នៅសព្វថ្ងៃនេះ ប្រជាជនជប៉ុនអ្នករស់នៅលើកោះអូគីណាវ៉ាមានអាយុវែងជាងគេក្នុងពិភពលោកដោយស្ត្រីគិតជាមធ្យមអាចមានអាយុ ៨៧ ឆ្នាំ ហើយបុរសមានអាយុដល់ ៨០ ឆ្នាំ។ កិច្ចការប្រចាំថ្ងៃអ្នកកោះអាយុវែងរួមាន ជាអ្នកតម្បាញ ជាអ្នករកស៊ី ជាអ្នកច្នៃប្រឌិតឆ្លាក់ដោយដៃ ជាអ្នកធ្វើស្រែចម្ការ មើលថែសួនបន្លែ និងរាំចម្រៀងជាដើម។ ពួកគាត់តែងភ្ញាក់ពីគេងរាល់ព្រឹកប្រហែលម៉ោង៤ឬ៥ ដើម្បីអធិដ្ឋាន និងសមាធិឱ្យចិត្តស្ងប់។ រួចហើយក៏ពួកគាត់ចេញទៅធ្វើលំហាត់ប្រាណ និងហូបអាហារពេលព្រឹកដោយផ្តោតសំខាន់បែបបន្លែ ផ្លែឈើ និងត្រីច្រើនជាងសាច់។
តាមការស្រាវជ្រាវរបស់លោក Dan Buettner ជាអ្នកនិពន្ធសៀវភៅ Blue Zones ដែលចំណាយពេល ២០ឆ្នាំសិក្សាពីអ្នករស់នៅមានអាយុវែងនៅក្នុងតំបន់ទាំង៥ ក្នុងនោះក៏មានកោះអូគីណាវ៉ាមួយដែរ លោកបានបញ្ជាក់ថា “ការមានក្តីស្រមៃក្នុងជីវិតរបស់ជនជាតិជប៉ុននៅលើកោះអូគីណាវ៉ា គឺពួកគេគ្មានគំនិតចូលនិវត្តន៍នោះទេ។” មូលហេតុមកពីពួកគាត់មិនព្រមចូលនិវត្តន៍ ពួកគាត់មានអារម្មណ៍ថា ខ្លួនមានភារៈកិច្ចការបន្តធ្វើលើការងារប្រចាំថ្ងៃ។ ពេលអ្នកធ្វើកិច្ចការមួយដោយមានអារម្មណ៍ថា កិច្ចកានេះមានគុណតម្លៃ បេះដូងមិនយល់ព្រមឱ្យអ្នកចូលចិត្តនិវត្តន៏ពីការងារនោះទេ។ នេះហេតុផលជម្រុញលំហូរចិត្តរបស់អ្នកភ្ញាក់ពីព្រឹកជាមួយអារម្មណ៍ដ៏មានថាមពលដ៏អស្ចារ្យបំផុត។
អ្នកអាចសួរថា អ្នកកោះអូគីណាវ៉ាធ្វើការងារដដែលៗ ពួកគាត់មានភាពធុញទ្រាំទេ? ដូចជាអ្នកតម្បាញចឹងដែរ ពួកគាត់មិនមែនធ្វើក្រណាតពណ៍សដដែលៗ ទេ គឺប្រើគំនិតភាពច្នៃប្រឌិតឱ្យតម្បាញហ្នឹង មានពណ៍ចម្រុះផ្សេងគ្នា មានក្បាច់រចនាប្លែកៗ និងការច្នៃម៉ូតថ្មី... អាថ៌កំបាំងនៅត្រង់ការប្រើគំនិតច្នៃប្រឌិតលើការងារគ្មានឈប់គ្មានឈរ ជាកម្លាំងជម្រុញឱ្យពួកគាត់គ្មានភាពធុញ តានតឹង និងស្អប់ការងារនោះទេ។ សូម្បីលទ្ធផលភ្ជាប់ដោយស្វ័យប្រវត្តជាមួយការព្យាយាមធ្វើការងារដោយគំនិតច្នៃប្រឌិតនេះដែរ។ នេះហើយជាដំណើរលំហូរចិត្តធ្វើការងារអ្នកកោះអូគីណាវ៉ា សួរថា ពេលអ្នកញៀនការងារបែបនេះ តើអ្នកគំនិតចូលនិវត្តន៍ដែរទេ? បើអ្នកមានលក្ខណៈរស់នៅរបៀបនេះ អ្នកក៏មានអាយុវែងដូចជាជនជាតិជប៉ុនដែរ៕ អត្ថបទដោយ៖ ទ្រ សុភាព