យោងតាមគ្លីនិកសម្ផស្ស Cutis Laser Clinics នៅសិង្ហបុរី បានបង្ហាញថា ការថែរក្សាស្បែកតាមដំណាក់កាលនៃវដ្តរដូវ អាចជួយកាត់បន្ថយការឡើងមុន ពន្យាភាពចាស់ និងធ្វើឱ្យស្បែកមើលទៅក្មេងមានសំណើម។ ខាងក្រោមនេះគឺជាដំណាក់កាលក្នុងការថែទាំអំឡុងពេលមករដូវ៖

១. ដំណាក់កាលមករដូវ (ថ្ងៃទី 1–6)៖ នេះគឺជាពេលស្បែកងាយស្ងួត នៅដំណាក់កាលដំបូងនៃការមករដូវ អ័រម៉ូន Estrogen និង Progesterone មានកម្រិតទាបខ្លាំង។ ការថយចុះនេះធ្វើឱ្យស្បែកបាត់បង់សំណើម ស្ងួត ងាយក្រហម ងាយខូច និងមើលឃើញមានស្នាមជ្រួញច្បាស់ៗ។  អ្វីដែលត្រូវធ្វើ៖ លាងមុខជាមួយសាប៊ូឬហ្វូមស្រាលៗ បន្ទាប់មកត្រូវលាបម៉ូស្សូរ៉ាយសឺរដែលមានជាតិផ្តល់សំណើមខ្លាំង ដូចជា Hyaluronic Acid វាជួយបន្ថែមសំណើម ធ្វើឱ្យស្បែកទន់ និងបន្ថយការក្រហម។ ក្នុងដំណាក់កាលនេះ មិនគួរប្រើផលិតផលខ្លាំងៗដូចជា Retinol ឬ AHA/BHA ពីព្រោះអាចធ្វើឱ្យស្បែកឆាប់ខូច។ ជាពិសេស មុនពេលចេញពីផ្ទះ កុំភ្លេចឱ្យសោះលាបឡេការពារកម្ដៅ។

២. ដំណាក់កាល Follicular (ថ្ងៃទី 7–11)៖ ជាពេលដែលស្បែកស្រស់ថ្លា និងចាប់ផ្តើមធូរស្បើយ Estrogen ចាប់ផ្តើមកើនឡើងវិញ។ ការកើនឡើងនេះជួយដល់ស្បែកអាចស្ដារខ្លួន បង្កើនការផលិត Collagen និង Elastin ដែលជាគ្រឿងផ្សំធ្វើឱ្យទន់ និងក្មេងជាងវ័យ។  អ្វីដែលត្រូវធ្វើ៖ ក្នុងពេលដែលស្បែកកំពុងស្ដារខ្លួន គឺជាពេលសមរម្យដើម្បីខាត់ស្បែកស្រាលៗ។ ការខាត់ស្បែកជួយជម្រុះកោសិកងាប់ចេញ បើមិនដូច្នេះវានឹងធ្វើឱ្យស្ទះរន្ធញើសបង្កឱ្យកើតមុនបានងាយ។ បន្ទាប់ពីខាត់ស្បែក អ្នកអាចប្រើសេរ៉ូម Vitamin C ព្រោះនៅក្នុងពេលនេះស្បែកមិនងាយរលាកដូចដំណាក់កាលពេលមករដូវ។ Vitamin C ជួយបង្កើនភាពភ្លឺថ្លា កាត់បន្ថយភាពចាស់ និងការខូចខាតពីពន្លឺថ្ងៃ។

