ពេលមករដូវ មនុស្សស្រីភាគច្រើនតែងប្រឈមនឹងការឈឺចុកចាប់នៅត្រង់ពោះផ្នែកខាងក្រោម អស់កម្លាំង ឈឺចង្កេះ ឬមានអារម្មណ៍ប្រែប្រួល។ យ៉ាងណាមិញអំឡុងពេលមករដូវប្រសិនបើអ្នកមិនបានថែរក្សាអនាម័យបានល្អទេ អាចនឹងងាយឆ្លងមេរោគដូចជា កើតបាក់តេរីទ្វារមាស ឆ្លងមេរោគ បាក់តេរីតាមផ្លូវបង្ហូរនោមជាដើម។ មានទម្លាប់តូចៗមួយចំនួន ដែលស្ត្រីមិនគួរមើលរំលង ព្រោះបើអ្នកមិនយកចិត្តទុកដាក់អាចនាំឱ្យមេរោគចូលក្នុងទ្វាមាសបាន។
ផ្អែកតាមប្រភព Health Shots វេជ្ជបណ្ឌិត Amrita Razdan Kaul ទីប្រឹក្សាជាន់ខ្ពស់-សម្ភព និងរោគស្ត្រី មន្ទីរពេទ្យអាស៊ី-ហ្វារីដាបាដ បានបង្ហើបប្រាប់ស្រីៗពីកំហុសអនាម័យទូទៅដែលមនុស្សស្រីគួរតែចៀសវាងធ្វើក្នុងពេលមករដូវ។ ស្ត្រីជាច្រើនតែងប្រើផលិតផលអនាម័យដែលមានក្លិនក្រអូប ដើម្បីគ្រប់គ្រងក្លិនឈាមពេលមករដូវ ដោយគិតថាវាជារឿងល្អ។ ប៉ុន្តែក្លិនក្រអូបនោះភាគច្រើនមានសារធាតុគីមីបន្ថែម ដែលអាចបង្ករឱ្យរលាក និងអាលែហ្សីនៅតំបន់ទ្វារមាស។ ការជ្រើសរើសសំឡីឬក្រដាស់អនាម័យគ្មានក្លិន ហើយប្ដូរវានៅរៀងរាល់ ៤ ម៉ោងម្ដងគឺជាវិធីការពារដែលមានប្រសិទ្ធភាពបំផុត។
ក្នុងនោះដែរ កំហុសមួយទៀតដែលគេមើលរំលងគឺ ការមិនលាងដៃមុនប្ដូរសំឡីអនាម័យ៖ ដៃកខ្វក់ជាប្រភពចម្លងមេរោគដល់ទ្វារមាសស្រ្តី។ ដូច្នេះមុននឹងប្ដូរសំឡីកុំភ្លេចលាងដៃជាមួយសាប៊ូឱ្យបានស្អាតជាមុន។ ខណៈពេលដែលការផឹកទឹកមើលទៅដូចជារឿងធម្មតា ប៉ុន្តែការចុះខ្សោយជាតិទឹកអាចបណ្ដាលឱ្យទ្វារមាសស្ងួត រលាក ងាយឆ្លងមេរោគ ហើយធ្វើឱ្យការមករដូវកាន់តែមានអារម្មណ៍មិនស្រួល។
លើសពីនេះការមើលរំលងការថែរក្សាអនាម័យផ្ទាល់ខ្លួនក៏ជាកត្តាមួយដែរ៖ ដូចជាមិនងូតទឹកទៀងទាត់ ស្លៀកខោក្នុងតឹង ឬខោដែលមានញើស សើម និងមិនលាងតំបន់ទ្វាមមាសឱ្យបានត្រឹមត្រូវអាចបង្កើតផ្លូវឱ្យមេរោគលូតលាស់។ ដើម្បីការពារ ស្ត្រីគួរតែងូតទឹកឱ្យបានរាល់ថ្ងៃ ស្លៀកខោក្នុងស្អាតដែលមានខ្យល់ចេញចូលល្អ និងលាងតំបន់ទ្វារមាសដោយប្រើផលិតផលទន់ៗគ្មានក្លិន។
ការយកចិត្តទុកដាក់ក្នុងការរក្សាអនាម័យល្អពេលមករដូវអាចជួយការពារសុខភាពរបស់ទ្វារមាស បង្ហូរនោម និងស្បូនពីការឆ្លងមេរោគ។ ទោះតែវាជាការថែរក្សាតូចៗមើលទៅធម្មតា ក៏វាអាចរក្សារប្រព័ន្ធបន្តពូជ និងសុខភាពស្ត្រីឱ្យមានសុវត្ថិភាព និងមានទម្លាប់រស់នៅល្អផងដែរ៕
អត្ថបទដោយ៖ សារួ