ចេញពីត្រកូលអ្នកក្រខ្សត់ ក្រោយពីទទួលបានឱកាសរៀនសូត្រមានចំណេះដឹងរហូតក្លាយជាគ្រូបង្រៀន ក៏ចាប់ផ្ដើមត្រឡប់ទៅបំពេញការងារបង្រៀនភាសាអង់គ្លេសនៅក្នុងសហគមន៍ ដែលជាស្រុកកំណើត។ លោក ឆាយ ស៊ីនឿន បានប្រាប់ចាបបៃតងថា លោកជាមនុស្សដែលធ្លាប់ខ្សត់ចំណេះ ហេតុនេះទើបចង់ឱ្យក្មេងៗស្រុកស្រែមានឱកាស បានក្រេបយកចំណេះនិងភាសាបរទេស ទើបស្ម័គ្រចិត្តទៅធ្វើជាគ្រូបង្រៀនក្នុងសហគមន៍ក្នុងខេត្តកំពត។

ដោយបានសម្លឹងឃើញក្នុងសហគមន៍របស់លោក មានដំណាំដូងល្អភោគផល និងជាប្រភេទដូងដែលគេទទួលស្គាល់ថាជាដូងមានរសជាតិនិងគុណភាពល្អ ប៉ុន្តែបែរជាទុកឱ្យទុំជ្រុះចោល គ្មានទីផ្សារទៅវិញ។ ដោយទឹកចិត្តជាអ្នកចែករំលែក ស្ដាយផលដំណាំធម្មជាតិ បូករួមទាំងចង់ឱ្យពលរដ្ឋក្នុងសហគមន៍របស់ខ្លួន មានចំណូលបន្ថែមផ្គត់ផ្គង់គ្រួសារ លោកក៏សម្រេចសាកល្បងយកដូងទាំងនោះមកផលិតជាប្រេងដូង។

ក្ដីស្រឡាញ់ជាដើមទុន មិនមែនជាអ្នកជំនាញ តែលោកបានសិក្សាពីអ្នកជំនាញផ្សេងៗ និងស្រាវជ្រាវបន្ថែមពីក្នុងអិនធើណែត ចាប់ផ្ដើមរៀនធ្វើប្រេងដូងត្រជាក់ដោយខ្លួនឯងនៅក្នុងឆ្នាំ២០១៤។ លោកនិយាយថាមិនមែនជារឿយងាយ លោកព្យាយាមធ្វើជាច្រើនលើកច្រើនសារ ធ្វើហើយខូច ប្រេងមិនល្អ ប្រេងខា ប្រេងមិនមានគុណភាព កោសដូងធ្វើម្ដងហើយម្ដងទៀតដាច់រលាត់ដៃឈាមរហាមក៏មាន ។ ការព្យាយាមជាង៣ខែរបស់លោកបានសម្រេច ពីមនុស្សដែលមិនដឹងថាប្រេងដូងផលិតរបៀបណា រហូតចេះរើសប្រភេទដូងបែបណាធ្វើប្រេងល្អ គួរប្រើវិធីបែបណាទើបប្រេងថ្លា មិនខា និងអាចរក្សាសារធាតុចិញ្ចឹមធម្មជាតិបានល្អ។

ក្រោយពីអាចផលិតបានជោគជ័យហើយ លោកក៏ចាប់អាជីពផលិតប្រេងធម្មជាតិបន្ថែម រហូតក្លាយជាសិប្បកម្មក្នុងសហគមន៍មានឈ្មោះថា The Coconut-ប្រេងដូងធម្មជាតិ ដែលមានទីតាំងនៅ ភូមិដំណាក់ទ្រព្យខាងត្បូង ឃុំក្រាំងស្នាយ ស្រុកឈូក ខេត្តកំពត។ អ្វីដែលសប្បាយចិត្តបំផុត គឺលោកបានក្លាយជាសហគ្រិនម្នាក់ដែលអាចកែច្នៃផលិតផលក្នុងស្រុក ឱ្យមានទីផ្សារលក់ទាំងក្នុងនិងក្រៅប្រទេស ព្រមទាំងចូលរួមបង្កើតចំណូលឱ្យបងប្អូនកសិករ ប្រមូលទិញដូងពីក្នុងសហគមន៍ ហោចណាស់គ្រួសារខ្លះក៏អាចទទួលបានជាង១លានរៀលរាល់ខែ។ មិនតែប៉ុណ្ណោះក៏អាចបង្កើតការងារឱ្យស្ត្រីដែលមិនអាចទៅធ្វើការឆ្ងាយបាន ចូលរួមធ្វើការក្នុងសិប្បកម្មរបស់លោកផងដែរ។ ការតស៊ូជាង៧ឆ្នាំមិនអត់ប្រយោជន៍ បានឱ្យប្រជាជនបានប្រើផលិតក្នុងស្រុកដែលមានគុណភាពល្អ នៅ​ក្នុងឆ្នាំ២០២២នេះមានការគាំទ្រខ្លាំងបង្កើនការផលិតច្រើនជាងមុន និងកំពុងរៀបគម្រោងចែកចាយឱ្យកាន់តែទូលាយទាំងក្នុងនិងក្រៅប្រទេសផងដែរ។

The Coconut-ប្រេងដូងធម្មជាតិ គឺជាប្រេងដូងដែលបាននាំចេញតាមរយៈក្រុមហ៊ុនOrganic Beauty Co., Ltd ទៅប្រទេសញូហ្សែឡែន និងបានធ្វើតេស្តពិសោធន៍ជាប្រេងដូងដែលល្អ អាចរក្សាទុកនូវសារធាតុចិញ្ចឹមរបស់ដូងបានយ៉ាងច្រើនជាងប្រេងដូងធម្មតា៦ដង និងជាប្រេងដែលមានគុណភាពខ្ពស់។ ប្រេងដូងធម្មជាតិនេះ ក៏មានលក់នៅតាមបណ្ដាខេត្តនានាក្នុងប្រទេស និងមានលក់នៅក្នុងហាង ម៉ាតជាច្រើននៅទីក្រុងភ្នំពេញផងដែរ។ សម្រាប់បងប្អូនដែលចង់បានប្រេងដូងដែលមានគុណភាពល្អទៅប្រើប្រាស់ និងចង់រួមចំណែកគាំទ្រផលិតផលក្នុងស្រុក ជួយបង្កើតចំណូលឱ្យកសិករខ្មែរ អាចធ្វើការទំនាក់ទំនងទៅកាន់ផេក The Coconut-ប្រេងដូងធម្មជាតិ របស់សិប្បកម្មផ្ទាល់បាន៕

អត្ថបទដោយ៖ Senghong