៣. ដំណាក់កាលបញ្ចេញពងអូវុល (ថ្ងៃទី 12–16)៖ ជាពេលស្បែកភ្លឺថ្លា នៅពេល Estrogen ឡើងដល់កំពូល ស្បែកភាគច្រើននឹងស្រស់ស្អាតចម្លែក ភ្លឺថ្លា ទន់ និងមើលទៅស្អាតជាងធម្មតា តែក៏មានឡើងខ្លាញ់តិចតួច និងមានកន្ទួលខ្លះៗដោយសារស្បែកមានជាតិប្រេងច្រើនជាងធម្មតា ហើយបើលាងមុខមិនទៀងទាត់ទៀត សារធាតុកខ្វក់ ឬគ្រឿងសម្អាងងាយធ្វើឱ្យស្ទះរន្ធញើស។

ក្នុងដំណាក់កាលនេះ អ្នកគួរជៀសវាង Makeup ក្រាសៗបើចាំបាច់កុំប្រើ BB cream, CC cream ឬម្សៅដែលងាយធ្វើឱ្យស្ទះរន្ធញើស។ ជម្រើសល្អត្រូវសម្អាតមុខឱ្យបានស្អាតនៅពេលព្រឹក ល្ងាច ដើម្បីយកជាតិប្រេងចេញ និងកម្ចាត់ធូលីដីចេញពីស្បែកមុខ។

៤. ដំណាក់កាល Luteal (ថ្ងៃទី 17–28)៖ នៅដំណាក់កាលនេះ កម្រិតអរម៉ូន Progesterone កើនឡើង ដែលជួយរៀបចំស្រទាប់ស្បូនសម្រាប់ការមានផ្ទៃពោះក្នុងករណីអ្នកមានដៃគូ។ ការកើនឡើងនៃ Progesterone អាច បណ្តាលឱ្យក្រពេញសេប៉ូម របស់អ្នកផលិតប្រេងច្រើនជាងធម្មតា ដែលបណ្តាលឱ្យអ្នកនឹងកើតមុន មុនពេលមករដូវម្ដងទៀតនៅខែបន្ទាប់។ ញឹកញាប់គេឃើញមានឡើងកន្ទួលតូចៗ ឬមុនធំៗ ក្រហម ឈឺ ហើយលេចត្រង់តំបន់ចង្កា ថ្ពាល់ ក្បាលចុងច្រមុះ។

ដើម្បីគ្រប់គ្រងស្បែកនៅពេលនេះ អ្នកគួរលាងមុខឱ្យបានស្អាតរាល់ថ្ងៃ ហើយប្រើទឹកសម្អាតដែលមាន Salicylic Acid (BHA) ដែលអាចរំលាយប្រេង និងស្ទះនៅក្នុងរន្ធញើសបានល្អ។ វាជួយបន្ថយមុន កាត់បន្ថយក្រហម និងបញ្ឈប់មុនមិនឱ្យធំ។ ការប្រើ Clay Mask ១ ទៅ ២ ដងក្នុងមួយសប្ដាហ៍ក៏អាចជួយសម្អាតជាតិប្រេង និងធូលីចេញពីស្បែកបានយ៉ាងមានប្រសិទ្ធភាព។ អ្វីដែកចាំបាច់កុំឧស្សាហ៍យកដៃទៅប៉ះ ឬញិចមុន ដើម្បីជៀសវាងស្នាមខ្មៅ និងស្នាមជាំ។

ការប្រែប្រួលអ័រម៉ូនក្នុងវដ្តរដូវអាចប៉ះពាល់ដល់ស្បែកយ៉ាងច្រើន ប៉ុន្តែបើអ្នកយល់ពីដំណាក់កាលនីមួយៗ ឱ្យបានត្រឹមត្រូវ អ្នកអាចថែទាំស្បែកបានត្រឹមត្រូវទាន់ពេលវេលា។ វាមិនត្រឹមតែជួយកាត់បន្ថយមុនដែលឡើងរាល់ខែទេ ប៉ុន្តែក៏ជួយឱ្យស្បែកភ្លឺថ្លា មានសំណើម និងមើលទៅក្មេងជាងវ័យផងដែរ៕

អត្ថបទដោយ៖ សារួ