នៅពេលមេឃក្ដៅខ្លាំងធ្វើឱ្យយើងចេញញើស ហើយងាយនឹងបាត់បង់ជាតិទឹក។ ដូច្នេះហើយនៅក្នុងពេលដែលមេឃក្ដៅខ្លាំងបែបនេះការរកភេសជ្ជៈផឹកឱ្យបានគ្រប់គ្រាន់់គឺពិតជាសំខាន់ណាស់ ដើម្បីការពាររាងកាយពីការខ្សោះជាតិទឹក វិលមុខ ឈឺក្បាល ឬអស់កម្លាំង។ ដើម្បីជួយឱ្យរាងកាយស្រស់ស្រាយ មានថាមពលឡើងវិញ និងជៀសវាងបញ្ហាសុខភាពនៅពេលមេឃក្តៅខ្លាំង បងប្អូនអាចជ្រើសយកភេសជ្ជៈ ៣ មុខខាងក្រោម ដើម្បីផឹកជាប្រចាំបាន៖
១. ទឹក៖ ទឹកធម្មតាគឺជាភេសជ្ជៈសំខាន់បំផុតសម្រាប់រាងកាយ មិនថានៅរដូវណាទេយើងមិនអាចមិនផឹកទឹកបានឡើយ។ ជាពិសេសនៅរដូវក្តៅ យើងត្រូវការទឹកច្រើនជាងមុន ដើម្បីជួយលាងជាតិពុល សម្រួលដល់ការបញ្ចេញញើស និងរក្សាជាតិទឹកនៅក្នុងខ្លួន។ ប្រសិនបើយើងផឹកមិនគ្រប់ វាអាចនាំឱ្យរាងកាយខ្សោះជាតិទឹក អាចធ្វើឱ្យវិលមុខ ឈឺក្បាល អស់កម្លាំង ជាដើម។
២. ទឹកអំពៅ៖ ទឹកអំពៅជាភេសជ្ជៈមួយប្រភេទដែលមានរសជាតិឆ្ងាយ ហើយតម្លៃវិញក៏សមរម្យដែរ។ ទឹកអំពៅមានជាតិស្ករធម្មជាតិដែលអាចជួយឱ្យយើងមានថាមពលបានលឿនបន្ទាប់ពីត្រូវកម្ដៅថ្ងៃយូរ។ តែទោះជាយ៉ាងណា សូមកុំផឹកទឹកអំពៅច្រើនពេកព្រោះវាមានជាតិស្ករ ខ្ពស់ អាចប៉ះពាល់ដល់អ្នកមានបញ្ហាជាតិស្ករក្នុងឈាម។ សម្រាប់អ្នកមានជំងឺប្រចាំកាយ គួរពិគ្រោះគ្រូពេទ្យជាមុនសិន។
៣. ទឹកដូង៖ ទឹកដូងគឺជាជម្រើសដ៏ល្អមួយនៅពេលមេឃក្តៅ វាធ្វើឱ្យរាងកាយស្រស់ស្រាយ និងបំពេញជាតិទឹកបានល្អ។ វាមានរសជាតិផ្អែមបន្តិច ឆ្ងាញ់បែបធម្មជាតិ និងមានសារធាតុអាហារដែលខ្លះជួយដល់សុខភាព។ តែសម្រាប់អ្នកដែលមានជំងឺប្រចាំកាយ សូមពិគ្រោះគ្រូពេទ្យជាមុន ដើម្បីជៀសវាងផលប៉ះពាល់។
សរុបជារួមមក នៅក្នុងខែក្តៅនេះ សូមបងប្អូនពិសារទឹកឱ្យបានគ្រប់គ្រាន់យ៉ាងហោងណាស់ ២ ទៅ ៣ លីត្រ ក្នុងមួយថ្ងៃដើម្បីរក្សារាងកាយឱ្យមានសុខភាពល្អ។ ក្រៅពីទឹកធម្មតា ក៏អាចជ្រើសយក ទឹកអំពៅ និងទឹកដូង ជាជម្រើសដែលអាចធ្វើឱ្យរាងកាយនឹងអារម្មណ៍ស្រស់ស្រាយបានដែរ។ ពិសារភេសជ្ជៈឱ្យបានត្រឹមត្រូវ រាងកាយស្រស់ស្រាយ ក៏ជៀសវាងការខ្សោះជាតិទឹកផងដែរ៕
អត្ថបទដោយ៖ សារួ