១. ទម្លាប់ខំធ្វើឱ្យអស់ពីសមត្ថភាព៖ មានហេតុផលមួយដើម្បីអ្នកធ្វើការអ្វីឲ្យអស់ពីសមត្ថភាពគឺពេលអអ្នកប្រឹងឱ្យអស់១០០% អ្នកកាន់តែមានសេចក្តីរីករាយ។ អ្នកនៅចាំទេថា តើមានអារម្មណ៍បែបណាពេលអ្នកកំពុងដើរទៅសាលាជាមួយថ្ងៃដែលអ្នកខំធ្វើកិច្ចការសាលាអស់ពីសមត្ថភាពនោះគឺអ្នកមានអារម្មណ៍រីករាយ និងទំនុកចិត្តលើខ្លួនឯង។ គំនិតមួយនេះវាក៏ដូចគ្នាចំពោះការងារដែរ ពេលអ្នកខំប្រឹង អ្នកនឹងមានក្តីរីករាយមិនខានឡើយ។

២. ក្នុងពេលនេះ៖ បើអ្នករស់នៅក្នុងអតីតកាល និងអនាគតនោះ ចិត្តរបស់អ្នកគ្មានក្តីសុខទេ។ ចិត្តរស់នៅក្នុងអតីតកាល ធ្វើឱ្យអ្នកគិតពីរឿងដែលកន្លងហួស នាំឱ្យអ្នកឈឺចាប់ខ្លាំងឡើង។ បើអ្នករស់នៅក្នុងអនាគតនោះ វាធ្វើឱ្យអ្នកកើតចិត្តទុក្ខព្រួយច្រើនឡើង។ តាមលោកគ្រូ នឹម ឈុន្នី បានលើកឡើងថា មនុស្សដែលរីករាយបំផុត ជាអ្នកដែលចេះរស់នៅជាមួយបច្ចុប្បន្ន។ ជីវិតរបស់អ្នក​មានថាមពលខ្លាំងណាស់ បើអ្នកចេះរស់នៅជាមួយបច្ចុប្បន្នកាលដែលពោរពេញទៅដោយភាពវិជ្ជមាន និង​​ចេះរីករាយនៅគ្រប់ដំណាក់កាលនៃជីវិតរបស់ខ្លួន”។

៣. គិតវិជ្ជមាន៖ ការរៀនមើលអ្វីៗ ក្នុងផ្លូវល្អជាការស្ថាបនាសេចក្តីសុខចូលក្នុងជីវិតរបស់អ្នកកាន់តែច្រើន។ នេះជាសម្តីលោក ម៉ារទីន សេលិកម៉ែន សូម្បីនៅក្នុងសៀវភៅ Learned Optimism របស់លោកក៏បានបញ្ជាក់បន្ថែមថា ពេលអ្នកងើបពីការដួល ការបរាជ័យ និងការឈឺចាប់អ្វីមួយ មិនមែនការជម្នះលើអារម្មណ៍ផ្លូវចិត្តនោះទេ ប៉ុន្តែជាការសម្លឹងមើលជីវិតជាថ្មីក្នុងផ្លូវវិជ្ជមានដោយគិតថា ការដួលក្នុងជីវិតនេះ គ្រាន់តែជាមួយរឿងមួយកើតឡើងមួយរយៈពេលខ្លី រួចក៏រលាយបាត់ទៅវិញហើយ។” អ្នកអាចគិតមើលថា តើបញ្ហារាប់រយចូលមកក្នុងជីវិតអ្នកនេះ មានបញ្ហាមួយណាជាការពិត? គឺគ្មានទេ វាតែងរសាតតាមខ្យល់រហូត។ ការគិតបែបនេះ នាំឱ្យរឿងល្អៗ ក៏ចូលមកក្នុងជីវិតអ្នក៕ អត្ថបទដោយ៖ ទ្រ សុភាព