ពេលខួរក្បាលអ្នកមានបញ្ហាគិតអ្វីមិនចេញ ហើយពូកែភ្លេចមុខភ្លេចក្រោយនោះ ជីវិតរបស់អ្នកនឹងសម្បូរបញ្ហាកាន់តែច្រើនឡើងមិនខានទេ។ គេហៅថា ជីវិតរស់ក្នុងភាពស្មុគស្មាញ ព្រោះខួរក្បាលចាក់ស្មុគពេក។ ដើម្បីធ្វើឱ្យខួរក្បាលរបស់អ្នកស្រស់ថ្លានោះ អ្នកគួរហូបបន្លែធម្មជាតិឱ្យច្រើន។ បន្លែប្រទេសណា?
យោងតាមទស្សនាវដ្តី Very Well Health បានចុះផ្សាយថា ហូបបន្លែស្លឹកបៃតង រួមទាំងបន្លែប្រភេទដូចជា ស្ពៃខ្មៅ ស្ពៃតឿ ស្ពៃក្តោប ផ្កាខាត់ណាខៀវ ស្ពៃពួយឡេង និងស្លឹកល្ពៅ... ពួកវាសម្បូរទៅដោយសារធាតុប្រឆាំងអុកស៊ីតកម្ម លូទីន បេតាការ៉ូទីន និងហ្វូឡាត (វីតាមីន B9) ដែលជួយប៉ូវដលល់សុខភាពខួរក្បាល សរសៃឈាមបេះដូង និងកាត់បន្ថយហានិភ័យជំងឺមហារីកមួយចំនួនទៀត។ វាមានបន្ថែមលើសពីនោះគឺសម្បូរសារធាតុវីតាមីនK ជួយកាត់បន្ថយហានិភ័យជំងឺពុកឆ្អឹង និងជំងឺរលាកបានយ៉ាងល្អ។
បន្លែបៃតងប្រភេទនេះ ក៏សម្បូរជាតិសរសៃជួយជំរុញបាក់តេរីដែលមានអត្ថប្រយោជន៍ដល់ពោះវៀន និងផ្តល់អត្ថប្រយោជន៍ដល់ខួរក្បាល។ ហើយបន្លែនេះក៏រក្សាកម្រិតជាតិស្ករក្នុងឈាមឱ្យមានស្ថេរភាពដោយធានាបាននូវការផ្គត់ផ្គង់ថាមពលគ្លុយកូសចាំបាច់សម្រាប់សកម្មភាពកោសិកានៃសរសៃប្រសាទរបស់ខួរក្បាលដែរ។ ការហូបបន្លែពណ៍បៃតងនេះជួយផ្តល់ផលប្រយោជន៍បន្ថែមដូចជា កាត់បន្ថោយហានិភ័យភាពធាត់ ការពារជំងឺបេះដូង ការពារកើនសម្ពាធឈាមខ្ពស់ និងជាថ្នាំប៉ូវផ្លូវចិត្ត គេចពីបញ្ហាបាក់ទឹកចិត្ត។
សូម្បីអង្គការសុខភាពពិភពលោក (WHO) ក៏ណែនាំឱ្យមនុស្សគ្រប់គ្នាញ៉ាំផ្លែឈើ និងបន្លែប្រភេទបៃតងយ៉ាងហោចណាស់ ៤០០ក្រាមជារៀងរាល់ថ្ងៃដើម្បីបន្ថែមថាមពលខួរក្បាលដែរ។ ហើយថែមស៊ុតជាមួយបន្លែបៃតងថែមទៀតនោះ កាន់តែប៉ូវខួរក្បាលលើសដើមមានការចងចាំបានល្អ៕ អត្ថបទដោយ៖ ទ្រ សុភាព