ខាងលើជាគំរូបរាជ័យមួយ កុំឱ្យអ្នកផុងជើងជាន់រណ្តៅដដែលៗ នាំតែខាតពេលវេលាច្រើនក្នុងជីវិតរបស់អ្នក។ ខ្ញុំចង់ប្រាប់អ្នកថា អនាគតមនុស្សមិនវែងទេ បើអ្នកឈានដល់អាយុ៣៥ ទៅ៤០ឆ្នាំហើយគ្មានសមត្ថភាព គ្មានលទ្ធផលទប់លំនឹងក្នុងជីវិតទេ ការបន្តសាងអនាគតក៏ពិបាកដែរ ព្រោះអ្នកគ្មានពេលសាងអនាគតដូចពេលអ្នកនៅវ័យក្មេងនៅមានកម្លាំងឡើងកនោះទេ។ ដើម្បីកុំឱ្យខាតអនាគតរបស់អ្នក ខ្ញុំសូមលើកគំរូមហាសេដ្ឋី អេឡូន ម៉ាស ជាគំរូសាងអនាគតសាងលទ្ធផលឱ្យអ្នកចំណេញជីវិតច្រើនណាស់។ 

លោក ម៉ាស មិនមែនត្រឹមតែជាសហគ្រិនម្នាក់ទេ ជាអ្នកជំនាញមើលអនាគតម្នាក់ថែមទៀត។ គាត់មើលអនាគត Tesla បានពិភាក្សាគ្នាជាមួយសហស្ថាបនិកទាំងពីរនាក់ហើយ គាត់ចាប់ឱកាសធ្វើការវិនិយោគដើម្បីកើបចំណូលពេលអនាគត។ ក្រុមហ៊ុន Tesla បង្កើតឡើងនៅឆ្នាំ២០០៣ ផលិតឡានអគ្គិសនី ពេលនោះគ្មានទីផ្សារទេ។ បើដឹងថាគ្មានទីផ្សារហើយ ហេតុអ្វីលោក ម៉ាស វិនិយោគជាមួយក្រុមហ៊ុន Tesla? គាត់វិនិយោគទៅលើអនាគត។

លោក ម៉ាស ហ៊ានដាក់លុយវិនិយោគដំបូងចំនួន ៦លានដុល្លារ គាត់គិតថាមនុស្សនឹងងាកមកប្រើឡានអគ្គិសនី វាជួយចំណេញលុយពួកគាត់ជាងប្រើឡានសាំង។ ហើយពេលក្រោយៗ គាត់បានដាក់លុយរាប់សិបលានដុល្លារចូលបន្ថែមជាមួយ Tesla ព្រោះតែគាត់មានជំនឿលើអនាគត Tesla។ ទោះបីមនុស្សភាគច្រើនគ្មានជំនឿលើ Tesla គ្មានទីផ្សារ គ្មានអនាគតក៏ដោយ ក៏គាត់នៅបន្តធ្វើការជាមួយ Tesla គ្មានឱ្យនរណាមកលួចជំនឿចេញពីខ្លួនគាត់ទេ។

លោក ម៉ាស ព្យាយាមធ្វើគ្រប់យ៉ាង អ្វីមិនគួរឱ្យជឿនោះ គាត់ធ្វើការច្រើន ដេកតិចបំផុត។ គាត់ចាប់ផ្តើមតឹងលើរឿងការចាយលុយ ទិញអ្វីដែលសំខាន់ចាំចាយ។ ហើយគាត់ធ្វើការយ៉ាងតឹងតែងជាមួយវិស្វករ ជាមួយអ្នកឌីហ្សាញ និងបុគ្គលិកគ្រប់ផ្នែកដើម្បីដាស់ព្រលឹងគុណភាពការងារឡើង។

ហើយការព្យាយាមគ្រប់គ្រងលើខ្លួនឯង ហើយជម្រុញខ្លួនរស់ក្នុងពលិកម្មជារឿងវេទនាបំផុត។ តែរឿងអស្ចារ្យគាត់អាចព្យាបាលជំងឺអនាគត Tesla ឱ្យជា ឱ្យរស់មានព្រលឹងឡើងវិញពិតមែន។ មកដល់ពេលនេះ ឆ្នាំ២០២៥ ក្រុមហ៊ុន Tesla ក្លាយជាក្រុមហ៊ុនឡានដែលមានតម្លៃហ៊ុនថ្លៃជាងគេ។ អ្នកត្រូវចាំថា ពេលអ្នកដឹកនាំតឹងតែងនៅថ្ងៃនេះ អនាគតអារម្មណ៍អ្នកនឹងធូរ បើអ្នកដឹកនាំធូរនៅថ្ងៃនេះ អនាគតអាជីវកម្មរបស់អ្នកនឹងតឹងចិត្តបំផុត៕ អត្ថបទដោយ៖ ទ្រ សុភាព