បើយោងតាមវីដេអូឃ្លីបខ្លីមួយ ឯកឧត្តម្ភ ខៀវ កាញារិទ្ធ បានផ្ដិតយកទិដ្ឋភាពក្នុងផ្ទះរបស់ឯកឧត្តម្ភផ្ទាល់ និងយកទៅបង្ហោះចែកចាយលើគណនីហ្វេសប៊ុក ដែលក្នុងនោះ បានបង្ហាញឱ្យឃើញពីជណ្ដើរយន្ដ និងជណ្ដើរជើង។ ទន្ទឹមនឹងនោះ​ ឯកឧត្តម្ភបានមានប្រសាសន៍បែបនេះថា «ពេលធ្វើផ្ទះ ខំដាក់ជណ្ដើរយន្ដ ដោយសារតែនឹកឃើញថា ពេលមកពីធ្វើការហត់ ឡើងជណ្ដើរយន្ដ។ តែពេលកាន់តែចាស់ ទើបដឹងថា ការប្រើជណ្ដើជើងមានអត្ថប្រយោជន៍ច្រើនជាងជណ្ដើរយន្ដ»។ ក្រោយពីមានប្រសាសន៍ចប់ ឯកឧត្តម្ភ បានឡើងជណ្ដើរជើងរហូតដល់ជាន់ខាងលើ ដែលហាក់ចង់បង្ហាញឱ្យមហាជនយល់ឃើញថា ការឡើងជណ្ដើរជើង ប្រៀបបានទៅនឹងការធ្វើលំហាត់ប្រាណ ដើម្បីជួយរក្សាកម្លាំងសាច់ដុំ ធ្វើឱ្យសុខភាពល្អ។

បើយោងតាមវេបសាយសុខភាព Healthhub បានឱ្យដឹងថា ការឡើងជណ្ដើរជើងអាចជាលំហាត់ប្រាណដ៏មានប្រយោជន៍សម្រាប់មនុស្សវ័យចំណាស់ ព្រោះវាជួយបង្កើនកម្លាំងជើង តុល្យភាព និងសុខភាពសរសៃឈាមបេះដូងជាដើម។ អត្ថប្រយោជន៍សំខាន់ៗរួមមាន៖

លំហាត់ប្រាណបេះដូង៖ ការឡើងជណ្ដើរបង្កើនចង្វាក់បេះដូង ធ្វើឱ្យសុខភាពសរសៃឈាមបេះដូងប្រសើរឡើង។

ដង់ស៊ីតេឆ្អឹង៖ ការប្រើជណ្ដើរទៀងទាត់អាចរួមចំណែកដល់ការរក្សាដង់ស៊ីតេឆ្អឹង ដែលមានសុខភាពល្អ កាត់បន្ថយហានិភ័យនៃជំងឺពុកឆ្អឹង។

ពង្រឹងសាច់ដុំជើង៖ នៅពេលមនុស្សវ័យចំណាស់ឡើងជណ្ដើរ សាច់ដុំចម្បងដែលចូលរួមមានផ្នែកខាងមុខនៃភ្លៅ ខាងក្រោយភ្លៅ គូទ និងសាច់ដុំកំភួនជើង ដោយសារតែសាច់ដុំទាំងនេះទទួលខុសត្រូវជាចម្បងសម្រាប់ការលើកទម្ងន់រាងកាយឡើងជណ្ដើរ។ សកម្មភាពនេះ ត្រូវបានចាត់ទុកថាជាវិធីដ៏ល្អមួយក្នុងការពង្រឹងសាច់ដុំផ្នែកខាងក្រោម និងពង្រឹងកម្លាំងជើង៕