នៅថ្ងៃទី ១១ ខែធ្នូ ឆ្នាំ២០២៥ នេះយោងតាមផេកផ្លូវការរបស់ក្រសួងសុខាភិបាលនៃព្រះរាជាណាចក្រកម្ពុជា បានប្រកាសដំណើរការជាផ្លូវការ នៃការចាក់វ៉ាក់សាំងការពារជំងឺរាក ដោយវីរុសរ៉ូតា ជាផ្នែកមួយនៃកម្មវិធីជាតិផ្តល់ថ្នាំបង្ការ នៅទូទាំងព្រះរាជាណាចក្រកម្ពុជា។ វាជាជំហានសំខាន់មួយក្នុងការការពារ និងបន្ថយការកើតជំងឺរាកធ្ងន់ធ្ងរ ដែលតែងតែបង្កឱ្យកុមារតូចៗ មានគ្រោះថ្នាក់ដល់ជីវិត។
យ៉ាងណាមិញ តាមរយៈការប្រកាសរបស់សួងដដែលបានអំពាវនាវឱ្យប្រជាពលរដ្ឋគ្រប់មជ្ឈដ្ឋាននាំកូនអាយុ ១ខែកន្លះ ទៅទទួលវ៉ាក់សាំងការពារជំងឺរាក នៅមណ្ឌលសុខភាពចាប់ពីពេលនេះតទៅ ដោយឥតគិតថ្លៃ។ សម្រាប់ព័ត៌មានបន្ថែម សូមសាកសួរ ក្រុមទ្រទ្រង់សុខភាពភូមិ ឬបុគ្គលិកមណ្ឌលសុខភាព ដែលនៅជិតលោកអ្នកបំផុត។
គួរបញ្ជាក់ថា វីរុសរ៉ូតា គឺជាមូលហេតុមួយដែលបង្កឱ្យមនុស្សមានជំងឺរាក។ នៅពេលមនុស្សឆ្លងវីរុសរ៉ូតាអាចមានអាការៈគ្រុនក្តៅ ក្អួត និងរាគជាទឹក។ ចំពោះកុមារអាយុក្រោម ៣ឆ្នាំបើឆ្លងវីរុសនេះអាចធ្វើឱ្យខ្សោះជាតិទឹកលឿន នៅពេលមានជំងឺរាគរួស ហើយបើមិនទទួលបានការយកចិត្តទុកដាក់និងព្យាបាលឱ្យទាន់ពេលវេលាទេនោះជំងឺអាចនឹងកាន់តែធ្ងន់ធ្វើឱ្យប៉ះពាល់ដល់អាយុជីវិត៕
អត្ថបទដោយ៖ សារួ