ការគេងជាទម្លាប់ផ្តល់ពេលវេលាឱ្យរាងកាយមនុស្សយើងបានសម្រាក(សាកថាមពល) ហើយជួយជួសជុលរាងកាយឱ្យរឹងមាំឡើងវិញ បន្ទាបពីយើងប្រើវាពេញមួយថ្ងៃ។ ហើយក៏អនុញ្ញាតឱ្យខួរក្បាលប្រមូលផ្តុំការចងចាំដើម្បីបង្កើនជំនាញក្នុងការដោះស្រាយបញ្ហាមុតស្រួច និងស្តារជាលិការាងកាយការពារនឹងជំងឺកាចៗ ពេលអាយុច្រើនផងដែរ។ ប៉ុន្តែចំពោះអ្នកគេងតិច ហើយនៅក្រោយម៉ោង ១១យប់ មានបញ្ហាអ្វី?
យោងការសិក្សាផ្សាយក្នុងទស្សនាវដ្ដីវេជ្ជសាស្ត្រ Clinical Journal of the American Society of Nephrology (USA) បានបញ្ជាក់ថា អ្នកដែលគេងក្រោយម៉ោង ១១យប់ និងគេងតិចជាង ៦ម៉ោងក្នុងមួយយប់ មានហានិភ័យខ្ពស់នៃការកើតជំងឺតម្រងនោម។ មុខងារតម្រងនោមរបស់អ្នកនឹងថយចុះលឿនជាងអ្នកដែលគេងទៀងទាត់ ៧ ទៅ ៨ម៉ោង។ លទ្ធផលនៃការគេងយប់ជ្រៅ អាចនាំឱ្យមានជាតិស្ករក្នុងឈាមខ្ពស់ សម្ពាធឈាមឡើង ខ្លាញ់ឈាមមិនសមតុល្យ ហើយទាំងអស់នេះគឺជាកត្តាដែលបង្កឱ្យតម្រងនោមខ្សោយ។
សូម្បីលោកវេជ្ជបណ្ឌិត Ciaran McMullan ជំនាញសរសៃប្រសាទ និងនៅមន្ទីរពេទ្យ Brigham and Women's Hospital បានសិក្សាពីរបៀបគេងដែលប៉ះពាល់ដល់តម្រងនោមបានបញ្ជាក់ថា ការបញ្ចេញអរម៉ូន Melatoninជាអរម៉ូននៃការគេងមិនទៀងទាត់ធ្វើឱ្យរាងកាយមានការប្រែប្រួលនាំប៉ះពាល់ដល់មុខងារតម្រងនោមម្តងបន្តិចៗ រហូតបង្កជាបញ្ហាខូចតម្រងមិនអាចបញ្ចេញកាកសំណល និងបញ្ចេញជាតិពុលចេញពីរាងកាយ"។ នេះជាផលប៉ះពាល់ដល់តម្រងនោម បើអ្នកគេងមិនគ្រប់ ហើយគេងក្រោយម៉ោង ១១នោះ។ សូមអ្នកគេងឱ្យបានមួយយប់ ៨ម៉ោងល្អដល់តម្រងនោម និងកម្ចាត់ជាតិពុលចេញពីរាងកាយផងដែរ៕ អត្ថបទដោយ៖ ទ្រ សុភាព