បញ្ហាធំបំផុតរបស់មនុស្សស្រីគ្រប់រូបគឺភាពឆាប់ចាស់ មនុស្សស្រីមានការវិវត្តទៅរកភាពចាស់លឿនជាបុរស ពីព្រោះស្រីជាភេទដែលមានការប្រែប្រួលអរម៉ូនច្រើន និងញឹកញាប់ជាងបុរស។ ជាពិសេសនៅពេលដែលស្រ្តីឈានចូលដល់វ័យអស់វ័យរដូវ ប្រសិនជាមិនបានយកចិត្តទុកដាក់ថែទាំទេនោះ សម្រស់ក៏ដូចជារូបរាងរបស់ស្រ្តីគឺឆាប់ចាស់ ឆាប់ជ្រីវជ្រួញបំផុត។

ជាការពិតណាស់ ចំណុចដែលស្រ្តីត្រូវយកចិត្តទុកដាក់ខ្លាំងបំផុតចាប់តាំងពីវ័យមានវដ្តរដូវដំបូង រហូតដល់វ័យក្រោយអស់វដ្តរដូវ គឺត្រូវយកចិត្តទុកដាក់ទៅលើ របបអាហារ និហទម្លាប់ក្នុងការគេង ពីព្រោះរឿង២នេះសំខាន់ខ្លាំងណាស់សម្រាប់ស្រ្តីគ្រប់រូប។

បើតាមការបញ្ជាក់ពីគេងទំព័រ everydayhealth បានណែនាំថា បើស្រ្តីចង់ថែរក្សាសម្រស់ឱ្យនៅក្មេងបានយូរ សាច់ចាំ មិនងាយចាស់ជ្រីវជ្រួញគឺត្រូវទម្លាប់ក្នុងការគេងឱ្យបានត្រឹមត្រូវដូចខាងក្រោម៖

ទម្លាប់គេង៥ក្បួន

១. គេងឱ្យត្រង់ខ្លួន៖ ការគេងត្រង់ខ្លួន គឺវាជួយធ្វើឱ្យរចន្តឈាមនៅក្នុងខ្លួនរបស់អ្នករត់បានល្អ និងបញ្ជូនឈាមទៅគ្រប់សារពាង្គកាយនៅក្នុងខ្លួន ជួយធ្វើឱ្យស្បែកមានសុខភាពល្អ និងមិនងាយជ្រីវជ្រួញផងដែរ។

២. ហាមគេងចំហៀង៖ អ្នកមិនត្រូវគេងចំហៀង ឬគេងផ្កាប់មុខជាដាច់ខាត ពីព្រោះការគេងបែបនេះប្រៀបដូចជាអ្នកបានដាក់បន្ទុកទៅលើផ្ទៃមុខរបស់អ្នកអ៊ីចឹង។ នៅពេលដែលអ្នកគេងចំហៀង គឺធ្វើឱ្យស្បែកមុខរបស់អ្នកទៅផ្អឹបជាប់ជាមួយស្រោមខ្នើយ ហើយទម្ងន់ផ្នែកក្បាល និងផ្នែកខ្លួនខាងលើរបស់អ្នកត្រូវបានទ្រដោយផ្ទៃមុខ ជាហេតុធ្វើឱ្យស្បែកមុខឆាប់កើតនូវស្នាមជ្រួញ និងទៅជាជាំបានប្រសិនជាអ្នកមិនបញ្ឈប់គេងចំហៀងទេនោះ។ មួយវិញទៀត ការគេងចំហៀង ឬគេងផ្កាប់មុខ គឺវាធ្វើឱ្យរចន្តឈាមរបស់អ្នករត់មិនបានល្អនោះទេ ជាហេតុធ្វើឱ្យប៉ះពាល់ទៅដល់សុខភាពផងដែរ។

៣. ការជ្រើសរើសស្រោមខ្នើយ៖ ស្រោមខ្នើយដែលល្អ និងមិនធ្វើឱ្យប៉ះពាល់ទៅដល់ស្បែកមុនគឺជាស្រោមខ្នើយដែលធ្វើអំពីកប្បាសឬសរសៃសូត្រ ដែលមានសភាពទន់ និងរលោង។ ប្រសិនជាអ្នកមិនអាចទិញស្រោមខ្នើយកប្បាសឬសូត្រមិនបាន អ្នកអាចប្រើស្រោមខ្នើយប្រភេទផ្សេងក៏បានឱ្យតែមានសភាពទន់រលោង មិនធ្វើឱ្យកកិតស្បែក។ មួយវិញទៀត ការសម្អាតស្រោមខ្នើយគឺសំខាន់បំផុត ១សប្តាហ៍ត្រូវបោកស្រោមខ្នើយយ៉ាងហោចណាស់ក៏២ដងដែរដើម្បីកម្ចាត់ជាតិកខ្វក់និងធូលីដីដែលទុំជាប់។

