យីហោទឹកជ្រលក់របស់ថៃមួយនេះ ល្បីឈ្មោះជាង៦០ឆ្នាំមកហើយ ហើយក៏មានបងប្អូនខ្មែរមិនតិចទេជាអតិថិជនប្រចាំរបស់ ប្រ៊េនម៉ែប្រាណមនេះ។ ថ្ងៃនេះចាបបៃតង នឹងនាំបងប្អូនមកដឹងពីប្រវត្តិខ្លះៗក្នុងការបង្កើតប្រ៊េនដ៏ចំណាស់នេះឡើង តាំងពីឆ្នាំ ១៩៥៩ ។

ការចាប់កំណើតរបស់យីហោ ម៉ែប្រាណម កើតឡើងដោយគូស្វាមីភរិយាមួយគូ គឺលោក សិរិឆៃ និង អ្នកស្រី ប្រាណម នេះឯង។ អ្នកស្រីប្រាណម ជាស្រ្តីម្នាក់ដែលមានជំនាញខាងចំអិនម្ហូប ពិសេសពូកែធ្វើទឹកជ្រលក់ អ្នកដែលបានភ្លក់រសជាតិម្ហូបរបស់អ្នកស្រី ដឹងតែជាប់ចិត្តភ្លេចមិនបាន។ អ្នកស្រីតែងតែធ្វើម្ហូបវេចខ្ចប់ឱ្យស្វាមី ទៅធ្វើការជារៀងរាល់ថ្ងៃ ដែលលោក សិរិឆៃ ធ្វើការផ្នែកលក់ឱ្យគេ។ ដោយគិតថាមិនចង់នៅធ្វើការឱ្យគេយូរទៀតមិនងាយរីកចម្រើន ណាមួយឃើញថាភរិយាធ្វើម្ហូបឆ្ងាញ់ លោកក៏បានបបួលភរិយា ចេញរកស៊ីខ្លួ​នឯងម្ដងក្រែងប្រសើរជាងនេះ។

ដូចពាក្យគេថាចេះប្រាកដប្រាក់រត់តាមហៅ សាច់ញាតិបងប្អូនដែលធ្លាប់បានស្គាល់រសជាតិទឹកជ្រលក់របស់អ្នកស្រីធ្វើ ពួកគាត់ចេះតែសួររកញឹកញាប់ហើយប្រាប់ឱ្យអ្នកស្រីធ្វើលក់។ គូស្វាមីភរិយា ក៏សម្រេចចិត្តថាធ្វើទឹកជ្រលក់លក់តែម្ដង តែការចាប់ផ្ដើមមិនមែនជារឿងងាយឡើយ។ អ្នកទាំងពីរមិនមែនជាអ្នកមាន ទ្រព្យធនអ្វីច្រើនពីមុនមកទេ ហេតុតែចិត្តចង់ទៅហើយ លោក សិរិឆៃ សុខចិត្តត្រូវរត់ខ្ចីលុយគេមកបង្វិល។ ឯភរិយាវិញ ក៏បានទៅនិយាយជាមួយនិងអាជីវករលក់គ្រឿងទេស ដែលធ្លាប់ស្គាល់គ្នាកន្លងមក សុំយកគ្រឿងទេសពីគេ មកធ្វើទឹកជ្រលក់លក់សិន ពេលលក់បានលុយនិងបង្វិលឱ្យគេវិញ។

ត្បិតតែអ្នកស្រី ប្រាណម មានធ្វើម្ហូបឆ្ងាញ់តែក៏ធ្វើតិចតូចជាលក្ខណៈគ្រួសារ មិនធ្លាប់ធ្វើច្រើនលក់នោះទេ ហេតុនេះអ្នកទាំង២ត្រូវរួមគ្នាបង្កើតរូបមន្តមួយឡើងសិនដើម្បីឱ្យរសជាតិនៅថេរ។ ស្វាមី ឱ្យភរិយាចូលផ្ទះបាយ ធ្វើអ្វីធ្វើទៅឱ្យតែប្រពន្ធចង់ធ្វើ ដោយស្វាមីអង្គុយចាំកត់ត្រា រាល់គ្រឿងទេស ទាំងចំនួនទាំងបរិមាណ រហូតទាល់តែអ្នកទាំង២សម្រេចបានរូបមន្តមួយដែលល្អឥតខ្ចោះឡើងមក។ លោក សិរិឆៃ ចាប់ផ្ដើមយករូបមន្តដែលធ្វើបាន ទៅផលិតជាធ្វើជាទឹកជ្រលក់ដាក់កែវលក់ ដោយដាក់ឈ្មោះថា ទឹកជ្រលក់ម៉ែប្រាណម ហើយដាក់ឡានបើកលក់តាមផ្លូវ ។

ពីមួយកន្លែងទៅមួយកន្លែង ចាប់ផ្ដើមមានអ្នកស្គាល់កាន់តែច្រើន មានម៉ូយប្រចាំ ហើយចេះតែសួររកផលិតផលថ្មីៗរបស់ពួកគាត់។ ឱកាសដល់ហើយមិនចាំយូរ ដោយការលក់កាន់តែរីកចម្រើន អ្នកទាំង២ក៏សម្រេចចិត្តចុះកម្មសិទ្ធបញ្ញា រត់ការតាមផ្លូវច្បាប់ ក្លាយខ្លួនជាសហគ្រាស ដោយមាន ឡូហ្គូជារូបនិងឈ្មោះម៉ែប្រាណម តែម្ដង ។ បន្ទាប់ពីបំប្លែងខ្លួនធំជាងមុន លោក សិរិឆៃ មិនអាចបើកឡានលក់ម្នាក់ឯងបានទៀតទេ លោកក៏ចាប់ផ្ដើមយកទៅផ្ញើតាមហាងលក់គ្រឿងទេស កន្លែងលក់ម្ហូបអាហារផ្សេងៗ ដោយប្រាប់គេថាប្រសិនបើលក់ដាច់ ទើបគាត់មកគិតគូលុយ តែបើលក់មិនដាច់គាត់នឹងមកប្រមូលយកទៅវិញ។ ដោយគិតថាមិនមានអ្វីខាតបង់ អាជីវករទាំងនោះក៏យល់ព្រមទទួលទឹកជ្រលក់របស់គាត់លក់។

ចាប់ពីនោះមក យីហោ ម៉ែប្រាណមកាន់តែល្បី មានអ្នកគាំទ្រច្រើន រហូតពួកគាត់មានលទ្ធភាព អាចទិញដីធ្វើរោងចក្រផលិតកាន់តែធំឡើងៗ រហូតក្លាយជាក្រុមហ៊ុន Phiboonchai Maepranom Thai Chili Paste Co., Ltd ។ មកដល់បច្ចុប្បន្ន ៦៣ឆ្នាំហើយ ប្រ៊េនម៉ែប្រាណម ចេះតែស្ថាបនាផលិតផល និងក្រុមហ៊ុនរបស់ខ្លួនឡើងមក មានផលិតផលស្ទើរតែគ្រប់គ្រឿងទេសដែលប្រើក្នុងផ្ទះបាយតែម្ដង។ អ្វីដែលពិសេស ក្រុមហ៊ុននេះ បានចែកចាយផលិតផលរបស់ខ្លួនពេញទីផ្សារក្នុងស្រុក ក៏បាននាំចេញរហូតដល់ជាង៤០ប្រទេស ក្នុងនោះរួមទាំងកម្ពុជាផងដែរ៕

អត្ថបទដោយ ៖ Senghong