មនុស្សមានសមត្ថភាព មានចំណូលច្រើន។ តើគេកសាងសមត្ថភាពដោយរបៀបណា? តាមលោក Robert Greene ជាអ្នកចិត្តសាស្រ្តបានលើកឡើងថា អ្នកត្រូវការរយៈពេលចាំបាច់ដើម្បីហ្វឹកហាត់ជំនាញមួយឱ្យស្ទាត់ ឱ្យឈានដល់កម្រិតកំពូល វាក៏អាស្រ័យលើកិច្ចការ និងទេពកោសល្យរបស់អ្នកដែរ។ ហើយអ្នកក៏ត្រូវស្រាវជ្រាវលើកិច្ចការរបស់ខ្លួនមិនក្រោម ១០,០០០ ម៉ោងនោះទេ។
ហើយលោកបានបន្តថា សម្រាប់តួលេខនេះជាចំនួនម៉ោងក្នុងការហ្វឹកហាត់ស្នាដៃឱ្យមានគុណភាព មានលទ្ធផល។ គោលការណ៍នេះអនុវត្តបានសម្រាប់អ្នកនិពន្ធបទភ្លេង កីឡាករអុក អ្នកនិពន្ធ អត្តពលិក និងផ្នែកផ្សែងផងដែរ។ ការហ្វឹកហាត់ដ៏ច្រើនសន្ធឹកសន្ធាប់ចំនួនម៉ោងនេះ ជាការផ្លាស់ប្តូរខួរក្បាលរបស់អ្នកឱ្យពូកែ។ លក្ខណៈពិសេសរបស់ខួរក្បាលចេះរៀបចំ និងគ្រប់គ្រងព័ត៌មានដ៏ច្រើនសម្បើមយ៉ាងមានរបៀបដែរ។
នេះជាមូលដ្ឋានចំណេះដឹងបានជ្រួតជ្រាបក្នុងផ្នត់គំនិតយ៉ាងពេញលេញខួរក្បាលអាចចាប់ផ្តើមបង្កើតគំនិតច្នៃប្រឌិតបានយ៉ាងសេរី។ ទោះបីចំនួនម៉ោងនេះហាក់ច្រើនក៏ដោយ វាស្មើនឹងការហ្វឹកហាត់ដោយផ្ចង់អារម្មណ៍ និងតាំងចិត្តអស់រយៈពេលពី ៧ ទៅ ១០ ឆ្នាំ ទើបអ្នកក្លាយជាអ្នកជំនាញពូកែម្នាក់ ហើយធ្វើកិច្ចការនឹងមានលទ្ធផល។
តាមលោក អារីស្តូត បានលើកឡើងថា ចូរអ្នករៀនដើម្បីធ្វើអ្វីមួយបាន គឺរៀនសូត្រតាមរយៈការអនុវត្តផ្ទាល់”។ ចូរឧទ្ទិសពេលវេលាមួយម៉ោងដើម្បីហ្វឹកហាត់ដោយការផ្តោតលើគោលដៅនៅថ្ងៃនេះ ថ្ងៃស្អែក ថ្ងៃបន្ទាប់ និងថ្ងៃបន្តបន្ទាប់ទៀត ទើបទឹកដៃរបស់អ្នកក្លាយជាអ្នកជំនាញ។ មនុស្សមានជំនាញមុត ចំណូលកើន៕ អត្ថបទដោយ៖ទ្រ សុភាព