៤. របៀបប្រើផលិតផលមុនចូលគេង៖ ការថែរក្សាស្បែកមុខនៅពេលយប់គឺសំខាន់បំផុត ពីព្រោះស្បែកមុខរបស់អ្នកកត្រូវរងជាមួយកម្តៅថ្ងៃ ជាតិកខ្វក់ និងធូលីដីពេញមួយថ្ងៃហើយ ដូច្នេះពេលយប់ជាពេលដែលត្រូវស្រោចស្រង់និងព្យាបាលស្បែកមុខមកវិញ។ អ្នកគួរជ្រើសប្រើផលិតផលដែលមានសារធាតុផ្សំចេញពីវីតាមីនA និងវីតាមីន C ឱ្យបានច្រើនបំផុតពីព្រោះវាមានតួនាទីជួយជួសជុលស្បែកដែលខូចដោយសារកម្តៅថ្ងៃឬជាតិកខ្វក់ឱ្យប្រសើរឡើងវិញ។ ជួយបង្កើនការផលិតខូឡាជែលដល់ស្បែក បង្រួមរន្ធញើស និងការពារកុំឱ្យមានស្នាមជ្រីវជ្រួញ រួមទាំងពន្យាភាពចាស់ផងដែរ។

៥. គេងឱ្យបាន៧ទៅ៩ម៉ោង៖ ដើម្បីគេងបានរយៈពេល៧ទៅ៩ម៉ោងក្នុង១យប់ អ្នកត្រូវចូលគេងចាប់ពីម៉ោង៩ដល់ម៉ោង៥ព្រឹក ឬចាប់ពី១០យប់ដល់ម៉ោង៦ព្រឹក។ ការគេងពេញម៉ោង និងគ្រប់គ្រាប់បែបនេះគឺជួយធ្វើឱ្យស្បែករបស់យើងមានពេលសម្រាកបានគ្រប់គ្រាន់ សុខភាពល្អ និងពន្យាភាពចាស់បានមួយកម្រិតផងដែរ។

របបអាហារ៣ប្រភេទសំខាន់

១. អាហារខូឡាជែន៖ ជាអាហារមួយប្រភេទដែលមានតួនាទីជួយទប់ស្កាត់ភាពជ្រីវជ្រួញនៅលើស្បែក ជួយឱ្យស្បែកមានសភាពតឹងណែន និងមានសំណើម។ មិនតែប៉ុណ្ណោះចំពោះបុគ្គលណាដែលចូលចិត្តបរិភោគអាហារខូឡាជែននេះជាប្រចាំគឺវាជួយទប់ស្កាត់ភាពចាស់បានទៀតផង។ ជាមួយគ្នានេះដែរអាហារខូឡាជែនគឺមាននៅក្នុង ត្រី សាច់គោ សាច់ទ្រូងមាន់ បន្លែបៃតង ម្ទេសប្លោក ប៉េងប៉ោះ ក្រូច ត្របែក ទំពាំងបាយជូរ សណ្តែក គ្រាប់ស្វាយចន្ទី។

២. អាហារវីតាមីន៖ អាហារវីតាមីនជាប្រភេទអាហារដែលរាងកាយ ក៏ដូចជាស្បែកត្រូវការបំផុត កាលណារាងកាយខ្វះវីតាមីនគឺវាធ្វើឱ្យស្បែកឆាប់ជ្រីវជ្រួញ ឆាប់ចាស់មុនអាយុ ហើយសុខភាពក៏មិនល្អ រឹងមាំដែរ។ ជាពិសេសទៅទៀតនោះ វីតាមីនដែលមិនអាចខ្វះបានគឺពពួកវីតាមីន C និងវីតាមីន E ដែលមានដូចជា ផ្លែក្រូច ដំឡូង ប្រូខូលី ម្ទេសប្លោក ស្ពៃស្ពីណាច ស្ត្របឺរី ប៉េងប៉ោះ ប្រេងបន្លែ បន្លែស្លឹកបៃតង គ្រាប់ធញ្ញជាតិ...ជាដើម។

៣. ទឹក៖ ទឹកគឺមានសារសំខាន់បំផុតក្នុងរាងកាយ កាលណារាងកាយខ្វះជាតិទឹកគឺគ្រឿងក្នុងទាំងអស់ក្នុងរាងកាយមិនអាចដំណើរការបានប្រក្រតីនោះទេ។ ជាពិសេសគឺផ្តល់ផលប៉ះពាល់ខ្លាំងទៅដល់ស្បែក។ ស្រ្តីត្រូវមានទម្លាប់ផឹកទឹកឱ្យបានគ្រប់គ្រាន់ជារៀងរាល់ថ្ងៃ ប្រសិនជាចង់ដឹងថាមួយថ្ងៃត្រូវផឹកទឹកប៉ុន្មានទើបគ្រប់គ្រាន់គឺអ្នកអាចគណនាបាន ដោយយកទម្ងន់គីឡូសរុបចែកនឹង៣០។ ឧទាហណ៍៖ អ្នកមានទម្ងន់៤០គីឡូ ចែកនឹង៣០ ឃើញថាមួយថ្ងៃអ្នកត្រូវផឹកទឹកឱ្យបានចន្លោះ ១លីត្រកន្លះ៕

អត្ថបទដោយ៖ មឿន គន្ធា