ឡេការពារកម្ដៅថ្ងៃ គឺជាផ្នែកមួយដ៏សំខាន់បំផុតក្នុងការថែរក្សាស្បែកប្រចាំថ្ងៃ ពិសេសនៅអាកាសធាតុក្តៅខ្លាំង។ វាជួយការពារកាំរស្មី UV មិនឱ្យបំផ្លាញស្បែកធ្វើឱ្យរលាក ក្រហម ឬធ្វើឱ្យស្បែកចាស់លឿន។ យ៉ាងណាមិញ មនុស្សជាច្រើនតែងមានបញ្ហារមាស់ ឬមានអារម្មណ៍ថាក្រហាយនៅលើស្បែកបន្ទាប់ពីលាបឡេការពារកម្ដៅថ្ងៃ រួចដែលធ្វើឱ្យពួកគេពិបាកមែនទែនក្នុងការប្រើប្រាស់ឡេការពារស្បែក។
ក្នុងករណីបន្ទាប់ពីលាបឡេការពារកម្ដៅថ្ងៃរួចឡើងរមាស់ភ្លាមៗ វាអាចកើតឡើងដោយកត្តាជាច្រើនដែលខុសគ្នា ដូចជា សមាសធាតុនៅក្នុងផលិតផល បរិយាកាសដែលយើងរស់នៅ និងប្រភេទឡេការពារកម្ដៅថ្ងៃដែលយើងប្រើមិនត្រូវជាមួយប្រភេទស្បែក ជាដើម។ ដូច្នេះបើអ្នកជួបប្រទះបញ្ហាលាបឡេការពារកម្ដៅថ្ងៃរួចស្រាប់តែឡើងរមាស់ភ្លាមៗ វិធីដោះស្រាយត្រូវតែទៅលាងទឹកចេញ ហើយស្វែងរកឡេការពារកម្ដៅថ្ងៃថ្មី តែត្រូវចាំមុននឹងទិញត្រូវពិនិត្យឱ្យបានច្បាស់ ឬសាកសួរអ្នកលក់ពីផលិតផលដែលត្រូវជាមួយស្បែករបស់ខ្លួនឯង ហើយក៏ត្រូវដឹងថាឡេការពារកម្ដៅថ្ងៃនោះជាប្រភេទ Indoor (ប្រើសម្រាប់អ្នកនៅម្លប់មិនត្រូវថ្ងៃច្រើន) ឬ Outdoor (ប្រើសម្រាប់ចេញក្រៅញឹក ឬត្រូវកម្ដៅថ្ងៃច្រើន)។
យ៉ាងណាមិញ បើសិនជាអ្នកលាបឡេការពារកម្ដៅថ្ងៃហើយមិនកើតរមាស់ភ្លាមៗទេ ប៉ុន្តែបន្ទាប់ពី ២ ទៅ ៣ ម៉ោងឬដល់ពេលចេញក្រៅទើបរមាស់នោះ នេះមិនមែនមកពីឡេការពារកម្ដៅថ្ងៃដែលអ្នកលាបមានបញ្ហាទេ តែវាអាចបណ្ដាលមកពីស្បែករបស់អ្នកជាប់ធូលីដី ឬកម្ទេចកម្ទី ពីបរិកាសជុំវិញច្រើនពេក។ នៅពេលនៅពេលឡេការពារកម្ដៅថ្ងៃស្ថិតលើស្បែកជាមួយធូលី ស្បែកអាចមានប្រតិកម្មរមាស់។ ករណីនេះដំណោះស្រាយសាមញ្ញណាស់ គ្រាន់តែលាងមុខឱ្យស្អាត ហើយលាបឡេការពារកម្ដៅថ្ងៃឡើងវិញ នោះការរមាស់ភាគច្រើននឹងបាត់ទៅវិញ។
សម្រាប់អ្នកដែលមិនសូវដឹងពីប្រភេទ ឡេការពារកម្ដៅថ្ងៃ ថាតើឡេការពារកម្ដៅថ្ងៃណាដែលល្អងាយស្រួលលាប។ ឡេការពារកម្ដៅថ្ងៃមាន ២ ប្រភេទគឺ Chemical និង Physical (Mineral)។ Chemical Sunscreen ជាប្រភេទងាយជ្រាបចូលលើស្បែក ស្រួលលាប និងមិនប្រតាកលើស្បែក។ ប៉ុន្តែនៅថ្ងៃដែលអាកាសធាតុក្តៅខ្លាំង ពួកវាអាចធ្វើឱ្យស្បែករបស់មនុស្សមួយចំនួនមានប្រតិកម្មខ្លាំង ដូចជារមាស់ រោល ឬក្រហម ពិសេសសម្រាប់អ្នកដែលមានស្បែកងាយរលាក ឬកើតមុនងាយ។ ក្នុងករណីនេះ ការប្តូរទៅប្រើ Physical Sunscreen គឺជាជម្រើសល្អជាង។ Physical Sunscreen មានសមាសធាតុ Zinc Oxide ឬ Titanium Dioxide វាការពារកាំរស្មីដោយរារាំងនៅលើផ្ទៃស្បែក ហើយសមស្របសម្រាប់ស្បែកងាយរលាកជាង Chemical Sunscreen។
ទោះបីជាយ៉ាងណាក៏ដោយ ការរមាស់ស្បែកបន្ទាប់ពីលាបឡេការពារកម្ដៅថ្ងៃ វាមិនប្រាកដថាកើតឡើងដោយសារតែមូលហេតុដូចខាងលើនេះទាំងអស់ទេ ពេលខ្លះវាអាចបណ្តាលមកពីស្បែករបស់អ្នកខូចស្រាប់ ស្បែកមានស្នាមរលាក មិនបានលាងសម្អាតស្បែកឱ្យបានស្អាត ឬលាបច្រើនជាន់នៅលើផលិតផលផ្សេង ក៏ជាមូលហេតុដែរ។ ដូច្នេះ ប្រសិនបើអ្នកឈប់ប្រើ Sunscreen ហើយស្បែកនៅតែរមាស់ខ្លាំង ឬមានអាការៈក្រហមលើសពីមួយសប្ដាហ៍ ឬទៅដល់មួយខែ គួរទៅពិគ្រោះជាមួយវេជ្ជបណ្ឌិតស្បែក ដើម្បីរកមូលហេតុពិតប្រាកដ ហើយទទួលបានការព្យាបាលត្រឹមត្រូវ៕
អត្ថបទដោយ៖ សារួ