ និងពន្យឺតនៃភាពចាស់។ ប្រសិនបើអ្នកមានភាគរយខ្លាញ់ក្នុងរាងកាយខ្ពស់ និងលើសទម្ងន់ អ្នកគួរតែបង្កើនលំហាត់ប្រាណបែប aerobic ដូចជារត់ ហែលទឹក និងជិះកង់ ដែលអាចបង្កើនការប្រើប្រាស់កាឡូរី កាត់បន្ថយភាគរយខ្លាញ់ក្នុងរាងកាយ បង្កើនភាពសុំារាងកាយ និងបង្កើនមុខងារនៃប្រព័ន្ធសរសៃឈាមបេះដូង។ លំហាត់ប្រាណទាំងនេះអាចជួយការពារការបាត់បង់សាច់ដុំ រក្សាថាមពល បង្កើនអត្រាមេតាបូលីស ការពារការប្រមូលផ្តុំជាតិខ្លាញ់ និងជួយឱ្យរាងកាយរឹងមាំ និងក្មេងជាងវ័យ។

៤. ការពារស្បែករបស់អ្នកពីពន្លឺព្រះអាទិត្យ៖ ប្រសិនបើអ្នកមិនប្រើឡេការពារកម្តៅថ្ងៃជាប្រចាំទេ ស្បែករបស់អ្នកនឹងចាស់ជាងអ្នកដែលប្រើ។ កាំរស្មី UV នៅក្នុងពន្លឺព្រះអាទិត្យអាចបំផ្លាញសរសៃ collagen និង elastin នៅក្នុងស្បែក បណ្តាលឱ្យមានស្នាមជ្រីវជ្រួញ ឆាប់ចាស់ ហើយស្បែកនិងមានសភាពយារធ្លាក់។ ដើម្បីទប់ស្កាត់ភាពចាស់ អ្នកត្រូវលាបឡេការពារកម្តៅថ្ងៃនៅពេលព្រឹកព្រលឹម ហើយពាក់មួក និងឆ័ត្រពេលចេញទៅក្រៅ។ បើអ្នកបន្តប្រើយូរជាងមួយខែ នោះអ្នកនឹងឃើញស្បែកអ្នកប្រែជាសភ្លឺថ្លាគួរឱ្យកត់សម្គាល់។

៥. ឈប់ជក់បារី និងផឹកស្រា៖ ការផឹកស្រា និងការជក់បារី គឺជាកត្តាហានិភ័យនៃជំងឺផ្សេងៗ ជាពិសេសជំងឺមហារីក។ អ្នកជក់បារីយូរនឹងធ្វើឱ្យធ្មេញខ្មៅ ស្បែកស្រអាប់ មានស្នាមជ្រីវជ្រួញ។ ការផឹកស្រាក៏អាចពន្លឿនដំណើរការនៃភាពចាស់ផងដែរ។ ជាតិអាល់កុលធ្វើឱ្យរាងកាយបាត់បង់វីតាមីន A និង C បណ្តាលឱ្យខ្សោះជាតិទឹក និងធ្វើឱ្យស្បែកស្ងួត។ ដើម្បីពន្យឺតដំណើរការនៃភាពចាស់ អ្នកគួរតែឈប់ជក់បារី និងកំណត់ការប្រើប្រាស់គ្រឿងស្រវឹងឱ្យបានត្រឹមត្រូវ កាត់បន្ថយឬបើអាចបញ្ឃប់នោះកាន់តែល្អ៕

អត្ថបទដោយ៖ សារួ