ការរស់នៅបើអ្នកមិនចេះមើលមនុស្សទេ អ្នកនឹងជួបការបោកប្រាស់ និងអស់ទ្រព្យមិនខានទេ។ ជាពិសេសពេលអ្នកសេបគប់មិត្ត មានការឈឺចាប់ និងការក្បត់ជាដើម។ សម្តីមាសទាំង ៥នេះមានតម្លៃណាស់ពីសៀវភៅស្រីហិតោបទេសជាស្នាដៃពីភិក្ខុរិយាបណ្ឌិតោ ប៉ាង ខាត់ ជាអ្នកបកប្រែពីភាសាសំស្រ្កឹត។ ចំពោះសៀវភៅមួយក្បាលនេះមានតម្លៃសម្រាប់កូនខ្មែរយើងណាស់ មានសុទ្ធតែគតិបណ្ឌិតមិនអាចកាត់ថ្លៃបានឡើយ។
១. មនុស្សគេដឹងចិត្តតាមរយៈសកម្មភាពនានា។ តាមសៀវភៅស្រីហិតោបទេសបានលើកឡើងថា គេអាចដឹងចិត្តមិត្តនៅក្នុងគ្រាលំបាក ដឹងចិត្តទាហានពេលមានសង្រ្គាម ដឹងចិត្តស្មោះត្រង់របស់មនុស្សពេលសងបំណុលគេ ដឹងចិត្តភរិយានៅពេលខ្សត់ទ្រព្យ និងដឹងចិត្តសាច់ញាតិក្នុងគ្រាវិនាសអន្តរាយ។
២. សម្គាល់បណ្ឌិត មិនមែនរៀនចប់ថ្នាក់បណ្ឌិតទេ។ តាមសៀវភៅស្រីហិតោបទេសបានលើកឡើងថា ជនទាំងឡាយណាឃើញភរិយាអ្នកដទៃ ទុកស្មើជាម្តាយរបស់ខ្លួន។ ឃើញទ្រព្យអ្នកដទៃទុកដូចជាដុំថ្ម។ ឃើញសត្វទាំងឡាយទុកស្មើជារូបរាងកាយរបស់ខ្លួន ជនទាំងឡាយនោះហៅថា “បណ្ឌិត”។
៣. គេមើលមនុស្ស មើលតាមទម្លាប់ បានដឹងពីមនុស្សមានប្រយោជន៍ ឬឥតប្រយោជន៍។ សៀវភៅស្រីហិតោបទេសបានលើកឡើងថា “ក្នុងលោកនេះ បុគ្គលប្រាថ្នាចង់បានសុខចម្រើនគួរគប្បីលះបង់ចោលនូវទោស ៦ប្រការនេះដូចជាការដេកទ្រមក់១ ភាពខ្ចិលច្រអូស១ ការភ័យខ្លាច១ ការខឹងក្រោធ១ សេចក្តីខ្មាសអៀន១ និងភាពយឺតយូរក្រោយគេ១”។
៤. មិត្តល្អជាមិត្តនិយាយគ្នាដោយភាពស្មោះត្រង់។ តាមសៀវភៅស្រីហិតោបទេសបានលើកឡើងថា បុគ្គលគួរជៀសវាងមិត្តដែលប៉ងបំផ្លាញការងារក្នុងទីកំបាំងមុខ(លួចចាក់ពីក្រោយខ្នង) ហើយនិយាយពាក្យពីរោះផ្អែមល្ហែមក្នុងទីចំពោះមុខ មិត្តបែបនេះប្រៀបដូចជាឆ្នាំងពោរពេញដោយពិសពុលដែលមានមាត់ប្រឡាក់ដោយទឹកដោះផ្អែម។
៥. កុំជឿពាក្យផ្អែមគេពេក ភាគច្រើនជាពាក្យមានកលល្បិចទៅវិញទេ។ តាមសៀវភៅស្រីហិតោបទេសបានលើកឡើងថា ក្នុងលោកនេះ គេបោកបញ្ឆោតយើងបានដោយគ្រាន់តែគេនិយាយដោយប្រើពាក្យផ្អែមល្ហែមដូចជាទឹកឃ្មុំ គេធ្វើយើងវង្វេងក្នុងអំណាចដោយសារល្បិចលកអាក្រក់របស់គេ៕ អត្ថបទដោយ៖ ទ្រ សុភាព
