តម្រងនោមមានតួនាទីសំខាន់ណាស់ក្នុងការច្រោះកាកសំណល់ គ្រប់គ្រងជាតិទឹក អំបិល និងសារធាតុរាវផ្សេងៗក្នុងរាងកាយ។ នៅពេលតម្រងនោមចាប់ផ្តើមខ្សោយ មុខងារទាំងនោះនឹងរងការរំខានបន្ដិចម្ដងៗ ហើយរាងកាយនឹងបង្ហាញសញ្ញាប្រាប់យើង ដូច្នេះបើយើងមិនយកចិត្តទុកដាក់ចំពោះសញ្ញាតូចៗទាំងនេះអាចនឹងហួសពេលក្នុងព្យាបាលធ្វើឱ្យតម្រងនោមកាន់តែខូចខានធ្ងន់ធ្ងរ។ ដោយឡែកយោងតាមគេទំព័រ phunutoday មានសញ្ញា ៥ ដែលអ្នកគួរតែចាប់អារម្មណ៍៖
១. រមាស់ស្បែក និងឡើងកន្ទួលមិនដឹងមូលហេតុ៖ នៅពេលតម្រងនោមមិនអាចសម្អាតកាកសំណល់ដូចជា អ៊ុយ ក្រេអាទីនីន និងសារធាតុផូស្វ័រ ពួកវានឹងកកកុញនៅខ្លួន។ វាធ្វើឱ្យស្បែករមាស់ដល់ថ្នាក់មិនអាចគេងបាន ឬមានកន្ទួលក្រហមច្រើនជាពិសេសពេលយប់។ ទោះបីជាអ្នកប្រើក្រែម ឬថ្នាំលាបធម្មតាមិនអាចជួយបានដែរ ព្រោះមូលហេតុដើមមកពីរន្ធតម្រងនោមខ្សោយ។
២. ឈឺខ្នងផ្អែកខាងក្រោម រាលដាលដល់ត្រគាក ឬឆ្អឹងអាងត្រគាក៖ ការឈឺអាចរាលដាលទៅត្រគាក ឬផ្នែកខាងមុខនៃពោះ។ ជាធម្មតា មនុស្សជាច្រើនគិតថា វាជាការឈឺខ្នងដោយសារអង្គុយយូរ ប៉ុន្តែការឈឺរាលដាលចូលតំបន់ក្រលៀននេះអាចបង្ហាញថាតម្រងនោមកំពុងរងការខូចខាត។
៣. ដកដង្ហើមខ្លីៗ ឬពិបាកដកដង្ហើម៖ ពេលតម្រងនោមខ្សោយវានឹងធ្វើឱ្យសារធាតុរាវកកកុញនៅសួត និងមានភាពស្លេកស្លាំងធ្ងន់ធ្ងរ ធ្វើឱ្យរាងកាយពិបាកទទួលបានអុកស៊ីសែនគ្រប់គ្រាន់។ ដូច្នេះការដកដង្ហើមនិងលំបាក សូម្បីតែនៅពេលគេង ឬនៅពេលធ្វើការងារស្រាល។ អាការៈនេះគេច្រើនតែច្រឡំថា វាជាជំងឺបេះដូង ឬជំងឺសួត ប៉ុន្តែពិតប្រាកដកើតឡើងពីតម្រងនោម។
៤. ហើមជើង ដៃ មុខ ត្របកភ្នែក៖ ពេលតម្រងនោមខ្សោយមិនបញ្ចេញទឹក និងអំបិលចេញបានធាតុរាវនឹងប្រមូលផ្តុំនៅក្រោមស្បែក។ ជាទូទៅចង្កោមមុខ ហើយត្របកភ្នែកហើមពេលព្រឹក ហើមដៃនិងហើមជើង។ អាការៈបែបនេះវាស្រដៀងជាមួយជំងឺបេះដូង ឬថ្លើម ប៉ុន្តែបញ្ហាខូចតម្រងនោមក៏ជាមានអាការៈបែបនេះដែរ។
៥. ការប្រែប្រួលនៃទឹកនោម៖ មនុស្សដែលមានតម្រងនោមខ្សោយអាចនោមញឹកពេលយប់ច្រើនជាងធម្មតា ឬនោមតិចចម្លែក។ ទឹកនោមអាចមានពពុះ ឬមានក្លិនខ្លាំង។ ម្តងម្កាលវាអាចវាអាចនឹងមានឈាមបើចូលក្នុងដំណាក់កាលធ្ងន់ធ្ងរ។ ការផ្លាស់ប្តូរទាំងនេះបង្ហាញថាតម្រងនោមកំពុងប្រឈមការលំបាកក្នុងការត្រងជាតិរាវឱ្យបានប្រក្រតី។
ដូច្នេះប្រសិនបើអ្នក មានរោគសញ្ញាទាំងនេះចាប់ពីពីរ បី និងបន្តលើសពីពីរសប្តាហ៍ ត្រូវទៅពិនិត្យនៅមន្ទីរពេទ្យភ្លាមៗ។ ការធ្វើតេស្តឈាម ដូចជា creatinine និង eGFR រួមទាំងការតេស្តទឹកនោម និងអ៊ុលត្រាសោនតម្រងនោម អាចជួយរកឃើញជំងឺនៅដំណាក់កាលដំបូង។ នៅដំណាក់កាលទី១ ឬទី២ ជំងឺនេះអាចគ្រប់គ្រងបាន ហើយអាចជៀសវាងការលាងឈាមនៅពេលអនាគត៕
អត្ថបទដោយ៖ សារួ