បច្ចុប្បន្នអូមីក្រុងកំពុងធ្វើការវាយលុកខ្លាំងជុំវិញពិភពលោក ហើយក៏បានឆក់យកជីវិតមនុស្សជាច្រើនរួចហើយដែរ ក្នុងនោះក៏មានអ្នកស្ថិតក្នុងស្ថានភាពសុខភាពទន់ខ្សោយនិងផ្ទុកជំងឺធ្ងន់ៗមួយចំនួនផងដែរ ដែលនេះជាហេតុបងប្អូនគួរយកចិត្តទុកដាក់មើលថែសុខភាពឱ្យបានខ្លាំងបំផុតដើម្បីបំប៉នរាងកាយឱ្យខ្លាំងក្លាប្រឆាំងនឹងវីរុសបំប្លែងថ្មីៗនេះឱ្យបាន។

តាមការឱ្យដឹងពី .hindustantimes.com បានបង្ហាញថាវីតាមីឌី អាចជួយឱ្យប្រព័ន្ធការពាររាងកាយ កាន់តែរឹងមាំ ដែលអាចជួយទប់ទល់ការវាយលុកពីវីរុសបំប្លែងថ្មីអូមីក្រុងបាន។ តាមការបញ្ជាក់ពីCoutinho និយាយថា វីតាមីន D មានសារៈសំខាន់សម្រាប់មុខងារប្រព័ន្ធភាពស៊ាំ និងការស្តារឡើងវិញនូវចំណុចខ្វះខាតមួយចំនួនរបស់រាងកាយ ហើយមនុស្សគ្រប់គ្នាគួរពិនិត្យមើលដែរថាតើអ្នកមានកម្រិតជាតិវីតាមីនសំខាន់នេះក្នុងខ្លួនគ្រប់គ្រាន់ដែរឬទេ។

វីតាមីនឌីក៏ត្រូវបានគេសិក្សាឃើញថាមានសារៈសំខាន់ចំពោះអារម្មណ៍របស់យើងផងដែរ រួមទាំងអាចកាត់បន្ថយបញ្ហាជ្រុះសក់ថែមទៀត ដោយមិនអាចខ្វះបានឡើយ។ចំពោះវីតាមីនឌីនេះ យើងអាចស្រូបយកពីពន្លឺព្រះអាទិត្យដែលជាវិធីងាយបំផុត។មួយផ្នែកទៀតវីតាមីនឌីក៏មានលាក់ខ្លួនក្នុងចំណីអាហារមួយចំនួនដូចជា សាច់ក្រសម ស៊ុត ត្រីសាម៉ុន ផ្សិត ក្រូច និងទឹកដោះគោមួយចំនួនផងដែរ ។

ភាគច្រើនអ្នកជំនាញណែនាំឱ្យទទួលពន្លឺព្រះអាទិត្យឱ្យបានគ្រប់គ្រាន់ជាប្រចាំព្រោះវីតាមីននេះ ដើរតួចាំបាច់ខ្លាំងណាស់ចំពោះរាងកាយទាំងមូល។

ពាក់ព័ន្ធនឹងការពង្រឹងប្រព័ន្ធភាពសុំាប្រភពដដែលបានបញ្ជាក់ដែរថាទម្លាប់មួយចំនួនដែលត្រូវមានជាប្រចាំដើម្បីពង្រឹងនិងកុំឱ្យប្រព័ន្ធភាពសុំាចុះខ្សោយ យើងគ្រប់គ្នាត្រូវ ទទួលទានដំណេកឱ្យគ្រប់ ញុំាទឹកកុំឱ្យខ្វះ ញុំាអាហារមានជីវជាតិគ្រប់គ្រាន់និងអនាម័យជានិច្ច ធ្វើលំហាត់ប្រាណបញ្ចេញញើសជាប្រចាំ និងធ្វើលំហាត់ដង្ហើមសមាធិជាដើម។

យ៉ាងណាមិញសូមបងប្អូនប្រជាជនយើងកុំភ្លេចឱ្យសោះនូវការចាក់វ៉ាក់សុំាងដូសជំរុញ ប្រសិនបើដល់ពេលកុំណត់ត្រូវចាក់ និងរក្សាការពារខ្លួនតាម៣កុំ៣ការពារទាំងអស់គ្នាព្រោះវីរុសកូវីដបំប្លែងខ្លួនជាប់ជានិច្ច។

អត្ថបទដោយ៖ ភោគ ម៉ារី