តម្រងនោមមានសុខភាណល្អ គ្មានជំងឺ គ្មានមេរោគ នៅពេលដែលអ្នកផឹកទឹកបានត្រឹមត្រូវគ្រប់ចំនួន មិនលើសមិនខ្វះ។ មានមតិជាច្រើនតែតែលើកឡើងថាការផឹកទឹកច្រើនគឺល្អចំពោះសុខភាព ប៉ុន្តែបើសិក្សាឱ្យដល់ទៅការផឹកទឹកច្រើនលើសកម្រិតលើសពីគីឡូដែលខ្លួនឯងមានគឺមិនល្អចំពោះសុខភាពនោះទេ ថែមទាំងប៉ះពាល់ខ្លាំងទៅដល់តម្រងនោមថែមទៀតផង។

ជាការពិតណាស់ យោងតា​មការបញ្ជាក់ពីគេហទំព័រ kidney.org បានឱ្យដឹងថា មនុស្សម្នាក់ៗមានគីឡូខុសៗពីគ្នា អ្នកខ្លះធាត់ អ្នកខ្លះស្គម ដូច្នេះសម្រាប់បរិមាណទឹកដែលត្រូវផឹក គឺបុគ្គលដែលធាត់មិនអាចផឹកទឹកបរិមាណដូចអ្នកស្គមបានទេ ហើយអ្នកដែលស្គមក៏មិនអាចផឹកទឹកដូចអ្នកធាត់បានដែរ។ យោងតាមវិទ្យាស្ថានវេជ្ជសាស្ត្របានប៉ាន់ប្រមាណថា បុរសពេញវ័យ ត្រូវការទឹកប្រហែល ១៣ ពែងក្នុង១ថ្ងៃ ស្មើនឹង ៣លីត្រ។ ស្ត្រីពេញវ័យត្រូវការជាតិទឹកប្រហែល ៩ ពែងក្នុង១ថ្ងៃ ស្មើនឹង ២.២ លីត្រ។ វិធីកាន់តែជាក់លាក់មួយទៀតនោះគឺ ដើម្បីដឹងថារាងកាយរបស់អ្នកត្រូវការផឹកទឹកប៉ុន្មានលីត្រក្នុង១ថ្ងៃ អ្នកត្រូវយកគីឡូសរុបរបស់អ្នកទៅចែកជាមួយ៣០។ ឧទាហរណ៍៖ ប្រសិនអ្នកមានគីឡូ ៥០គីឡូ ចែកនឹង៣០ ស្មើ ១.៦៦ មានន័យថារាងកាយរបស់អ្នកត្រូវការទឹកចាប់ពី ១លីត្រកន្លះ ទៅ២លីត្រក្នុង១ថ្ងៃ។

បរិមាណទឹកដែលគ្រោះថ្នាក់សម្រាប់តម្រងនោមចំពោះមនុស្សពេញវ័យ

ទាំងបុរសនិងស្រ្តីពេញវ័យប្រសិនជា១ថ្ងៃ ផឹកទឹកក្រោម១លីត្រ គឺសុខភាពតម្រងនោមនឹងមានបញ្ហាហើយ អាចប្រឈមជាមួយជំងឺជាច្រើនប្រភេទទាំងវ័យក្មេង។ ទន្ទឹមនឹងនេះដែលបុរសនិងស្រ្តីដែលផឹកទឹកលើសចំនួន ១ថ្ងៃផឹកលើសពី៤លីត្រឡើងទៅក៏ប៉ះពាល់ងាយខូចតម្រងនោមដែរ។ ពីព្រោះ នៅពេលដែលអ្នកផឹកទឹកច្រើនពេក តម្រងនោមរបស់អ្នកមិនអាចកម្ចាត់ជាតិទឹកដែលលើសបាន លើសជាតិទឹកច្រើនក្នុងខ្លួន ងាយខូចតម្រងនោមណាស់។

សរុបមកវិញជម្រើសល្អបំផុតតែ១គត់សម្រាប់អ្នកគឺញ៉ាំទឹកឱ្យត្រូវទៅតាមបរិមាណដែលកំណត់ ហាមលើស ហាមខ្វះ បើស្រឡាញ់តម្រងនោម មិនចង់អស់ប្តូរតម្រងនោមទាំងវ័យនៅក្មេង៕

អត្ថបទដោយ៖ មឿន គន្ធា