អ្នកចិត្តសាស្ត្រជនជាតិអាមេរិកភាគច្រើនបានណែនាំថា ចង់ឱ្យក្លាយជាអ្នកប្រាជ្ញ និងមានសមត្ថភាពធំឡើង បុគ្គលទីមួយក្នុងការផ្លាស់ប្តូរជីវិតកូន គឺឪពុកម្តាយជាគ្រូទីមួយនេះឯង។ លោក ថូម៉ាស់ អេឌីសុន (Thomas Edison) ជាអ្នកបង្កើតអំពូលដំបូងគេមានសញ្ជាតិអាមេរិក នៅពីតូចគ្រូថាគាត់ជាក្មេងគំនិតវៃឆ្លាតទេ។
ថ្ងៃមួយថូម៉ាស់ចេញពីសាលាបានហុចក្រដាសមួយច្បាប់ទៅកាន់ម្ដាយគាត់ថាគ្រួផ្ញើមកឱ្យ។ សំបុត្រនោះមានន័យថា “សួរស្តីអ្នកស្រី! កូនប្រុសរបស់ម្តាយជាសិស្សម្នាក់ដែលឆ្លាតបំផុត មានខួរក្បាលអស្ចារ្យ មានទេពកោសល្យកម្ររកមានណាស់។ ហើយអនាគតនឹងក្លាយជាបុគ្គលអស្ចារ្យមិនខានទេ។ ក្មេងម្នាក់នេះមានសក្ដានុពលផ្នែកខួរក្បាលលើសពីសមត្ថភាពរបស់គ្រូទៅទៀត។ ដូច្នេះសាលាយើងគ្មានសមត្ថភាពបង្រៀនកូនអ្នកនោះទេ។ សូមអ្នកស្រីជាម្ដាយជួយបង្រៀនកូនដោយខ្លួនឯងផងចុះ”។
ម្ដាយរបស់លោក ថូម៉ាស់បានចំណាយពេលវេលាណែនាំកូនរបស់គាត់យ៉ាងយកចិត្តទុកដាក់ ចិញ្ចឹមកូនដោយក្ដីស្រឡាញ់ លើកការសរសើរ និងលើកទឹកចិត្ត… ទីបំផុតថូម៉ាស់បានក្លាយទៅជាអ្នកច្នៃប្រតិដ្ឋដ៏អស្ចារ្យម្នាក់ពិតប្រាកដមែន។
តាមពិតទៅក្នុងក្រដាសនោះលោកគ្រូបានសរសេរថា “សូមជូនចំពោះអ្នកម្ដាយថូម៉ាស់ អេឌីសុន ថា កូនប្រុសរបស់អ្នកជាសិស្សម្នាក់ដែលមានជំងឺសតិអារម្មណ៍យ៉ាងធ្ងន់ ដែលសាលារៀនរបស់យើងមិនអាចឱ្យគេរៀននៅសាលានេះបានទៀតទេ។ ចាប់ពីថ្ងៃនេះតទៅសាលាយើងខ្ញុំឈប់ទទួល ថូម៉ាស់ អេឌីសុន ទៀតហើយ។ សូមអ្នកស្រីជាម្ដាយជួយបង្រៀនកូនដោយខ្លួនឯងផងចុះ”។
ថូម៉ាស់បានដឹងរឿងនេះ នៅពេលដែលគាត់រៀបចំពិធីបុណ្យសពជូនម្ដាយជាទីស្រឡាញ់របស់គាត់ដែលបាត់បង់ជីវិតទៅហើយនោះ។ ពេលកំពុងធ្វើបុណ្យ គាត់បានប្រទះឃើញក្រដាសដែលសាលាផ្ញើមកឱ្យម្ដាយគាត់នៅជ្រុងថតតុរបស់គាត់ គាត់រើសយកមកអានទើបដឹងថា សមិទ្ធិផលដែលខ្លួនបានជោគជ័យ ដោយសារតែគាត់មានម្ដាយរបស់គាត់តែប៉ុណ្ណោះ។ នេះជាមេរៀនមួយដ៏មានតម្លៃថា ឪពុកម្តាយនិយាយលើកសរសើរខ្លួន កូននឹងមានកម្លាំងចិត្តខំរៀន។ ការបង្កើតភាពស្និទ្ធស្នាលដែលដើរកម្សាន្តជាមួយកូន ជាការបង្កើតក្តីស្រឡាញ់ដែរ៕ អត្ថបទដោយ៖ ទ្រ សុភាព