១. ត្រូវផឹកទឹកឱ្យបានគ្រប់គ្រាន់៖ ទឹកជាគន្លឹះធ្វើឱ្យប្រព័ន្ធរំលាយអាហារដំណើរការល្អ និងជួយបន្សាបជាតិពុលក្នុងខ្លួន ។ រាងកាយមនុស្សយើងត្រូវការទឹកប្រហែល ២.៥ ទៅ ៣ លីត្រក្នុងមួយថ្ងៃ ដើម្បីជំរុញប្រព័ន្ធរំលាយអាហារ និងធ្វើឱ្យការបម្លែងថាមពលកាន់តែមានប្រសិទ្ធភាព។ ការផឹកទឹកឱ្យបានគ្រប់គ្រាន់មិនត្រឹមតែអាចជួយសម្រកទម្ងន់បានទេ ថែមទាំងធ្វើឱ្យស្បែកស្អាត ក្មេងជាងវ័យទៀតផង។

២. ត្រូវញ៉ាំអាហារពេលព្រឹកឱ្យបានត្រឹមត្រូវ៖ មនុស្សជាច្រើនមិនសូវយកចិត្តទុកដាក់ញ៉ាំអាហារពេលព្រឹកទេ មុនទៅធ្វើការបានត្រឹមកាហ្វេ ១កែងគឺគ្រប់គ្រាន់។ តែវាមិនគ្រប់គ្រាន់សម្រាប់រាងកាយទេ ព្រោះបើយើងមិនញុំាអាហារពេលព្រឹកវានឹងធ្វើឱ្យឃ្លានខ្លាំងនៅពេលថ្ងៃហើយញុំាច្រើនដើម្បីបំពេញភាពឃ្លាន។ ដូច្នេះអាហារពេលព្រឹកដែលល្អបំផុតអ្នកអាចញុំាជា ស៊ុត នំបុ័ង និងទឹកដោះគោមួយកែង ដើម្បីផ្ដល់ថាមពលដល់រាងកាយ ហើយមិនធ្វើឱ្យឡើងគីឡូ។

 ៣. គេងឱ្យបានគ្រប់គ្រាន់៖ ចំណុចនេះក៏សំខាន់ដូចគ្នានៅពេលដែលអ្នកគេងយឺត ឬគេងមិនលក់ វាអាចរំខានដល់អ័រម៉ូន និងបង្កើនចំណង់ញ៉ាំអាហារ។ ត្រូវទម្លាប់ខ្លួនឯងឱ្យចូលគេងទៀងទាត់ ប្រសិនបើអ្នកមានទម្លាប់ចូលគេងយឺតដូចជា ចូលគេងនៅម៉ោង ១២ និងភ្ញាក់នៅម៉ោង ៨ ព្រឹកត្រូវកំណត់ម៉ោងនេះជាប្រចាំថ្ងៃ។

៤. នៅពេលញ៉ាំ ត្រូវញ៉ាំយឺតៗ និងទំពារឱ្យបានហ្មត់៖ ពេលញ៉ាំកុំប្រញាប់ ញ៉ាំយឺតៗដើម្បីឱ្យខួរក្បាលទទួលបានសញ្ញានៃភាពឆ្អែតទាន់ពេលវេលា ហើយក៏មិនធ្វើឱ្យអ្នកញ៉ាំច្រើនលើសពីតម្រូវការរបស់រាងកាយដែរ។ លើសពីនេះវាក៏ជួយជំរុញដល់ប្រព័ន្ធរំលាយអាហារឱ្យកាន់តែល្អដូចគ្នា។

៥. យកចិត្តទុកដាក់ពេលញ៉ាំផ្លែឈើ៖ បន្ទាប់ពីម៉ោង ៣ រសៀល រាងកាយនឹងប្រើថាមពលតិចជាងមុន ហើយជាតិស្ករពីផ្លែឈើអាចបម្លែងទៅជាជាតិខ្លាញ់បានងាយ។ ដូច្នេះគួរញ៉ាំផ្លែឈើមុនម៉ោងនេះ ឬក៏បន្ថយបរិមាណក្រោយពេលរសៀល។

៦. សូមអនុវត្តទម្លាប់ឈរទល់ជញ្ជាំងប្រហែល ១៥ នាទីបន្ទាប់ពីញ៉ាំ៖ ទម្លាប់តូចៗបែបនេះអាចជួយដល់ការរំលាយអាហារបានយ៉ាងល្អ និងបន្ថយការកកកុញខ្លាញ់នៅជុំវិញក្បាលពោះ និងភ្លៅ។ វាជាវិធីសាមញ្ញមួយ ប៉ុន្តែមានប្រយោជន៍ខ្លាំងសម្រាប់អ្នកដែលចង់សម្រកទម្ងន់ដោយធម្មជាតិ៕

អត្ថបទដោយ៖ សារួ