បើនិយាយពីការខ្សោះជាតិទឹក នោះមនុស្សជាច្រើននឹងនឹកគិតដល់ទឹក ដោយសារតែទឹកពិតជាមានសារៈសំខាន់ ក្នុងការជួយបំពេញជាតិទឹក បំបាត់ការស្រេកទឹក និងផ្ដល់អត្ថប្រយោជន៍ជាច្រើនដល់រាងកាយ។ បើយោងតាមវេបសាយសុខភាព MedicineNet បានឱ្យដឹងថា ក្រៅពីទឹកក៏មានភេសជ្ជៈមួយចំនួនដែលជួយបំពេញជាតិទឹក ធ្វើឱ្យអារម្មណ៍ស្រស់ស្រាយ និងធ្វើឱ្យរាងកាយមានភាពរហ័សរហួន។ ភេសជ្ជៈដែលអាចញ៉ាំជំនួសទឹកសម្រាប់អ្នកមិនចង់ញ៉ាំទឹក រួមមាន៖
១. ទឹកដូង៖ វាជាប្រភពដ៏ល្អនៃអាឡិចត្រូលីត ដែលជួយឱ្យអ្នករក្សាជាតិទឹកបាន ហើយវាក៏មានកាឡូរីនិងជាតិស្ករទាប បូករួមទាំងវីតាមីននិងសារធាតុរ៉ែផងដែរ។ វាជាជម្រើសភេសជ្ជៈកីឡាដ៏ល្អបំផុត បន្ទាប់ពីការហាត់ប្រាណ។
២. ទឺកឃ្មុំនឹងក្រូចឆ្មា៖ ទឹកឃ្មុំក្រូចឆ្មាជាភេសជ្ជៈផ្តល់ភាពស្រស់ស្រាយ និងផ្តល់សុខភាពល្អ ដែលរួមបញ្ចូលនូវរសជាតិជូរចេញពីក្រូចឆ្មាជាមួយនឹងភាពផ្អែមល្ហែមនៃទឹកឃ្មុំ។ ភេសជ្ជៈនេះ ត្រូវបានគេស្គាល់ថាមានអត្ថប្រយោជន៍ដល់សុខភាពជាច្រើន រួមមានជំនួយដល់ការរំលាយអាហារ បង្កើនប្រព័ន្ធភាពស៊ាំ និងលើកកម្ពស់ជាតិទឹក។
៣. តែបៃតង៖ តែបៃតង មានជាតិកាហ្វេអ៊ីនតិចជាងតែខ្មៅ ខណៈវាមានសារធាតុប្រឆាំងអុកស៊ីតកម្ម និងថែមទាំងការពារការខូចខាតកោសិកា។ ក្រៅពីនេះ វាត្រូវបានបញ្ជាក់ក្នុងការបញ្ចុះកូឡេស្ដេរ៉ុល ធ្វើឱ្យឡើងនូវលំហូរឈាម និងជួយស្ថានភាពមួយចំនួនទាក់ទងនឹងបេះដូង។
យ៉ាងណាមិញ នៅក្នុងសមរភូមិទប់ទល់ការខ្សោះជាតិទឹក គឺទឹកនៅតែឈ្នះ ដោយសារតែទឹកមិនមានជាតិកាហ្វេអ៊ីន ស្ករ ឬសារធាតុបន្ថែមផ្សេងទៀតទេ ដែលវាជាទម្រង់នៃជាតិទឹកដ៏បរិសុទ្ធបំផុត៕
អត្ថបទដោយ៖ មាស ចាន់ដារ៉ា