ភ្នែកពិតជាសំខាន់ខ្លាំងណាស់ ព្រោះតែវាដើរតួជាសរីរាង្គវិញ្ញាណចម្បង ដែលអនុញ្ញាតឱ្យយើងមើលឃើញពិភពលោក។ យោងតាមវេបសាយសុខភាព Summa Health បានឱ្យដឹងថា ទម្លាប់ជាច្រើនដែលយើងអនុវត្តជារៀងរាល់ថ្ងៃ អាចធ្វើឱ្យយើងប្រឈមនឹងហានិភ័យ បណ្ដាលឱ្យមានការឈឺចាប់ភ្នែក ឬឈានដល់ការបាត់បង់ការមើលឃើញទៀតផង។ ចំពោះទម្លាប់ដែលធ្វើឱ្យប៉ះពាល់ភ្នែករួមមាន៖
១. ត្រដុសភ្នែក៖ ការធ្វើបែបនេះ អាចបំផ្លាញកញ្ចក់ភ្នែក ដែលបណ្ដាលឱ្យរលាក និងអាចឆ្លងមេរោគបាន។
២. ចំណាយពេលលើអេក្រង់៖ ការសម្លឹងមើលអេក្រង់គ្រឿងអេឡិចត្រូនិកច្រើនពេក បណ្ដាលឱ្យឈឺក្បាល ភ្នែកមើលមិនច្បាស់ ស្ងួត និងរលាកភ្នែក។
៣. ការខ្សោយជាតិទឹក៖ ការមិនទទួលទានទឹកឱ្យបានគ្រប់គ្រាន់ អាចរួមចំណែកធ្វើឱ្យភ្នែកស្ងួត។
៤. ជក់បារី៖ ការជក់បារីត្រូវបានគេស្គាល់ថា វាបណ្ដាលឱ្យកើតជំងឺមហារីកសួត និងបេះដូង។ ក្រៅពីនេះ វាក៏អាចបណ្ដាលឱ្យភ្នែកឡើងបាយ ដក់ទឹកក្នុងភ្នែក និងជំងឺភ្នែកមួយចំនួនទៀត។
៥. ការត្រូវពន្លឺថ្ងៃ៖ ការមិនពាក់វ៉ែនតាការពារពីកាំរស្មី UV អាចបំផ្លាញភ្នែក បង្កើនហានិភ័យនៃជំងឺភ្នែកឡើងបាយ និងភ្នែកចុះខ្យោយ។
៦. គេងមិនគ្រប់គ្រាន់៖ ការគេងមិនបានគ្រប់គ្រាន់ អាចបណ្ដាលឱ្យភ្នែកឡើងឈាម ហើមភ្នែក និងព្រឹលៗ៕