១. ញ៉ាំអាហារដែលមានតុល្យភាព៖ របបអាហារល្អជាគន្លឹះធ្វើឱ្យសក់ឆាប់ដុះលឿន និងរឹងមាំ។ សក់ត្រូវការវីតាមីន និងសារធាតុចិញ្ចឹមជាច្រើនដើម្បីជួយក្នុងដំណើរការលូតលាស់។ វីតាមីនដូចជា A, B, C, D និង E មាននៅក្នុង  ការ៉ុត ត្រី បន្លែបៃតង ផ្លែឈើ ម្ទេសប្លោក សាច់ក្រហម ផ្លែក្រូច ក្រូចឆ្មារ ម្នាស់...។  រួមជាមួយ ប្រូតេអ៊ីន និងជាតិដែក មានសារៈសំខាន់ណាស់។ 

២. កំណត់ការប្រើគីមី និងការលាបសក់ញឹកញាប់៖ ផលិតផលដែលប្រើលើសក់មានគីមីខ្លាំង ឬការលាបពណ៌ញឹកញាប់ អាចបំផ្លាញឫសសក់ ធ្វើឱ្យសក់ខ្សោយ និងបែកចុង។ សូមជៀសវាងការប្រើផលិតផលដែលមានជាតិអាល់កុល ឬជាតិគីមីខ្លាំង ហើយផ្តោតលើការថែទាំសក់ដោយផលិតផលធម្មជាតិវិញ។ 

៣. កុំប្រើកម្ដៅលើសក់ញឹកញាប់ពេក៖ ដូចជា ម៉ាស៊ីនសម្ងួតសក់ អាចធ្វើឱ្យសក់ស្ងួត និងខូច។ បើអ្នកចង់បានសក់ដែលមានសុខភាពល្អ ឆាប់ដុះលឿនគួរតែកាត់បន្ថយ ហើយបើចង់សម្ងួតសក់គួរប្រើកន្សែងទន់ៗមកជូតហើយទុកឱ្យវាស្ងួតទៅតាមធម្មជាតិ។ 

៤. កាត់សក់ជាប្រចាំ៖ មនុស្សជាច្រើនគិតថាការកាត់សក់ធ្វើឱ្យកាន់តែខ្លីហើយមិនងាយវែងលឿន ប៉ុន្តែការកាត់សក់ជាប្រចាំជួយបំបាត់សក់បែកចុង។ លោកវេជ្ជបណ្ឌិត Bergfeld បញ្ជាក់ថា សក់បែកចុងអាចរីកឡើង ហើយបើមិនកាត់វាចេញ វានឹងធ្វើឱ្យសក់កាន់តែខូច។ 

៥. ថែទាំស្បែកក្បាល៖ កាលណាស្បែកក្បាលយើងមានសុខភាពល្អ នោះជាគន្លឹះនៃសក់ស្អាតដូចគ្នា។ ប្រសិនបើស្បែកក្បាលរមាស់ មានអង្គែ មានដំបៅ វាជាឧបសគ្គរារាំងដល់ការលូតលាស់របស់សក់។ ដូច្នេះសូមប្រើសាប៊ូកក់សក់ប្រឆាំងអង្គែ ឬសាប៊ូធម្មជាតិដែលមិនមានក្លិនខ្លាំង និងគ្មានជាតិគីមីខ្លាំង។ ការម៉ាស្សាស្បែកក្បាលប្រហែលមួយ ទៅ ពីរដងក្នុងមួយសប្ដាហ៍ ក៏អាចជួយបង្កើនលំហូរឈាម និងជំរុញឫសសក់ឱ្យដុះលឿនផងដែរ។

ការធ្វើឱ្យសក់ដុះលឿនមិនមែនជារឿងងាយទេ វាត្រូវការការយកចិត្តទុកដាក់ និងការថែទាំខ្លាំងពីខ្លួនយើង ប្រសិនបើអ្នកអាចអនុវត្តតាមទម្លាប់ទាំងនេះជាប្រចាំ សក់នឹងមិនត្រឹមតែដុះលឿនទេ ថែមទាំងរឹងមាំ ភ្លឺថ្លា និងមានសុខភាពល្អជាងមុនទៀតផង៕

អត្ថបទដោយ៖ សារួ