មនុស្សយើងគ្មានអ្នកណា ចង់មានសម្រស់អាក្រក់នោះទេ តែបើយើងគ្មានទម្លាប់ល្អធ្វើជាប្រចាំថ្ងៃនោះទេ ធ្វើឱ្យកើតជំងឺ និងបាក់សម្រស់លឿនផងដែរ។ ពិសេសក្នុងសង្គមរបស់យើង មានមនុស្សភាគច្រើនមានសម្រស់ជាងវ័យ មកទម្លាប់មិនល្អមួយចំនួនដូចខាងក្រោមនេះ។ ថ្ងៃនេះ ចាបបៃតងសុំលើកពីទម្លាប់ល្អ ដែលងាយស្រួលអនុវត្តជាប្រចាំថ្ងៃ ដើម្បីថែសម្រស់ កុំឱ្យចាស់លឿន៖

នៅក្នុងសង្គមរបស់យើង អ្នកដែលលចូលចិត្តផឹកស្រា និងភេសជ្ជៈជាតិផ្អែមលើសពីតម្រូវការរាងកាយ ធ្វើឱ្យកោសិកាស្បែកឆាប់ចាស់ និងធាត់លឿនផងដែរ។ តាមលោកគ្រូ រក្សា ជាគ្រូបង្វឹកផ្នែកការហាត់ប្រាណជាច្រើនឆ្នាំបាននិយាយថា “បើអ្នកចង់ថែសម្រស់ កុំឱ្យឆាប់ចាស់នោះ អ្នកត្រូវជៀសវាងជាតិអាកុល និងកុំផ្តោតលើហូបអាហារមានជាតិខ្លាញ់ពេក ធ្វើឱ្យឡើងកីឡូលឿន ហើយមើលទៅឆាប់ចាស់ជាងវ័យផងដែរ។” សូម្បីតាមវេជ្ជបណ្ឌិត សុខទេពី បានបង្ហើបបន្ថែមថា កត្តាចំណីអាហារក៏ជាផ្នែកមួយដែលធ្វើឱ្យ ស្បែកឆាប់ឡើងមុនផងដែរ។ ពោល គឺពពួកអាហារផ្អាប់ អាហារដែលមានជាតិហឹលខ្លាំង អាហារដែលមានជាតិផ្អែមឬ​ ប្រៃខ្លាំង និងពពួកគ្រឿងស្រវឹងជាដើម។”

សម្រាប់អាហារដែលជួយសម្រស់ កុំឱ្យឆាប់ចាស់លឿននោះ តាមលោកគ្រូ រក្សាបានណែនាំឱ្យហូបប្រភេទអាហារមានដូចជា បន្លែបែតង ស្ពៃ ត្រកួន ត្រសក់ ការរ៉ុត.. ផ្លែឈើ មានផ្លែប៉ោងខៀវ ផ្លែចេក ផ្លែល្ហុង.. ស៊ុត សាច់ត្រី ដូចជាត្រីស្រែរបស់យើង...។ ការហូបប្រភេទបន្លែ និងផ្លែឈើឱ្យច្រើន វាមិនប៉ះពាល់ដល់ស្បែកទេ តែវាជួយសម្រស់ និងស្បែកស្អាតផងដែរ។”

ហើយយើងត្រូវការទម្លាប់មួយទៀត គឺផ្នែកហាត់ប្រាណជាប្រចាំថ្ងៃ។ តាមលោកគ្រូ រក្សា បានបញ្ជាក់ថា “ការធ្វើលំហាត់ប្រាណនេះ ជួយឱ្យកាត់បន្ថយស្រ្តេស នាំឱ្យគេងលក់ស្រួល រួចហើយនាំឱ្យស្បែក និងសម្រស់ក្មេងជាងវ័យ មកពីវាជួយបញ្ចេញជាតិពុលពីរាងកាយ។”លោកស្រីវេជ្ជបណ្ឌិត Ellen Marmur បាននិយាយថា“ការធ្វើលំហាត់ប្រាណជួយដល់ឈាមផ្ទុកទៅដោយអុកស៊ីសែន និងសារធាតុចិញ្ចឹមដល់កោសិកា ដែលកំពុងធ្វើការនៅទូទាំងខ្លួនរាងកាយ រួមទាំងស្បែក និងសម្រស់វ័យក្មេងផងដែរ។”

ដូចនេះ ការថែរក្សាសម្រស់ឱ្យស្អាត និងសម្រកគីឡូឱ្យបានលឿននោះ អ្នកត្រូវមានចំណុចបន្ថែមទៀត មានដូចជាការគេងឱ្យបានគ្រប់គ្រាន់មួយថ្ងៃ ៨ម៉ោង ធ្វើលំហាត់ប្រាណជាប្រចាំ ហូបទឹកឱ្យបានគ្រប់គ្រាន់ និងរបបអាហារមានជាតិប្រូតេអ៊ីន ដើម្បីសុខភាពរឹងមាំ ហើយអ្នករស់នៅបានយូរផងដែរ៕ អត្ថបទដោយ៖ ទ្រ សុភាព